រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃ ២៥មីនា បានប្រកាសសាលក្រមផ្តន្តាទោស លើចាងហ្វាងកាសែតម្នាក់ដាក់ពន្ធនាគារកំណត់៤ខែ
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃ ២៥មីនា បានប្រកាសសាលក្រមផ្តន្តាទោស លើចាងហ្វាងកាសែតម្នាក់ដាក់ពន្ធនាគារកំណត់៤ខែ តែទោសនេះតម្រូវឲ្យព្យួរសាកល្បងទាំងអស់ គ្រាន់តែពិន័យជាប្រាក់ចំនួន៨០ម៉ឺនរៀលចូលជាថវិការរដ្ឋ ។ សាលក្រមនេះបានចោទប្រកាន់ ១.បើកបរក្នុងស្ថានភាពស្រវឹង ២.អត់ពាក់មួកសុវត្ថិភាព និង៣.មធ្យោបាយធ្វើដំណើរ(ម៉ូតូ)គ្មានពាក់ស្លាកលេខ បទស្មើលនេះមានចែងក្នុងមាត្រា៧៧ ស្តីពីចរាចរផ្លូវគោក និងមាត្រា១០៧-១០៨ នៃក្រមព្រហ្មទណ្ឌ ។
ក្នុងសវនាការលោក សាន ប៊ុនធឿន អាយុ៤៤ឆ្នាំ មុខរបរជាចាងហ្វាងកាសែត ស្នេហាជាតិ និងជាប្រធានក្រុមផ្នែកយកព័ត៌មានរបស់គេហទំព័រ ខ្មែរអាយញូវ ដែលគេស្គាល់តាមរយៈសង្គមហ្វេសប៊ុក បានទទួលសារភាពនៅចំពោះមុខច្បាប់ នូវអ្វីដូចដែលខ្លួនបានប្រព្រឹត្ត ។ គួរបញ្ជាក់ថា កាលពីរសៀលថ្ងៃទី១០បានបង្ហាញមុខអ្នកកាសែតម្នាក់ ដែលជាប់ពាក់ពន្ធថា បានបើកបរក្នុងស្ថានភាពស្រវឹង ដោយជាតិអាល់កុលមានកម្រិតខ្ពស់លើដល់០.៦៤មីលីក្រាម ។ អ្នកកាសែតរូបនោះឈ្មោះសាន ប៊ុនធឿន ភេទប្រុស អា យុ៤៤ឆ្នាំ មានអាសយដ្ឋានស្នាក់ផ្ទះជួលមុខផ្សារទំនើប អ៊ីអន តាមបណ្តោយមហវិថីសុធារស សង្កាត់តទន្លេរបាសាក់ ខណ្ឌចំការមន រាជធានីភ្នំពេញ ។
លោកវរៈសេនីយ៍ឯក ចេវ ហាក់ នាយការិយាល័យនគរបាលចរាចរផ្លូវគោករាជធានីភ្នំពេញ បានថ្លែងឲ្យដឹងថាសមត្ថ កិច្ច បានឃាត់ខ្លួនអ្នកកាសែតម្នាក់នេះគីអនុវត្តតាមច្បាប់ចរាចរផ្លូវគោក ។ មូលហេតុ ដែលនាំឲ្យមានការឃាត់ខ្លួនអ្នកកាសែតរូបនោះ កាលពីយប់ថ្ងៃទី៩មីនា លោកសាន ប៊ុនធឿន និងដៃគូម្នាក់ទៀតបានជិះម៉ូតូម៉ាក PCX គ្មានពាក់ស្លាកលេខ មិនពាក់មួកសុវត្ថិភាព ដែលច្បាប់ចរាចរហាមឃាត់ ត្រូវបានសមត្ថកិច្ចដាក់ប៉ុស្តិ៍ឆែកជាតិអាល់កុល កញ្ចក់ មួកសុវត្ថិភាព នៅតាមណ្តោយផ្លូវជាតិ៤ ម្តុំភូមិកំបូល ក្នុងខណ្ឌពោធិ៍សែនជ័យ ។ ពេលសមត្ថកិច្ចឃាត់ខ្លួន ឈ្មោះ សាន ប៊ុនធឿន ពិនិត្យទៅឃើញជាតិអាល់កុលមានកំរិត០.