រាជធានីភ្នំពេញ ៖ យុវជន២ក្រុមនាំគ្នាទៅរាំធុងបាស់ក្នុងពិធីបុណ្យដារលានក្នុងភូមិ ឌឺដងដាក់គ្នាបង្កជាជម្លោះដេញវាយនិងគប់គ្នា បណ្តាលឱ្យបែកក្បាលម្នាក់និងគប់ត្រូវរថយន្តដឹកសំរាម
រាជធានីភ្នំពេញ ៖ យុវជន២ក្រុមនាំគ្នាទៅរាំធុងបាស់ក្នុងពិធីបុណ្យដារលានក្នុងភូមិ ឌឺដងដាក់គ្នាបង្កជាជម្លោះដេញវាយនិងគប់គ្នា បណ្តាលឱ្យបែកក្បាលម្នាក់និងគប់ត្រូវរថយន្តដឹកសំរាមក្រុមហ៊ុនស៊ិនទ្រីបែកកញ្ចក់១គ្រឿង កាលពីវេលាម៉ោង១១និង១៥នាទីយប់ថ្ងៃទី២៣ មីនា នៅផ្លូវ៣៧១ ភូមិត្នោតជ្រំ សង្កាត់បឹងទំពុន ខណ្ឌមានជ័យ ។
ជនរងគ្រោះខាងលើរូបនេះឈ្មោះ ហេង សីហា អាយុ២៥ឆ្នាំ ជាកម្មករថ្មម៉ាប ស្នាក់នៅក្នុងឃ្លាំង ភូមិត្នោតជ្រុំ សង្កាត់បឹងទំពុន ខណ្ឌមានជ័យ បាននិយាយថា មុនពេលកើតហេតុ ពួកគេមានគ្នា៥នាក់ បានទៅចូលរាំកម្សាន្តធុងបាសក្នុងពិធីបុណ្យដារលានក្នុងភូមិកើតហេតុខាងលើ ខណៈពេលដែលពួកគេកំពុងរាំហាក់បីដូចជាមានការឌឺដងដាក់គ្នាជាមួយក្រុមម្ខាងទៀត ដែលមានគ្នាជិត១០នាក់ ឃើញដូចនេះពួកគេគិតថាមិនស្រួលហើយ ក៍ដើរមកកន្លែងវិញ ស្រាប់តែភាគីម្ខាងដែលមានគ្នាជិត១០នាក់ ធ្វើសកម្មភាពដេញវាយពួកគេរហូតមកដល់មុខក្រុមហ៊ុន ហើយពួកគេទាំង៥នាក់ ធ្វើការតបតវិញដោយយកដុំថ្មម៉ាបគប់ទៅវិញទៅមក បណ្តាលឱ្យរូបគេរងរបួសបែកក្បាលហូរឈាមពេញខ្លួន ។ ភ្លាមៗនោះសមត្ថកិច្ចមូលដ្ឋាន ព្រមទាំងអាវុធហត្ថខណ្ឌមានជ័យ ចុះទៅដល់ក្រុមទាំង២រត់ចែកជើងគ្នាអស់ នៅសល់តែរូបគេម្នាក់រត់ទៅពូននៅក្នុង ផ្ទះកោសជប់នៅក្បែរនោះ ក៏ត្រូវសមត្ថកិច្ចឃាត់ខ្លួនបានតែម្ដងទៅ ។
ក្នុងហេតុការណ៍នោះដែរ រថយន្តដឹកសំរាមរបស់ក្រុមហ៊ុនស៊ិនទ្រី ដែលធ្វើដំណើរតាមផ្លូវ ក៍ត្រូវជនទាំង២ក្រុមគប់ដុំថ្មត្រូវបែកកញ្ចក់មុខចំហៀងខាងស្ដាំផងដែរ ។
ក្រោយពេលកើតហេតុ ជនរងគ្រោះត្រូវបានសមត្ថកិច្ចនាំខ្លួនទៅសាកសួរ និងអប់រំណែនាំ រួចក៍មានអ្នកមកធានាត្រឡប់ទៅផ្ទះវិញ ចំណែកខាងរថយន្តមិនបានដាក់ពាក្យបណ្ដឹងទេ ពីព្រោះរកអ្នកបង្កអត់ឃើញ ៕
ចែករំលែកព័តមាននេះ