រាជធានីភ្នំពេញ ៖ ក្មេងស្រីអាយុ១៥ឆ្នាំម្នាក់ត្រូវឃាតកររំលោភសម្លាប់កាលពីថ្ងៃទី៧ ខែកុម្ភៈ ឆ្នាំ២០១៦ នៅមាត់ទន្លេភូមិទួលរការ សង្កាត់ចាក់អង្រែក្រោម ខណ្ឌមានជ័យ ពេលនេះសមត្ថកិច្ចចាប់ខ្លួនឃាតករបាន ។
សមត្ថកិច្ចនគរបាលខណ្ឌមានជ័យបានឲ្យដឹងថា ជនសង្ស័យឈ្មោះ ដាង យ៉ាំងដូ ហៅរីដូ ភេទប្រុស អាយុ២១ឆ្នាំ ជាជនជាតិវៀតណាម មុខរបរជាងបាញ់ថ្នាំតុទូ ស្នាក់នៅផ្ទះលេខ២១៩អា ផ្លូវលំមាត់ទន្លេបាសាក់ ក្នុងភូមិគោករការ សង្កាត់ចាក់អង្រែក្រោម ខណ្ឌមានជ័យ ត្រូវបានសមត្ថកិច្ចចាប់ខ្លួនបាននៅចំណុចភូមិសា ឃុំឌិន ស្រុកគីរីវង្ស ខេត្តតាកែវ កាលពីរសៀលថ្ងៃទី២៧ ខែមីនា ឆ្នាំ២០១៦ ពីបទរំលោភសម្លាប់ ។ ការចាប់ខ្លួននេះធ្វើឡើងក្រោមកិច្ចសហការរវាងកម្លាំងនគរបាលខណ្ឌមានជ័យ, កម្លាំងការិយាល័យព្រហ្មទណ្ឌកម្រិតធ្ងន់ នៃនាយកដ្ឋានព្រហ្មទណ្ឌ ក្រសួងមហាផ្ទៃ, កម្លាំងនគរបាលខេត្តតាកែវ, កម្លាំងនគរបាលស្រុកគីរីវង្ស និងកម្លាំងនគរបាលវរសេនាតូចលេខ៦០៣ ។
សូមបញ្ជាក់ថា ថ្ងៃចូលឆ្នាំចិនក្មេងស្រីអាយុ១៥ឆ្នាំម្នាក់ទៅលេងផ្ទះឪពុកមា ក៏ត្រូវជនដៃដល់មានគ្នា៣នាក់ល្បួងទៅលេងវាលខ្សាច់ក្រោយវត្តចាក់អង្រែរួចចាប់រំលោភបូក ហើយវាយសម្លាប់បណ្តែតទឹកទន្លេបាសាក់ បង្កឱ្យភ្ញាក់ផ្អើលកាលពីវេលាម៉ោង០៨ និង៣៥នាទីយប់ថ្ងៃទី៧ ខែកុម្ភៈ ស្ថិតនៅវាលខ្សាច់ក្រោយវត្តចាក់អង្រែ ក្នុងភូមិគោករការ ផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ ។ ប្រភពឱ្យដឹងថា ក្មេងស្រីរងគ្រោះឈ្មោះ ជួប ស្រីពៅ អាយុ១៥ឆ្នាំ ជាជនជាតិវៀតណម ស្នាក់នៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ មានបងប្អូន៣នាក់ (ស្រី២) ក្មេងស្រីរងគ្រោះជាកូនទី២ ៕
ចែករំលែកព័តមាននេះ