ខេត្តស្ទឹងត្រែង ៖ បន្ទាប់ពីរងនូវឥទ្ឌិពលខ្យល់ព្យុះដែលបណ្តាលអោយមានការធ្លាក់ភ្លៀងរាយប៉ាយគ្របដណ្តប់នៅទូទាំងខេត្ត និងតំបន់ខាងលើ ស្រុកសេសានជាស្រុកមួយជាប់នឹងទន្លេសេសានបានរងផលប៉ះពាល់ដោយជំនន់ទឹកភ្លៀង បណ្តាលអោយខូចខាតហេដ្ឋារចនាសម្ព័ន្ធ និងលិចលង់ផលដំណាំមួយចំនួនផងដែរ ។
ក្រោយភ្លៀងធ្លាក់ជោគជាំ ស្ថានភាពទឹកបានជនលិចភូមិឋាន ដីស្រែចម្ការ ផ្ទះសម្បែងរបស់ប្រជាពលរដ្ឋ នៅភូមិក្របីជ្រុំ ឃុំក្បាលមាស និងភូមិស្វាយរៀង ភូមិក្រឡាពុះ ឃុំតាឡាត ស្រុកសេសាន ។
ជាមួយគ្នានេះលោក ជា ថាវរិទ្ធ អភិបាលរងខេត្តបានស្នើរឲ្យអាជ្ញាធរស្រុកចុះពិនិត្យ និងស្រង់ស្ថិតិគ្រួសារបងប្អូនប្រជា ពលរដ្ឋដែលទទួលគ្រោះដោយជំនន់ទឹកភ្លៀងឲ្យបានជាក់លាក់ច្បាស់លាស់និងឲ្យលឿនបំផុត ដើម្បីរៀបចំនៅសម្ភារៈស្បៀងអាហារមកចែកជូនពួកគាត់ឲ្យទាន់ពេលវេលា ។
លោកអភិបាលរងខេត្តបញ្ជាក់បន្ថែមថា លោកមេភូមិ មេឃុំ នៅក្នុងតំបន់ដែលមានការលិចលុង ត្រូវមានស្មារតី និងឆន្ទះទទួល ខុសត្រូវឲ្យបានខ្ពស់ក្នុងការចុះពិនិត្យមើលពីសុខទុក្ខរបស់ប្រជា ពលរដ្ឋដោយផ្ទាល់ មិនថា ពលរដ្ឋដែលរងការលិចលុងនោះទេ អស់លោកគួរពិនិត្យមើលពលរដ្ឋដែលមានភាពលំបាកខ្វះខាត និងចាស់ជរា គ្មានទីពឹង ត្រូវរាយការណ៍ជូនស្រុកមកខេត្ត ដើម្បីស្រុកខេត្តរៀបចំនាំអំណោយចែកជូនដល់ពួកគាត់ ។
លោក សុវណ្ណ ពិសេដ្ឋ អភិបាលស្រុកសេសានអោយដឹងថា បច្ចុប្បន្ននេះស្ថានភាពទឹកបានស្រកថយចុះបន្តិចវិញហើយ ប៉ុន្តែលំនៅឋានក្នុងភូមិមួយចំនួនទឹកមិទាន់ស្រកផុតទេ ហើយស្រែ ស្រូវផលដំណាំដែលបានលិចលុង ទទួលរងការខូចខាតច្រើន ជាពិសេសតំបន់ទំនាបនិងតំបន់តាមមាត់អូរ មាត់ព្រែក ជាដើម ។
លោកអភិបាលស្រុកបានបន្តថា នៅក្នុងឃុំក្បាលរមាស និងឃុំតាឡាត មានភូមិចំនួន៣ ដែលប្រជាពលរដ្ឋរងផលប៉ះពាល់មានចំនួន២១៤គ្រួសារដីស្រែដែលទឹកបានជន់លិចមានចំនួនសរុប ២៤៥ហិកតា ផ្ទៃដីចម្ការ ៤២ហិកតា ប៉ះពាល់ ផ្លូវក្រោះក្រហមប្រវែងសរុប៣០៨០ម៉ែត្រ ស្ពានចំនួន៣ លូ ចំនួន៣និងប៉ះពាល់ផ្ទះចំនួន៧១ខ្នង ។
លោក ទុំ នីរ៉ូ ប្រធានមន្ទីរកសិកម្មរុក្ខាប្រម៉ាញ់ និងនេសាទខេត្តបានឲ្យដឹងថា ចំពោះផលដំណាំរបស់ប្រជាពលរដ្ឋដែលទទួលរងការខូចខាតដោយសារជំនន់ទឹកភ្លៀងនាពេលនេះ មន្ទីរបានចុះពិនិត្យវាយតម្លៃជាក់ស្ដែងនៅពេលទឹកស្រកចុះអស់ ហើយនិងផ្ដល់ពូជជូនពួកគាត់តាមរដូវដែលអាចដាំដុះ ។
លោកបន្តថា ចំពោះដំណាំស្រូវ វាអាចផុតរដូវ និងធ្វើការសាបព្រោះ ដកស្ទូងហើយ ដោយសារដូវភ្លៀងអាច និងផុតដូចនេះ ខាងមន្ទីរ និងចុះពិនិត្យទីតាំងភូមិសាស្ត្ររបស់ប្រជាពលរដ្ឋនៅពេលទឹកស្រកអស់ ដើម្បីជួយផ្ដល់បច្ចេកទេស ក្នុងដាំដុះឲ្យត្រូវនិងរដូវកាលនិងអាចទទួលផលល្អ ។
ប្រជាពលរដ្ឋ ដែលរងគ្រោះដោយជំនន់ ទឹកភ្លៀងខាងលើបានសម្ដែងការសោកស្ដាយនៅដំណាំស្រូវ ដែលបង្កបង្កើនបានទៅផលហើយ និងខ្លះស្ទើរនឹងបានច្រូតកាត់ទៅហើយ ខ្លះក៏មិនទាន់បានច្រូតផង ពេលនេះត្រូវរងការខូចខាតអស់គ្មានសល់ ដោយគ្រោះមហន្តរាយនៃគ្រោះធម្មជាតិបានជន់លិចលុងអស់ ៕
ចែករំលែកព័តមាននេះ