រាជធានីភ្នំពេញ ៖ បញ្ហាបិទរោងម៉ាស៊ីនកិនស្រូវមួយចំនួននាពេលបច្ចុប្បន្ន វាមិនមែនមកពីការហូរចូលអង្ករពីប្រទេសជិតខាងតែម្យ៉ាងនោះទេ គឺមានកត្ដាជាច្រើន ដូចជាការហូរចេញស្រូវទៅក្រៅប្រទេសដោយគ្មានច្បាប់ទម្លាប់
រាជធានីភ្នំពេញ ៖ បញ្ហាបិទរោងម៉ាស៊ីនកិនស្រូវមួយចំនួននាពេលបច្ចុប្បន្ន វាមិនមែនមកពីការហូរចូលអង្ករពីប្រទេសជិតខាងតែម្យ៉ាងនោះទេ គឺមានកត្ដាជាច្រើន ដូចជាការហូរចេញស្រូវទៅក្រៅប្រទេសដោយគ្មានច្បាប់ទម្លាប់ និងការនាំអង្ករចេញត្រូវជាប់កាតព្វកិច្ចទាំងអស់ជាដើម ដែលជាកត្តារួមផ្សំធ្វើឲ្យម្ចាស់រោងម៉ាស៊ីនកិនស្រូវជួបផលវិបាក ហើយត្រូវផ្អាកដំណើរការខ្សែសង្វាក់ផលិតកម្មរបស់ខ្លួន ។ នេះបើតាមលោក តូច តែពេជ្រ នាយកគ្រប់គ្រងក្រុមហ៊ុន តូច តែពេជ្រ បានផ្តល់បទសម្ភាសន៍ជាមួយកោះសន្តិភាព ។
លោកបន្ដថា ៖ « ចំណុចសំខាន់ដែលត្រូវដោះស្រាយបន្ទាន់ក្នុងវិស័យស្រូវអង្ករ គឺការដួលរលំនៃរោងម៉ាស៊ីនកិនស្រូវមួយចំនួន ។ ធនាគារបានប្តឹងទៅតុលាការដើម្បីលក់ឡាយឡុងទ្រព្យសម្បតិ្តយកលុយសងទៅធនាគារវិញ ។ យើងគិតថា ពេលវិស័យស្រូវអង្ករដួលរលំបែបនេះ ប្រសិនបើយើងអំពាវនាវលក់ទ្រព្យសម្បត្តិ និងរោងម៉ាស៊ីន តើមានអ្នកណាគេមកទិញ ។ ដូចនេះ បញ្ហាដែលត្រូវដោះស្រាយ គឺត្រូវសុំពន្យារពេលសងរបស់ម្ចាស់រោងម៉ាស៊ីនទៅធនាគារ និងទាមទារការអន្តរាគមន៍ពីរាជរដ្ឋាភិបាលជាចាំបាច់ ។ បន្ទាប់ពីពន្យារពេលហើយ ត្រូវផ្តល់នូវឥណទានដើម្បីសិក្សាមើលថា តើការទទួលខុសត្រូវរបស់រាជរដ្ឋាភិបាលកម្រិតណា ហើយម្ចាស់រោងម៉ាស៊ីនកម្រិតណា និងត្រូវផ្តល់ឥណទានជួយស្រោចស្រង់ដល់រោងម៉ាស៊ីនទាំងអស់នោះឡើងវិញ » ។
លោកគូសបញ្ជាក់ថា ៖ « ខ្ញុំបានផ្អាកសកម្មទិញស្រូវ និងនាំអង្ករចេញទៅក្រៅប្រទេសតាំងពីពាក់កណ្តាលឆ្នាំ២០១៥មកម្ល៉េះ ដោយសារតែកង្វះដើមទុន ។ នៅចុងឆ្នាំ២០១៤ និងដើមឆ្នាំ២០១៥ ខ្ញុំបានចុះកុងត្រាទិញស្រូវពីកសិករ ប៉ុន្តែដោយសារតែការសងបង្វិលជូនពួកគាត់មិនបាន ទើបធ្វើឲ្យកសិករនាំគ្នាធ្វើបាតុកម្មដល់សាលាខេត្តជាច្រើនលើកច្រើនសា ទើបខ្ញុំសម្រេចចិត្តលក់ស្រូវអង្ករនៅក្នុងឃ្លាំង ដើម្បីយកប្រាក់ទៅសងកសិករវិញ បន្ទាប់មកក៏បានផ្អាកសកម្មភាពទិញចូល និងនាំចេញទៀត ដោយសារតែអត់មានទុនគ្រប់គ្រាន់ » ។
លោកបន្តថា ៖ « ដើម្បីបន្តនិរន្តរភាព និងមានសកម្មភាពដូចពេលមុនឡើងវិញ ក្រុមហ៊ុនយើងត្រូវថវិកាលើសពី១លានដុល្លារសម្រាប់ស្រោចស្រង់កសិករ សាងសង់ឃ្លាំង ទុនបង្វិលសម្រាប់ទិញស្រូវចូលនិងស្តុកទុក ទុនបង្វិលសម្រាប់ការនាំចេញទៅក្រៅប្រទេស ពីព្រោះរោងម៉ាស៊ីនរបស់យើងបានបំពាក់គ្រឿងបច្ចេកវិទ្យាទំនើបៗរួចរាល់ហើយ តែបញ្ហាប្រឈមចំពោះមុខនោះ គឺខ្វះដើមទុន » ។
