រាជធានីភ្នំពេញ ៖ សូរិយា គឺជាផ្សារទំនើបដំបូងគេនៅកម្ពុជា បានបោះទុនបន្ថែមសម្រាប់កែលម្អឱ្យមានសោភ័ណភាព និងទាក់ទាញប្រជាពលរដ្ឋនៅរាជធានីភ្នំពេញ និងទៅជាកន្លែងទាក់ទាញទេសចរណ៍មួយក្នុងរាជធានីភ្នំពេញផងដែរ ។ ទន្ទឹមនឹងការកែលម្អផ្សារទំនើបនេះដែរ សូរិយាក៏នឹងត្រូវប្តូរឈ្មោះពីផ្សារទំនើបសូរិយា ទៅជាសូរិយា សេនធ័រ ភ័នធ៍ ដែលនឹងបែងចែកប្រភេទទំនិញទៅតាមជាន់នីមួយៗ ។
នៅក្នុងសន្និសីទសារព័ត៌មានកាលពីព្រឹកថ្ងៃទី២៩ មីនា លោក ឆារស៍ វ៉ាន់ តំណាងភាគហ៊ុនិកនៃសូរិយា សេនធ័រ ភ័នធ៍ បានឱ្យដឹងថា ៖ « កាលពីមុន ផ្សារទំនើបសូរិយា គឺជាផ្សារទំនើបធំ និងទំនើបជាងគេនៅកម្ពុជា តែនៅពេលនេះផ្សារទំនើបសូរិយាលែងជាផ្សារទំនើបធំ និងទំនើបជាងគេទៀតហើយ ដែលតម្រូវឱ្យភាគហ៊ុនិកត្រូវកែប្រែដើម្បីទាក់ទាញអតិថិជនដដែល ។ ក្នុងរយៈពេលជាង១០ឆ្នាំមកហើយដែលផ្សារទំនើបសូរិយាបានបើកដំណើរការ ដូច្នេះហើយវាលែងជាផ្សារទំនើបធំជាងគេទៀតហើយ ពីព្រោះអី ដោយសារតែសេដ្ឋកិច្ចរបស់កម្ពុជាបានកើនឡើងជាលំដាប់ ដែលធ្វើឱ្យផ្សារទំនើបជាច្រើនបានកកើតឡើង និងធំៗជាងផ្សារទំនើបសូរិយា ។ ទាំងនេះ គឺជាកត្តាដែលធ្វើឱ្យយើងត្រូវកែប្រែផ្សារនេះឡើងវិញ ហើយទន្ទឹមនឹងការកែប្រែនេះដែរ ផ្សារទំនើបសូរិយា ក៏ត្រូវបានប្តូរឈ្មោះទៅជា សូរិយា សេនធ័រ ភ័នធ៍ ផងដែរ » ។
លោកបន្តថា ៖ « ក្នុងការកែប្រែ និងប្តូរឈ្មោះនេះ ក្រុមហ៊ុនត្រូវចំណាយប្រាក់ប្រមាណ ៥លានដុល្លារអាមេរិក ហើយនឹងចាប់ផ្ដើមសាងសង់ និងជួសជុលនៅដើមខែឧសភាខាងមុខនេះ ហើយរំពឹងថា នឹងបញ្ចប់នៅចុងឆ្នាំ២០១៦ » ។
លោក ត្រាក់ ថៃសៀង អភិបាលរងរាជធានីភ្នំពេញ បានមានប្រសាសន៍ថា ៖ « វត្តមានរបស់ផ្សារទំនើបសូរិយា គឺជាការរួមចំណែកមួយយ៉ាងសំខាន់ដែលធ្វើឱ្យរាជធានីភ្នំពេញទទួលបាននូវសមិទ្ធផលរហូតមកដល់សព្វថ្ងៃនេះ ។ ខ្ញុំសូមកោតសរសើរដល់គណៈគ្រប់គ្រង ក៏ដូចជាក្រុមការងាររបស់ផ្សារទំនើបសូរិយា ដែលបច្ចុប្បន្នបានផ្លាស់ប្តូរទៅជា សូរិយា សេនធ័រ ភ័នធ៍ ។ វាជាជំហានថ្មីមួយទៀតក្នុងការកែប្រែមុខមាត់ថ្មីនៃវិស័យផ្សារទំនើប ក៏ដូចជាការចូលរួមចំណែកលើកស្ទួយវប្បធម៌ និងកិត្យានុភាពរបស់ប្រទេសកម្ពុជា ជាព្រះរាជាណាចក្រអច្ឆរិយ » ។
