រាជធានីភ្នំពេញ ៖ ដើម្បីជំរុញផលិតផល និងសេវាកម្មរបស់សមាជិកខ្លួនឲ្យកាន់តែទូលំទូលាយនៅក្នុងទីផ្សារកម្ពុជានាពេលបច្ចុប្បន្ន ក៏ដូចជាទៅថ្ងៃអនាគត BNI CEO Chapterនឹងរៀបចំតាំងបង្ហាញផលិតផល
រាជធានីភ្នំពេញ ៖ ដើម្បីជំរុញផលិតផល និងសេវាកម្មរបស់សមាជិកខ្លួនឲ្យកាន់តែទូលំទូលាយនៅក្នុងទីផ្សារកម្ពុជានាពេលបច្ចុប្បន្ន ក៏ដូចជាទៅថ្ងៃអនាគត BNI CEO Chapterនឹងរៀបចំតាំងបង្ហាញផលិតផល និងសេវាកម្មរបស់ក្រុមហ៊ុនក្នុងស្រុកចំនួន៦០ នៅសណ្ឋាគារតារាអ៊ែរផត នាថ្ងៃទី២៦ មីនា ខាងមុខនេះ ដើម្បីផ្តល់ឱកាសក្នុងការស្វែងរកដៃគូអាជីវកម្ម ។
លោក សរ ឧត្តម ប្រធានគ្រប់គ្រងរៀបចំកម្មវិធីនៃក្រុមហ៊ុន Mango Rain និងជាសមាជិក BNI CEO Chapter បានឱ្យដឹងថា ៖ « នេះគឺជាលើកទីមួយហើយដែល BNI CEO Chapter រៀបចំតាំងបង្ហាញផលិតផល និងសេវាកម្មក្រុមហ៊ុនក្នុងស្រុកទាំង៦០ ដែលជាសមាជិករបស់ខ្លួន ក្នុងនោះប្រហែល៥០%ជាក្រុមហ៊ុនផ្តល់សេវាកម្ម ។ ការតាំងបង្ហាញផលិតផល និងសេវាកម្មរបស់ក្រុមហ៊ុនក្នុងស្រុកទាំង៦០នេះ នឹងធ្វើឡើងនៅសណ្ឋាគារតារាអ៊ែរផត ក្នុងគោលបំណងស្វែងរកដៃគូ និងអ្នកផ្គត់ផ្គង់ផលិតផលថ្មីដើម្បីធ្វើអាជីវកម្មក្នុងពេលបច្ចុប្បន្ន និងទៅថ្ងៃខាងមុខ ហើយម្យ៉ាងទៀត ក៏ចង់ផ្សព្វផ្សាយទៅអ្នកខាងក្រៅឱ្យបានដឹងថា អ្វីទៅជា BNI CEO ។ លើសពីនេះទៀត ម្ចាស់ក្រុមហ៊ុនដែលចូលរួមនៅពេលនោះ នឹងអាចបង្កើនទំនាក់ទំនងដោយផ្ទាល់ជាមួយសមាជិក BNI CEO Chapter ផងដែរ » ។
តំណាងក្រុមហ៊ុនភែរ៉ត លក់និងផ្តល់សេវាកម្មផ្នែកកុំព្យូទ័រ និងជាសមាជិករបស់ BNI CEO Chapter ក៏បានឲ្យដឹងដែរថា ៖ « កន្លងមក ក្រុមហ៊ុនយើងពុំដែលបានយកផលិតផលទៅតាំងបង្ហាញជូនអតិថិជនឱ្យស្គាល់នៅឡើយទេ គឺលក់តែក្នុងក្រុមហ៊ុនប៉ុណ្ណោះ ។ នៅក្នុងកម្មវិធីដែលរៀបចំឡើងដោយ BNI CEO Chapter នេះ យើងនឹងយកផលិតផលក្រុមហ៊ុនទៅចូលរួមតាំងបង្ហាញជូនអតិថិជនឱ្យបានស្គាល់ និងពង្រីកការទំនាក់ទំនងផងដែរ ដោយរំពឹងថា ម្ចាស់ក្រុមហ៊ុននឹងចាប់អារម្មណ៍ទៅលើផលិតផល ហើយខ្ញុំនឹងមានឱកាសពង្រីកអាជីវកម្មបានច្រើនជាងមុន » ។
លោកបន្តថា ៖ « បន្ទាប់ពីខ្ញុំបានចូលជាសមាជិករបស់ BNI CEO Chapter កាលពី២០១៣មក ឃើញថា រាល់ការលក់និងការផ្តល់សេវាកម្មជូនអតិថិជនបានកើនឡើងប្រហែល២០%ជារៀងរាល់ឆ្នាំ ។ ចំពោះការផ្តល់សេវាកម្ម គិតមកដល់សព្វថ្ងៃនេះ គឺមិនទាន់មានលក្ខណៈទូលំទូលាយនៅឡើយទេ ពីព្រោះយើងត្រូវពង្រីកការលក់ឱ្យកើនឡើងច្រើនជាងមុនបន្ថែមទៀត និងចង់ឲ្យអតិថិជនស្គាល់ក្រុមហ៊ុនកាន់តែច្រើន » ។
លោក សរ ឧត្តម លើកឡើងថា ៖ « BNI CEO Chapter នឹងព្យាយាមរកសមាជិកថ្មីបន្ថែមឲ្យកើនឡើងដល់៧០ក្រុមហ៊ុន ដើម្បីបង្កើនបណ្តាញទំនាក់ទំនង និងផ្តល់ប្រយោជន៍ដល់សមាជិក ។ ជាក់ស្តែង Mango Rain ជាក្រុមហ៊ុនដែលផ្តល់សេវាកម្មរៀបចំកម្មវិធីផ្សេងៗបន្ទាប់ពីចូលជាសមាជិករបស់ BNI CEO កាលពីឆ្នាំ២០១៤មក សម្រាប់ខ្ញុំផ្ទាល់យល់ឃើញថា កាលពីមុន ខ្ញុំចេញលក់ដោយខ្លួនឯង តែមកដល់ឥឡូវនេះ មិនចាំបាច់ចេញលក់ទៀតទេ គឺមានសមាជិកដូចគ្នានៅក្នុង BNI CEO ផ្តល់ព័ត៌មានជូនពីតម្រូវការរបស់អតិថិជន ។ កាលពីចុងឆ្នាំ២០១៥ ការងារដែលក្រុមហ៊ុនយើងទទួលបានពីសមាជិកមានប្រហែលជា៤០% បន្ថែមពីលើអាជីវកម្មដែលមានសព្វថ្ងៃនេះ ហើយការរីកចម្រើនរបស់សមាជិក វាអាស្រ័យទៅលើប្រភេទអាជីវកម្មផងដែរ » ៕
ចែករំលែកព័តមាននេះ