លោកបន្ថែមថា ៖ « កន្លងមក ខ្ញុំបានផ្ញើលិខិតទៅខាងប្រធានសហព័ន្ធស្រូវអង្ករកម្ពុជា ប្រាប់ពីបញ្ហារបស់ខ្ញុំ និងដាក់លិខិតតាមរយៈសហព័ន្ធស្រូវអង្ករកម្ពុជាចូលទៅសម្តេចតេជោ ហ៊ុន សែន ដើម្បីសុំឲ្យសម្តេចជួយអន្តរាគមន៍ ដោយសុំការពន្យារពេលសងប្រាក់ទៅខាងធនាគារ និងសុំឥណទានបន្ថែម ។ លើសពីនេះទៀត យើងបានសុំប្តូរឥណទានដែលទទួលពីធនាគារអភិវឌ្ឍន៍ជនបទរយៈពេលខ្លី ទៅជាឥណទានរយៈពេលវែងវិញ ។ ប្រសិនបើការសម្រេចរបស់រាជរដ្ឋាភិបាលមិនបានទុនទេ យើងនឹងសុំការពន្យារសងត្រឡប់ទៅវិញ ដើម្បីរកវិធីលក់ឡាយឡុងទ្រព្យសម្បត្តិក្នុងរោងម៉ាស៊ីនសងទៅធនាគារ » ។
ប្រធានសហព័ន្ធស្រូវអង្ករកម្ពុជា លោក សុខ ពុទ្ធីវុធ បានថ្លែងក្នុងសន្និសីទសារព័ត៌មាន ស្តីពីផែនការដោះស្រាយបញ្ហាប្រឈមបន្ទាន់ក្នុងវិស័យស្រូវអង្ករកាលពីថ្មីៗនេះថា៖ « ជំហររបស់សហព័ន្ធស្រូវអង្ករកម្ពុជានៅតែរឹងមាំ ហើយអ្វីដែលយើងជួបប្រទះនាពេលបច្ចុប្បន្ននឹងធ្វើឲ្យយើងកាន់តែរឹងមាំ និងសាមគ្គីគ្នា »។
លោកបញ្ជាក់ថា ដើម្បីដោះស្រាយបញ្ហាសព្វថ្ងៃនេះ សហព័ន្ធស្រូវអង្ករកម្ពុជានឹងបង្កើតកម្មការដោះស្រាយបញ្ហាប្រឈមបន្ទាន់មួយសម្រាប់រកយន្តការជួយអន្តរាគមន៍ គឺ ៖
១-ដោះស្រាយបញ្ហានាំអង្ករចូលពីក្រៅប្រទេស ដែលធ្វើឲ្យប៉ះពាល់ដល់វិស័យស្រូវអង្ករកម្ពុជាទាំងមូល ជាពិសេស រោងម៉ាស៊ីនកិនស្រូវនាពេលបច្ចុប្បន្ន ។
២-នឹងរៀបចំចងក្រងនូវឯកសារពាក់ព័ន្ធដើម្បីដាក់សំណើទៅរាជរដ្ឋាភិបាលកម្ពុជា ក្នុងការពិនិត្យរកលទ្ធភាពផ្តល់នូវកញ្ចប់ឥណទានបន្ទាន់មួយចំនួន តាមរយៈធនាគារអភិវឌ្ឍន៍ជនបទ ក្នុងគោលបំណងជួយកាត់បន្ថយនូវបញ្ហាប្រឈមបន្ទាន់នេះសម្រាប់ជួយដល់រោងម៉ាស៊ីនកិនស្រូវ ។
ទាក់ទងនឹងកញ្ចប់ឥណទានដែលសហព័ន្ធស្រូវអង្ករកម្ពុជា ត្រូវការជួយសង្គ្រោះដល់រោងម៉ាស៊ីនកិនស្រូវនោះ ក្នុងជំហានដំបូងចាប់ពី២០ទៅ៣០លានដុល្លារ តាមលោក តូច តែពេជ្រ បានឲ្យដឹងថា ៖ « សម្រាប់ឥណទានចាប់ពី២០ទៅ៣០លានដុល្លារនេះ ខ្ញុំយល់ថា ចំនួននេះវាមិនសមាមាត្រនឹងទំហំនៃការខ្វះខាតនោះទេ។ តើមានរោងម៉ាស៊ីនប៉ុន្មាននៅស្រុកខ្មែរ ហើយត្រូវការឥណទានប៉ុន្មាន ទើបសមស្របនឹងតម្រូវការរបស់ម្ចាស់រោងម៉ាស៊ីនទាំងនោះ ? គឺយើងត្រូវការទំហំធំជាងនេះច្រើនដង ទើបអាចសង្គ្រោះបាន » ។
បញ្ហាដួលរលំនៃរោងម៉ាស៊ីនកិនស្រូវនេះ អនុប្រធានសហព័ន្ធស្រូវអង្ករកម្ពុជា លោកឧកញ៉ា ហ៊ុន ឡាក់ បានលើកឡើងថា៖« មកដល់សព្វថ្ងៃនេះ រោងម៉ាស៊ីនកិនស្រូវដែលបានផ្អាកដំណើរការមានប្រហែល៨ហើយ ភាគច្រើននៅតំបន់ផលិតស្រូវអង្ករខ្លាំងជាងគេ គឺខេត្តបាត់ដំបង » ។
គួរបញ្ជាក់ថា ក្នុងរយៈពេល២ខែដើមឆ្នាំ២០១៦នេះ ប្រទេសកម្ពុជាបាននាំចេញអង្ករទៅក្រៅប្រទេសចំនួន៩៥.៩៤៥តោន កើនឡើងជាង៣០% បើធៀបនឹងរយៈពេលដូចគ្នាកាលពីឆ្នាំ២០១៥ ៕
ចែករំលែកព័តមាននេះ