ការមានផ្ទៃពោះ គឹជាពេលវេលាដែលស្រ្តីត្រូវថ្នមខ្លួនជាងគេ ដោយសារតែអ្វីដែលគាត់ធ្វើនឹងមានការប៉ះពាល់ទៅដល់កូននៅក្នុងផ្ទៃ។ ថ្ងៃនេះ អ្នកនឹងបានស្គាល់សកម្មភាព៣យ៉ាង ដែលធ្វើឱ្យមានភាពមិនល្អដល់ទារកនៅក្នុងផ្ទៃ។
១. ទទួលទានផ្អែមៗពេក
ការទទួលទានអាហារ ឬភេសជ្ជៈផ្អែមច្រើនពេក គឺមិនល្អសោះឡើយសម្រាប់សុខភាពមនុស្សគ្រប់រូប ជាពិសេសស្ត្រីមានផ្ទៃពោះ។ យោងតាមការសិក្សាស្រាវជ្រាវមួយបានបង្ហាញថា ស្ត្រីជាម្ដាយដែលទទួលទានអាហារមានផ្ទុកជាតិស្ករខ្ពស់ ឬភេសជ្ជៈផ្អែមច្រើន កំឡុងពេលមានផ្ទៃពោះ អាចបណ្ដាលឱ្យទារកជួបប្រទះបញ្ហាពាក់ព័ន្ធនឹងការចងចាំ។
២. ទទួលទានជាតិកាហ្វេអ៊ីនច្រើន
ការទទួលទានអាហារ ឬភេសជ្ជៈមានផ្ទុកជាតិកាហ្វេអ៊ីនច្រើន គឺមិនល្អឡើយចំពោះសុខភាព។ ស្ត្រីមានផ្ទៃពោះមិនគួរទទួលទានអាហារ ឬភេសជ្ជៈ មានផ្ទុកជាតិកាហ្វេអ៊ីនលើសពី ៣០០មីលីក្រាមក្នុងមួយថ្ងៃ ឬច្រើនជាងនេះឡើយ! នោះក៏ព្រោះតែជាតិកាហ្វេអ៊ីនអាចនឹងចូលទៅដល់ក្នុងសុក ហើយជ្រៀតចូលក្នុងចរន្តឈាមហូររបស់ទារកក្នុងផ្ទៃ។
៣. ឈ្លោះប្រកែកគ្នា
ការឈ្លោះប្រកែកគ្នា អាចបង្កជំងឺថប់បារម្ភនិងធ្លាក់ទឹកចិត្ត ចំពោះស្ត្រីជាម្ដាយដែលអាចជះឥទ្ធិពលកាន់តែគួរឱ្យបារម្ភចំពោះទារកក្នុងផ្ទៃ។ បញ្ហាសុខភាពផ្លូវចិត្តរបស់ម្ដាយអាចបង្កគ្រោះថ្នាក់ដល់ខួរក្បាល និងប្រព័ន្ធភាពស៊ាំនៃទារកក្នុងផ្ទៃ។ លើសពីនេះទៅទៀត ការស្រែកជេរគ្នា ក៏មិនល្អចំពោះស្ត្រីជាម្ដាយផ្ទាល់ផងដែរ ដោយវាអាចនាំឱ្យឈឺក្បាល ចង្អោរចង់ក្អួត និងពិបាកគេងលក់៕
ចែករំលែកព័តមាននេះ