រាជធានីភ្នំពេញ ៖ នៅលើសង្វៀនទូរទស្សន៍ CNC ថ្ងៃសៅរ៍ ទី២ មេសា ខានស្អែកនេះ ការប្រកួតប្រដាល់អន្តរជាតិរវាងកីឡាករកម្ពុជា-ថៃនឹងចាប់ផ្ដើមទៀតហើយ ។ ព្រំ វី មកពីក្លិបកងពលធំអន្តរាគមន៍លេខ៨ភ្នំទ្រព្យ
រាជធានីភ្នំពេញ ៖ នៅលើសង្វៀនទូរទស្សន៍ CNC ថ្ងៃសៅរ៍ ទី២ មេសា ខានស្អែកនេះ ការប្រកួតប្រដាល់អន្តរជាតិរវាងកីឡាករកម្ពុជា-ថៃនឹងចាប់ផ្ដើមទៀតហើយ ។ ព្រំ វី មកពីក្លិបកងពលធំអន្តរាគមន៍លេខ៨ភ្នំទ្រព្យ ត្រូវគេដាក់ឱ្យជួបប្រកួតជាមួយកីឡាករថៃឈ្មោះបល្ល័ងងិន ស.ចសាយបួ ក្នុងប្រភេទទម្ងន់៥៧គីឡូក្រាម និងកីឡាករសារឿន ចាន់ ជួបប្រកួតជាមួយកីឡាករថៃឈ្មោះភីតដាំ ឌួងចៃផ ក្នុងប្រភេទទម្ងន់៦០គីឡូក្រាម ។
បល្ល័ងងិន ស.ចសាយបួ ធ្លាប់មកប្រកួតនៅលើសង្វៀនស្រុកខ្មែរជាច្រើនលើករួចមកហើយ ប៉ុន្តែមិនដែលជួបព្រំ វីទេ ។ ព្រំ វី ធ្លាប់ប្រកួតបាន៦២លើក ឈ្នះ៤១លើក ចាញ់១៨លើក ស្មើ៣លើក និងធ្លាប់ផ្ដួលគូប្រកួតឱ្យសន្លប់បាន១១លើក ។ ចំណែកកីឡាករថៃធ្លាប់ប្រកួតបាន៧៤ដង ឈ្នះ៥០លើក ចាញ់២០លើក ស្មើ៤លើក។ តាមការសង្កេតការប្រកួតកន្លងមក ព្រំ វី មានផ្លែកែងនិងជង្គង់ល្អគួរសមគ្រាន់តែចលនាវាយចេញរាងយឺតយ៉ាវបន្តិច ឯចិត្តក៏មិនសូវជាសឿងប៉ុន្មានដែរ ។ ប៉ុន្តែសម្រាប់ការមកជួប បល្ល័ងងិន ស.ចសាយបួ លើកនេះ ប្រហែលជាមិនអីឡើយ ដោយសារអ្នកប្រដាល់ថៃរូបនេះមានសមត្ថភាពមិនខ្លាំងក្លាប៉ុន្មានទេទាំងស្នៀតកែង និងជង្គង់មិនលើសព្រំ វី ឡើយ ។ ចាំមើលព្រំ វី អាចផ្ដួលអ្នកប្រដាល់ថៃរូបនេះបានឬអត់ ។
សារឿន ចាន់ ដែលត្រូវជួបប្រកួតជាមួយ ភីតដាំ ឌួងចៃផ លើកនេះក៏មិនទាន់ដឹងថាយ៉ាងណានោះដែរ ។ អ្នកប្រដាល់ថៃរូបនេះ មិនធ្លាប់មកប្រកួតនៅស្រុកខ្មែរទេ ទើបគេពិបាកប៉ាន់ស្មានពីសមត្ថភាពមិនដឹងថាខ្លាំងប៉ុនណា ។ សារឿន ចាន់ ធ្លាប់ប្រកួតបាន៩៣ដង ឈ្នះ៦៩ដង ចាញ់២០ដង ស្មើ៤ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១៧ដង ។ ចំណែកកីឡាករថៃ វិញធ្លាប់ប្រកួតបាន៩១ដង ឈ្នះ៦៥ដង ចាញ់២១ដង ស្មើ៥ដង ។ ដូច្នេះបើផ្អែកទៅលើប្រវត្តិប្រកួតរវាងពួកគេទាំង២អាចស៊ីសងគ្នាបាន ដូច្នេះសម្រាប់ការប្រកួតលើកនេះអត់ទាន់មានអ្នកណាហ៊ានទាយទុកមុនពីលទ្ធផលចុងក្រោយទេ មានតែរង់ចាំអ៊ុតមើលលើការប្រកួតជាក់ស្ដែងប៉ុណ្ណោះ ។
ចំណែកគូប្រកួតមិត្តភាពវិញមានកីឡាករ ខុន បូឡា មកពីក្លិបកងពលធំអន្តរាគមន៍លេខ៨ភ្នំទ្រព្យ ប្រកួតជាមួយកីឡាករតាំង សីហា មកពីក្លិបកងពលតូចលេខ៧០ និងកីឡាករ សេក គឹមរួន មកពីក្លិបអង្គរមានជ័យខេត្តសៀមរាប ប្រកួតជាមួយកីឡាករ សោម វិឆ័យ មកពីក្លិបកងពលតូចលេខ៧០ ៕
ចែករំលែកព័តមាននេះ