រាជធានីភ្នំពេញ ៖ តាមការធ្វើអាជីវកម្មរយៈពេល៥ឆ្នាំកន្លងមកនេះ ប្រៃសណីយ៍កម្ពុជាបានបង្កើននូវប្រាក់ចំណូលពី២.១៦៤.០០០ដុល្លារនៅឆ្នាំ២០១០ កើនឡើង៥.៤៥៧.៥០៧ដុល្លារនៅឆ្នាំ២០១៥ ដែលទទួលបានប្រាក់ចំណេញជារៀងរាល់ឆ្នាំ ។
រាជធានីភ្នំពេញ ៖ តាមការធ្វើអាជីវកម្មរយៈពេល៥ឆ្នាំកន្លងមកនេះ ប្រៃសណីយ៍កម្ពុជាបានបង្កើននូវប្រាក់ចំណូលពី២.១៦៤.០០០ដុល្លារនៅឆ្នាំ២០១០ កើនឡើង៥.៤៥៧.៥០៧ដុល្លារនៅឆ្នាំ២០១៥ ដែលទទួលបានប្រាក់ចំណេញជារៀងរាល់ឆ្នាំ ។ ជាក់ស្តែង ចំណូលនៅឆ្នាំ២០១៥ សរុបចំនួន៥.៤៥៧.៥០៧ដុល្លារ ធៀបនឹងឆ្នាំ២០១៤ ស្មើនឹង៥.១៩៨.៥០៧ដុល្លារ បានកើនឡើង៤,៩៨% ខណៈប្រាក់ចំណេញមាន១៩៨.៤៦៤ដុល្លារ ។ នេះបើតាមប្រសាសន៍របស់លោក អោក បូរ៉ា ប្រតិភូរាជរដ្ឋាភិបាល ទទួលបន្ទុកជាអគ្គនាយកប្រៃសណីយ៍កម្ពុជា ក្នុងពិធីបើកសន្និបាតបូកសរុបលទ្ធផលការងារឆ្នាំ២០១៥ និងលើកទិសដៅអនុវត្តឆ្នាំ២០១៦ នៅប្រៃសណីយ៍កម្ពុជា កាលពីព្រឹកថ្ងៃទី៣០ មីនា ។
លោក អោក បូរ៉ា មានប្រសាសន៍បន្តថា ៖ « ក្រោយពីបានក្លាយខ្លួនជាសហគ្រាសសាធារណៈនៅឆ្នាំ២០១១មក ប្រៃសណីយ៍កម្ពុជាបានកែទម្រង់ទៅលើប្រព័ន្ធគ្រប់គ្រងរដ្ឋបាលអាជីវកម្ម និងគណនេយ្យ ដោយបានបំពាក់នូវបច្ចេកវិទ្យា ICT ក្នុងការបង្កើនគុណភាពសេវាកសាងទំនុកចិត្ត ដើម្បីទទួលបានការគាំទ្រពីអតិថិជន និងលើកស្ទួយជីវភាពរបស់និយោជិត។ សម្រាប់រយៈពេល៥ឆ្នាំ ប្រៃសណីយ៍កម្ពុជាបានរកប្រាក់ចំណេញលើវិស័យប្រៃសណីយ៍សរុបចំនួន១.៥១៨.០៦៩ដុល្លារ នេះពុំទាន់គិតពីប្រាក់ចំណេញ៥% ដែលបានមកពីការចូលហ៊ុនជាមួយធនាគារកាណាឌីយ៉ា នៅក្នុងឆ្នាំ២០១៥ ដែលធនាគាររកប្រាក់ចំណេញបានចំនួន៤.១៦០.០០០ដុល្លារ » ។
លោកបន្ថែមថា ៖ « ទន្ទឹមនឹងលទ្ធផលសម្រេចបានខាងលើនេះ ប្រៃសណីយ៍កម្ពុជាបានប្រែក្លាយការបម្រើសេវាប្រៃសណីយ៍បែបប្រពៃណី ទៅជាការបម្រើសេវាដោយពឹងផ្អែកលើបច្ចេកវិទ្យា ICT និងបង្កើតក្រុមហ៊ុនដឹកជញ្ជូនបញ្ញើផ្ទាល់ខ្លួនឲ្យមានប្រសិទ្ធភាព និងរហ័សទាន់ចិត្ត ព្រមទាំងសិក្សាស្វែងរកសេវាថ្មីៗ ដោយបំពាក់បច្ចេកវិទ្យាព័ត៌មានវិទ្យាក្នុងការគ្រប់គ្រងអាជីវកម្ម និងខិតខំស្វែងរកដៃគូវិនិយោគរួមគ្នាបន្ថែមទៀត » ។
