ទូរទស្សន៍បែលហ្ស៊ិក RTBF រាយការណ៍កាលពីថ្ងៃទី២៣ មីនា ថា ជនឈ្មោះ NAJIM LAACHRAOUI ត្រូវបានកំណត់ដឹងអត្តសញ្ញាណថាជាជនអត្តឃាតទី៣ ដែលធ្វើការវាយប្រហារភេរវកម្មនៅក្រុងព្រុចសែលកាលពីថ្ងៃទី២២ មីនា ។
ទូរទស្សន៍បែលហ្ស៊ិក RTBF រាយការណ៍កាលពីថ្ងៃទី២៣ មីនា ថា ជនឈ្មោះ NAJIM LAACHRAOUI ត្រូវបានកំណត់ដឹងអត្តសញ្ញាណថាជាជនអត្តឃាតទី៣ ដែលធ្វើការវាយប្រហារភេរវកម្មនៅក្រុងព្រុចសែលកាលពីថ្ងៃទី២២ មីនា ។
យោងតាម RTBF ថា NAJIM LAACHRAOUI បានធ្វើឱ្យផ្ទុះដំណាលគ្នានឹង IBRAHIM EL BAKRAOUI នៅព្រលានយន្តហោះក្រុងព្រុចសែលនាព្រឹកថ្ងៃទី២២ មីនា ។ ក៏ប៉ុន្តែព័ត៌មាននេះពុំទាន់ត្រូវអះអាងដោយអយ្យការសហព័ន្ធបែលហ្ស៊ិកនៅឡើយ ។
គួររំលឹកថា អយ្យការសហព័ន្ធបែលហ្ស៊ិកបានចេញរួចហើយ តាំងពីថ្ងៃទី២១ មីនា នូវសេចក្តីប្រកាសតាមចាប់ខ្លួន NAJIM LAACHRAOUI ជាជនសង្ស័យសំខាន់ម្នាក់ក្នុងចំណោមជនសង្ស័យវាយប្រហារភេរវកម្មនៅក្រុងប៉ារីស កាលពីថ្ងៃទី១៣ វិច្ឆិកា ឆ្នាំ២០១៥ ដែលជននេះប្រើប័ណ្ណសម្គាល់ខ្លួនក្លែងក្លាយបែលហ្ស៊ិកក្រោមឈ្មោះថាSOUFIANE KAYAL ។
ក្រុមអ្នកស៊ើបអង្កេតបានរកឃើញដាន NDA របស់ NAJIM LAACHRAOUI ក្នុងផ្ទុះជួលមួយនៅ AUVELAIS (បែលហ្ស៊ិក) ព្រមទាំងក្នុងផ្ទះល្វែងមួយនៅ SCHAERBEEK (បែលហ្ស៊ិក) ដែលផ្ទះទាំងនេះត្រូវបានប្រើដោយសាខាភេរវកម្មសង្ស័យនៅពីក្រោយការវាយប្រហារភេរវកម្មនៅក្រុងប៉ារីស និងក្រុងព្រុចសែល ។
NAJIM LAACHRAOUI កើតថ្ងៃទី១៨ ឧសភា ឆ្នាំ១៩៩១ ហើយចាកចេញទៅស៊ីរីក្នុងឆ្នាំ២០១៣ ដោយរូបគេត្រូវបានបណ្តាភ្នាក់ងារបែលហ្ស៊ិកស្គាល់រួចហើយ មួយរយៈកន្លងមក ។ RTBF គូសបញ្ជាក់ថា ជននេះសង្ស័យជាអ្នករៀបចំការវាយប្រហារភេរវកម្មនៅក្រុងប៉ារីសបណ្តាលឱ្យមនុស្សស្លាប់១៣០នាក់ ។
យោងតាមសេចក្តីជូនដំណឹងចុងក្រោយនានារបស់ភ្នាក់ងារសុខាភិបាលសាធារណៈបែលហ្ស៊ិកថា ការវាយប្រហារភេរវកម្មក្នុងព្រលានយន្តហោះក្រុងព្រុចសែល និងក្នុងស្ថានីយមេត្រូ MAALBEEK អ្នកស្លាប់មាន៣១នាក់ និងរបួស៣០០នាក់ ។
រដ្ឋអាជ្ញាបែលហ្ស៊ិកលោក FREDERIC VAN LEEUW អះអាងនាថ្ងៃទី២៣ មីនា ថា បងប្អូនត្រកូល EL BARKRAOUI ២នាក់ ជាអ្នកចូលរួមវាយប្រហារអត្តឃាតនៅព្រលានយន្តហោះក្រុងព្រុចសែល ត្រូវបានកំណត់អត្តសញ្ញាណដឹងតាមរយៈក្រយៅដៃរបស់ពួកគេ និងថាក្រុមអ្នកស៊ើបអង្កេតពេលធ្វើការលុកចូលឆែកឆេររកឃើញកុំព្យូទ័រយួរដៃមួយគ្រឿងរបស់ជនម្នាក់ក្នុងចំណោមអ្នកទាំង២ ។ ក្នុងកុំព្យូទ័រនេះមានផ្ទុកអ្វីដូចជាមរតកសាសន៍មួយ ។
បុរសទី៤ ដែលគេឃើញដើររួមគ្នាជាមួយ IBRAHIM EL BAKRAOUI និង LAACHRAOUI ក្នុងរូបភាពវីដេអូកាមេរ៉ាត្រួតពិនិត្យកំពុងរុញរទេះអីវ៉ាន់នៅព្រលានយន្តហោះ កំពុងតែគេចខ្លួន ហើយកំពុងត្រូវតាមរកយ៉ាងសកម្ម ។ ក្រុមអ្នកស៊ើបអង្កេតពុំទាន់អាចកំណត់អត្តសញ្ញាណគេដឹងនៅឡើយ ។ ថង់របស់គេមានដាក់គ្រឿងផ្ទុះច្រើន ផ្ទុះយឺតជាងការគ្រោងទុក ទើបអាចចៀសវាងតុល្យការធ្ងន់ធ្ងរបំផុត ។
ជនអត្តឃាតទាំង៣នាក់ ដែលវាយប្រហារនៅក្រុងព្រុចសែលសុទ្ធតែជាប់ទាក់ទិននឹងការវាយប្រហារភេរវកម្មនៅក្រុងប៉ារីស ក្រោយពេលកំណត់ដឹងអត្តសញ្ញាណ ។ ជនអត្តឃាត២នាក់ធ្វើឱ្យផ្ទុះនៅព្រលានយន្តហោះ ហើយម្នាក់ទៀតធ្វើឱ្យផ្ទុះក្នុងស្ថានីយមេត្រូ ៕
ចែករំលែកព័តមាននេះ