រាជធានីភ្នំពេញ ៖ សាលាដំបូងរាជធានីភ្នំពេញ នារសៀលថ្ងៃទី២៨ ខែតុលា ឆ្នាំ២០២១ បានសម្រេចធ្វើការ ប្រកាសសាលក្រមផ្តន្ទាទោសលើជនជាប់ចោទ ជាជនជាតិបរទេស ៣នាក់ ដាក់ពន្ធនាគារកំណត់ ២ឆ្នាំ (ជនជាប់ចោទ២នាក់) និង២ឆ្នាំកន្លះ (ជនជាប់ចោទម្នាក់) ពីបទ.ឆបោក នឹងសម្អាតប្រាក់ ប្រព្រឹត្តនៅរាជធានីភ្នំពេញ ។
សាលក្រមប្រកាសជាសាធារណៈ ដោយលោក សុង ប៊ុណារិទ្ធិ ចៅក្រមជំនុំជម្រះសាលាដំបូងរាជធានីភ្នំពេញ បានផ្តន្ទាទោសលើជនជាប់ចោទ ៖
ទី១. ផ្តន្ទាទោសឈ្មោះ Goyal sandeep Kumar ភេទប្រុស អាយុ៣៨ឆ្នាំ ជនជាតិឥណ្ឌា មុនចាប់ខ្លួន ស្នាក់នៅអាផាតមិន បែលវីឡា ជាន់ទី៤ ផ្លូវលេខ៥៧ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ដាក់ពន្ធនាគារកំណត់ ២ឆ្នាំ ។
ទី២. ផ្តន្ទាទោសឈ្មោះ Tai kokpoh ភេទប្រុស អាយុ៥១ ឆ្នាំ ជនជាតិសិង្ហបុរី មុនចាប់ខ្លួន ស្នាក់នៅផ្ទះលេខ១៧ ផ្លូវលេខ១៧៤ សង្កាត់បឹងរាំង ខណ្ឌដូនពេញ រាជធានីភ្នំពេញ ដាក់ពន្ធនាគារកំណត់ ២ឆ្នាំ ។
និងទី៣. ផ្តន្ទាទោសឈ្មោះ Mohibeen Lebe Mohammas Maharof ភេទប្រុស អាយុ៤៥ឆ្នាំ ជនជាតិស្រីលង្កា មុនចាប់ខ្លួន ស្នាក់នៅផ្ទះលេខ១៨សេ ផ្លូវលេខ៥៩ សង្កាត់ចតុមុខ ខណ្ឌដូនពេញ រាជធានីភ្នំពេញ ដាក់ពន្ធនាគារចំនួន ២ ឆ្នាំ ៦ខែ ។
ជនជាប់ចោទទាំង៣ ក្រោមការចោទប្រកាន់ពីបទ.ឆបោក មានស្ថានទម្ងន់ទោស (ក្រុមមានការចាត់តាំង) និងបទ. សម្អាតប្រាក់ ប្រព្រឹត្តនៅរាជធានីភ្នំពេញ កាលពីដើមខែមករា រហូតដល់ថ្ងៃទី១៥ ខែមករា ឆ្នាំ២០២១ បទល្មើសមានចែងតាមបញ្ញាតិមាត្រា ៣៧៧ មាត្រា ៣៨០ នៃក្រមព្រហ្មទណ្ឌ និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ។
សូមរម្លឹកថា ជនជាប់ចោទទាំង៣នាក់ ត្រូវបានកម្លាំងសមត្ថកិច្ចព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួនបានជាបន្តបន្ទាប់កាលពីថ្ងៃទី១៦ ខែមករា ឆ្នាំ២០២១ ដែលពួកគេបានប្រព្រឹត្តបទល្មើសនៅក្នុងរាជធានីភ្នំពេញ ពាក់ព័ន្ធករណីលួចដកប្រាក់ពីគណនីធនាគារមួយរបស់អតិថិជន ។ កាលពីថ្ងៃទី១៥ ខែមករា ឆ្នាំ២០២១ មានអតិថិជនរបស់ធនាគារកាណាឌី ចំនួន៥នាក់ បានប្ដឹងសមត្ថកិច្ច ពីការបាត់ទឹកប្រាក់ ក្នុងគណនីធនាគារ អស់ជិត១០ម៉ឺនដុល្លារអាមេរិក ចំនួន៣លើក ។
ក្រោយពីទទួលបានពាក្យបណ្តឹងនោះ សមត្ថកិច្ចបានធ្វើការស្រាវជ្រាវ នឹងឈានដល់ការឃាត់ខ្លួនជនជាតិបរទេស៣ នាក់នេះ នឹងបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ហើយជនសង្ស័យត្រូវបានឃុំខ្លួនបណ្តោះអាសន្ន រង់ចាំសវនាការផ្តន្ទាទោសនៅពេលនេះ ៕
ចែករំលែកព័តមាននេះ