ថ្លែងក្នុងឱកាសនោះដែរ លោក ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានមានប្រសាសន៍ថា ៖ « ជោគជ័យដែលយើងទទួលបានក្នុងរយៈពេល៥ឆ្នាំជាប់ៗគ្នា គឺភាគច្រើនបានមកពីការធ្វើអាជីវកម្មលើការផ្ដល់សេវាកម្មប្រៃសណីយ៍បែបប្រពៃណី ដូចជាការផ្ញើសំបុត្រជាដើម ។ ការប្រែប្រួលយ៉ាងឆាប់រហ័សរបស់បច្ចេកវិទ្យា សេដ្ឋកិច្ច សង្គម និងការប្រែប្រួលថ្មីនៃតម្រូវការ ក៏ដូចជាការប្រែប្រួលឥរិយាបថរបស់មនុស្ស គឺទាមទារឱ្យប្រៃសណីយ៍កម្ពុជាធ្វើខ្លួន និងឆ្លើយតបឱ្យទាន់ការប្រែប្រួលទាំងនេះ ទាំងក្នុងការដឹកនាំការងារគ្រប់គ្រងធនធានមនុស្ស និងការគ្រប់គ្រងខ្សែសង្វាក់ការងារ ។ ការគិតគូរលើការបំពាក់នូវបច្ចេកវិទ្យាថ្មីៗ ឧបករណ៍ទំនើបៗដូចជា SMS HUB, Mobile Payment, courier service on demand និងផលដែលនឹងទទួលបានមកវិញពីការបំពាក់បច្ចេកវិទ្យាថ្មីៗនោះ » ។
លោករដ្ឋមន្ត្រីបន្តថា ៖ « ទន្ទឹមនឹងនេះ ការពង្រឹង និងពង្រីកសេវាដែលមានស្រាប់ ក៏ចាំបាច់ត្រូវគិតគូរផងដែរដូចជា ត្រូវស្វែងរកដៃគូវិនិយោគ និងដៃគូពាណិជ្ជកម្ម ដើម្បីរួមចំណែកបំពេញតម្រូវការ និងបង្កើនជំនឿទុកចិត្តពីអតិថិជន ។ ការពង្រាយសាខាឱ្យបានគ្រប់ទីកន្លែង ឬការដាក់បញ្ជរជាមួយគ្នានៅទីតាំងលក់ទំនិញ ឬអគារផ្ដល់សេវាផ្សេងៗ ដើម្បីធ្វើយ៉ាងណា បង្ខិតសេវាប្រៃសណីយ៍ឱ្យទៅជិត និងនៅរួមជាមួយទីតាំងផ្ដល់សេវាផ្សេងទៀត ដែលនេះគឺជាការចង់បានរបស់អតិថិជនភាគច្រើន ហើយក៏អាចកាត់បន្ថយក្នុងការចំណាយសាងសង់សាខាថ្មី និងការចំណាយមូលដ្ឋានផងដែរ » ។
លោករដ្ឋមន្ត្រីបន្ថែមថា ៖ « យើងត្រូវគិតគូរប្រមើលមើលពីប្រៃសណីយ៍កម្ពុជានាពេលអនាគត ក្នុងស្ថានភាពមួយដែលមានការប្រកួតប្រជែងជាមួយប្រតិបត្តិករដទៃទៀត ដែលកាន់តែមានភាពតានតឹងឡើងពីមួយថ្ងៃទៅមួយថ្ងៃ ជាពិសេស ពេលកម្ពុជាយើងចូលជាសមាជិកសហគមន៍សេដ្ឋកិច្ចអាស៊ានក្នុងឆ្នាំ២០១៦នេះ។ ការប្រកួតប្រជែងអាចជាការប្រឈម និងជាការគំរាមកំហែង តែក៏អាចជាឱកាសរបស់ប្រៃសណីយ៍កម្ពុជាផងដែរ ប្រសិនបើយើងបានត្រៀមខ្លួនរឹងមាំក្នុងការប្រកួតប្រជែងនោះ។ ដើម្បីសម្រេចបានតាមការលើកឡើងនេះ ប្រៃសណីយ៍កម្ពុជាត្រូវមានធនធានមនុស្សមានសមត្ថភាព និងប្រកបដោយឥរិយាបថជាអ្នកធ្វើអាជីវកម្ម ឬជាអ្នករកស៊ី និងជាអ្នកបម្រើសេវាសាធារណៈផងដែរ » ៕
ចែករំលែកព័តមាននេះ