នៅក្នុងឱកាសនោះដែរ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម ក៏បានមានប្រសាសន៍ដែរថា ៖ « កំណើនសេដ្ឋកិច្ចរបស់កម្ពុជា ក្នុងរយៈពេលប៉ុន្មានឆ្នាំកន្លងមកនេះ ពឹងផ្អែកទៅលើវិស័យចំនួន៤សំខាន់ៗ រួមមាន វាយនភណ្ឌ ទេសចរណ៍ សំណង់ និងកសិកម្ម ។ ប៉ុន្តែការដែលពឹងផ្អែកលើវិស័យទាំងបួននេះយូរពេក គឺមិនអាចរក្សាបាននូវកំណើនសេដ្ឋកិច្ចកម្ពុជាបានទេ ។ ដូចនេះ រដ្ឋាភិបាលបានធ្វើពិពិធកម្ម ជំរុញឱ្យមានវិស័យផ្សេងៗទៀត ដូចជាការកែច្នៃម្ហូបអាហារ ជាពិសេស វិស័យសេវាកម្មនេះតែម្ដង » ។
លោកជំទាវមានប្រសាសន៍បន្តថា ៖ « ការកែលម្អផ្សារទំនើបសូរិយានាពេលនេះ នឹងចូលរួមចំណែកបង្កើតការងារជូនដល់បងប្អូនប្រជាពលរដ្ឋកម្ពុជា ជាពិសេស នឹងចូលរួមចំណែកក្នុងការលើកកម្ពស់កំណើនសេដ្ឋកិច្ច និងជួយជំរុញកំណើនសេដ្ឋកិច្ចឱ្យនៅតែមានស្ថិរភាពជាបន្តទៀត » ។
គួរបញ្ជាក់ថា សូរិយា សេនធ័រ ភ័នធ៍ ដែលផ្លាស់ឈ្មោះមកពីផ្សារទំនើបសូរិយា នឹងបែងចែកប្រភេទទំនិញទៅតាមជាន់នីមួយៗ ដូចជា ជាន់ផ្ទាល់ដី គឺជាកន្លែងលក់ផលិតផលម៉ាកល្បីៗក្នុងស្រុក និងក្រៅស្រុក ហើយក៏មានភោជនីយដ្ឋាន ហាងលក់គ្រឿងអលង្ការ គ្រឿងសម្អាង ផ្សារទំនើប និងធនាគារផងដែរ។ ចំណែកជាន់ទី១ ជាកន្លែងលក់គ្រឿងប្រើប្រាស់សម្រាប់នារី ដូចជា សម្លៀកបំពាក់ កាបូប ស្បែកជើង ជាដើម ។ រីឯជាន់ទី២ ជាកន្លែងលក់គ្រឿងប្រើប្រាស់សម្រាប់បុរស និងកុមារ ព្រមទាំងមានមណ្ឌលកម្សាន្តសម្រាប់កុមារផងដែរ ។ សម្រាប់ជាន់ទី៣ ជាកន្លែងលក់គ្រឿងអេឡិចត្រូនិក ។ នៅជាន់ទី៤ ជាកន្លែងអាហារដ្ឋាន និងផ្សារទេសចរណ៍ ក្នុងគោលបំណងជំរុញផ្សព្វផ្សាយវប្បធម៌ សិល្បៈ និងផលិតផលទាំងឡាយរបស់ខ្មែរ ។ រីឯជាន់ទី៥វិញ មានរោងភាពយន្ត និងមណ្ឌលកម្សាន្ត ព្រមទាំងបន្ថែមឱ្យមាននូវក្លិបហាត់ប្រាណ ស្ទីម និងសោណាផងដែរ ៕
ចែករំលែកព័តមាននេះ