៦៤មីលីក្រាមក្នុងមួយ លីត្រខ្យល់ ។ ពេលសមត្ថកិច្ចពិនិត្យឃើញលោក សាន ប៊ុន ធឿន បើកបរក្នុងស្ថានភាពមានជាតិអាកុលលើសការកំណត់ សមត្ថកិច្ចក៏ឃាត់ខ្លួននាំទៅកាន់ការិយាល័យចរារចរផ្លូវគោក ដើម្បីអនុវត្តតាមច្បាប់ ។
ក្រោយពេលឃាត់ខ្លួនលោក សាន ប៊ុនធឿន ស្រាប់តែការិយាល័យចរាចរផ្លូវគោក ទទួលបានព័ត៌មានថាលោក សាន ប៊ុនធឿន ជាចាងហ្វាងកាសែត ស្នេហាជាតិ និងជាប្រធានក្រុមផ្នែកយកព័ត៌មានរបស់គេហទំព័រ ខ្មែរអាយញូវ និងត្រូវបានគេស្គាល់លើបណ្តាញសង្គមហ្វេសប៊ុក ថា មានជាប់ពាក់ព័ន្ធ និងប្រើពាក្យសម្ដីជេរ ប្រមាថអសីលធម៍ លើថ្នាក់ដឹកនាំជាន់ខ្ពស់ទៀតផង ។ ក្រោយពីបង្ហាញមុខអ្នកកាសែត ដែលបើកបរដោយមានជាតិអាល់កុលលើសការកំណត់ចប់ទៅ នគរបាលចរផ្លូវគោកបានបញ្ជូនអ្នកកាសែតរូបនោះ ទៅកាន់សាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការ ធ្វើការសាកសួរ ដែលសំណុំរឿងនេះ ស្ថិតនៅលើដៃលោក គុជ គឹមឡុង ព្រះរាជអាជ្ញារង តំណាងអយ្យការអមសាលាដំបូង ។ ក្រោយពីសាកសួររសៀលថ្ងៃដដែលនៅមិនទាន់ចប់ទេ លោក សាន ប៊ុន ធឿន បានផ្ញើទៅសមត្តកិច្ច១យប់ទៀត ដែលយប់ទី២នោះទំនងលោកសាន ប៊ុនធឿន ស្វាងស្រវឹងហើយ បានធ្វើលិខិតសុំទោសទៅលើថ្នាក់ដឹកនាំដែលខ្លួនបានជេរប្រមាថ ។
លុះព្រឹកថ្ងៃទី១១មីនា សមត្ថកិច្ចនគរបាលការិយាល័យចរាចរជើងគោក បាននាំឈ្មោះ សាន ប៊ុនធឿន ទៅសាកសួរម្តងទៀត ក្រោយពីសាកសួរចប់សព្វគ្រប់ហើយ តំណាងអយ្យការបានធ្វើការចោទប្រកាន់បទល្មើសស្តីពីច្បាប់ចរាចរផ្លូវគោកត្រឹមត្រូវតាមកំណត់ច្បាប់ ប៉ុន្តែមិនឃុំខ្លួនទេ គ្រាន់តែតម្រូវឲ្យតម្កល់ប្រាក់មួយចំនួន ហើយបានអនុញ្ញាតឲ្យទៅផ្ទះវិញ ។ បានជានៅថ្ងៃទី ២៥ មីនា សាលាដំបូងកំណត់បើកសវនាការលើសំណុំរឿងនេះ និងបានប្រកាសសាលក្រមផ្តន្ទាទោសកំណត់៤ខែ តែទោសនេះត្រូវព្យួរ គ្រាន់ពិន័យជាប្រាក់ចូលថវិការដ្ឋចំនួន៨០ម៉ឺនរៀលតែប៉ុណ្ណោះ ។
ចែករំលែកព័តមាននេះ