រាជធានីភ្នំពេញ ៖ ការប្រកួតកីឡាអុកចត្រង្គអង្គរសង្ក្រាន្តឆ្នាំនេះសង្ឃឹមមានអ្នកចុះឈ្មោះចូលរួមប្រកួតច្រើនជាងមុន ។ នេះបើតាមការឱ្យដឹងពីលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា
រាជធានីភ្នំពេញ ៖ ការប្រកួតកីឡាអុកចត្រង្គអង្គរសង្ក្រាន្តឆ្នាំនេះសង្ឃឹមមានអ្នកចុះឈ្មោះចូលរួមប្រកួតច្រើនជាងមុន ។ នេះបើតាមការឱ្យដឹងពីលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាក្នុងឱកាសធ្វើសន្និសីទកាសែតនៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីថ្ងៃទី២២ មីនា កន្លងមកនេះ ។
លោក វ៉ាត់ ចំរើន បានបន្តឱ្យដឹងទៀតថា ការប្រកួតឆ្នាំនេះមានការបើកទូលាយដូចឆ្នាំមុន អ្នកណាក៏អាចមកចុះឈ្មោះចូលរួមប្រកួតបានដែរ ទាំងអ្នកអាជីពឬមិនអាជីពនៅទូទាំងរាជធានី-ខេត្ត ។ រហូតមកដល់ពេលនេះមានអ្នកមកចុះឈ្មោះចូលរួមប្រកួតជាង៦០នាក់ហើយ។ ទោះបីជាការទទួលពាក្យចូលរួមប្រកួតនឹងត្រូវបិទនៅត្រឹមថ្ងៃទី១ មេសា មែន ក៏លោកសង្ឃឹមថា រហូតដល់ពេលនោះនឹងមានអ្នកមកចុះឈ្មោះចូលរួមប្រកួតលើសពី១០០នាក់។សម្រាប់ការមកចុះឈ្មោះចូលរួមប្រកួតតម្រូវឱ្យបង់ប្រាក់វិភាគទានតែ៥០០០រៀលប៉ុណ្ណោះក្នុងម្នាក់ ខណៈប្រាក់រង្វាន់ជាបឋមនេះលេខ១ទទួលបាន១២លានរៀល លេខ២ទទួលបាន៨លានរៀល និងលេខ៣ទទួលបាន៤លានរៀល។ ការប្រកួតវគ្គជម្រុះដំបូងធ្វើឡើងចាប់ពីថ្ងៃទី៥ ដល់ថ្ងៃទី៨ មេសា ឆ្នាំ២០១៦ ហើយការប្រកួតផ្ដាច់ព្រ័ត្រធ្វើឡើងនៅថ្ងៃទី១៣ មេសា នៅមុខប្រាសាទអង្គរវត្ត ខេត្តសៀមរាប ។ ការប្រកួតវគ្គជម្រុះដំបូងយកតែ៨នាក់ប៉ុណ្ណោះសម្រាប់ឡើងទៅប្រកួតវគ្គបន្តនៅខេត្តសៀមរាប ដើម្បីស្វែងរកតំណែងស្ដេចអុកចត្រង្គអង្គរសង្ក្រាន្តប្រចាំឆ្នាំ២០១៦ ។
លោក វ៉ាត់ ចំរើន បានគូសបញ្ជាក់ថា ពីមួយឆ្នាំទៅមួយឆ្នាំអ្នកមកចុះឈ្មោះចូលរួមប្រកួតកីឡាអុកចត្រង្គកាន់តែច្រើនឡើងៗ ខណៈកីឡាមួយនេះកំពុងមានសកម្មភាពផុសផុលក្នុងស្រទាប់មហាជន ។ ម្យ៉ាងវិញទៀត ដើម្បីឱ្យល្បែងអុកមួយនេះប្រែក្លាយជាប្រភេទកីឡាអុកវិញនោះ គណៈកម្មការរៀបចំការប្រកួតបានខិតខំចងក្រងឱ្យមានក្បួនច្បាប់ត្រឹមត្រូវ ដើម្បីដាក់បញ្ចូលទៅក្នុងផែនការមេសម្រាប់ប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះ ។
លោកបានលើកឡើងអំពីប្រវត្តិកីឡាអុកចត្រង្គរបស់ខ្មែរយើងផងដែរថា ក្បួនអុករបស់ខ្មែរយើងមានប្រភពមកពីប្រទេសឥណ្ឌាដែលមានប្រវត្តិជាយូរលង់ណាស់មកហើយ និងត្រូវបានខ្មែរយើងយកមកបំលែងឱ្យទៅជារបស់ខ្មែរ ។ អុករបស់ខ្មែរមានលក្ខណៈខុសប្លែកពីអុកបរទេសត្រង់ក្បាច់ដើររបស់អុកខ្មែរមានលក្ខណៈស៊ីជម្រៅជាង ។ លោកបានឱ្យដឹងទៀតថា នៅប្រទេសគេ កីឡាអុកនេះត្រូវបានគេដាក់បញ្ចូលទៅក្នុងកម្មវិធីសិក្សារបស់សិស្សថ្នាក់មត្តេយ្យ ព្រោះថាបើកាលណាគេចេះលេងអុក គឺគេចេះគិតពិចារណាយ៉ាងខ្លាំងមុននឹងធ្វើអ្វីមួយ ។ ម្យ៉ាងវិញទៀត កាលណាក្មេងចេះលេងមើលទៅប្រៀបបាននឹងមនុស្សអាយុ២០ឆ្នាំអញ្ចឹងដែរ។ ក្បួនអុកមិនខុសពីក្បួនធ្វើសង្គ្រាមឡើយ ដែលកាលពីសម័យមុន មេទ័ពខ្មែរយើងបានយកក្បាច់ក្រឡាអុកទៅរៀបចំកងទ័ពធ្វើសឹកសង្គ្រាមជាមួយសត្រូវយ៉ាងមានប្រសិទ្ធភាពបំផុត ៕
ចែករំលែកព័តមាននេះ