ខេត្តកំពត ៖ ជីបម៉ុង អិុនស៊ី ស៊ីមេន ខបផឹរ៉េសិន ជារោងចក្រផលិតស៊ីម៉ង់ត៍ដ៏ទំនើបនិងធំជាងគេ ដែលជាការវិនិយោគរួមគ្នារវាងក្រុមហ៊ុនជីបម៉ុង ស៊ីមេន គ្រុប និងក្រុមហ៊ុនស្យ៉ាមស៊ីធី ស៊ីមេន ផាប់ភ្លីក
ខេត្តកំពត ៖ ជីបម៉ុង អិុនស៊ី ស៊ីមេន ខបផឹរ៉េសិន ជារោងចក្រផលិតស៊ីម៉ង់ត៍ដ៏ទំនើបនិងធំជាងគេ ដែលជាការវិនិយោគរួមគ្នារវាងក្រុមហ៊ុនជីបម៉ុង ស៊ីមេន គ្រុប និងក្រុមហ៊ុនស្យ៉ាមស៊ីធី ស៊ីមេន ផាប់ភ្លីក ក្នុងទំហំទឹកប្រាក់ប្រមាណ២៦២លានដុល្លារអាមេរិក ត្រូវបានធ្វើពិធីបើកការដ្ឋានសាងសង់ ដែលគ្រោងនឹងចាប់ដំណើរការផលិតស៊ីម៉ង់ត៍សម្រាប់ផ្គត់ផ្គង់លើទីផ្សារនៅដើមឆ្នាំ២០១៨ខាងមុខ ។ រោងចក្រថ្មីនេះមានសមត្ថភាពផលិតស៊ីម៉ង់ត៍បានប្រមាណ៥ពាន់តោនក្នុងមួយថ្ងៃ ព្រមទាំងផ្ដល់ការងារជូនប្រជាពលរដ្ឋកម្ពុជារាប់ពាន់នាក់ថែមទៀត ។ នេះបើយោងតាមថ្នាក់ដឹកនាំជាន់ខ្ពស់របស់ក្រុមហ៊ុន ។
ថ្លែងនៅក្នុងពិធីបើកការដ្ឋានសាងសង់រោងចក្រផលិតស៊ីម៉ង់ត៍ជីបម៉ុង អិុនស៊ី ស៊ីមេន កាលពីព្រឹកថ្ងៃទី២១ មីនា លោកឧកញ៉ា លាង ឃុន អគ្គនាយកក្រុមហ៊ុនជីបម៉ុងគ្រុប បានឲ្យដឹងថា ៖ « រោងចក្រនេះ គឺជាការវិនិយោគរួមគ្នារវាងក្រុមហ៊ុនជីបម៉ុង ស៊ីមេនគ្រុប ដែលមានបទពិសោធន៍ក្នុងការនាំចូលនិងចែកចាយស៊ីម៉ង់ត៍ និងសម្ភារសំណង់ទូទាំងព្រះរាជាណាចក្រកម្ពុជាអស់រយៈពេល៣០ឆ្នាំ និងក្រុមហ៊ុនស្យ៉ាមស៊ីធី ស៊ីមេន ផាប់ភ្លីក ដែលជាក្រុមហ៊ុនមានបទពិសោធន៍ជាង៤០ឆ្នាំ ក្នុងការផលិតស៊ីម៉ង់ត៍ដ៏ធំជាងគេនៅក្នុងតំបន់អាស៊ាន » ។
លោកឧកញ៉ាបន្ដថា ៖ « កិច្ចសហប្រតិបត្តិការនេះ មានតម្លៃទឹកប្រាក់ប្រមាណ២៦២លានដុល្លារអាមេរិក ដែលក្រុមហ៊ុនជីបម៉ុង អិុនស៊ី ស៊ីមេន បានបោះទុនលើការកសាងរោងចក្រដ៏ធំនេះឡើង ដោយបានរៀបចំគម្រោងរោងចក្រផលិតស៊ីម៉ង់ត៍នៅលើផ្ទៃដីទំហំ១០៣ហិកតា ដែលគ្រោងនឹងបញ្ចប់នៅដើមឆ្នាំ២០១៨ខាងមុខនេះ ។
បន្ទាប់ពីបញ្ចប់ការសាងសង់ជាស្ថាពរ រោងចក្រនេះអាចមានសមត្ថភាពផលិតស៊ីម៉ង់ត៍បាន៥ពាន់តោនក្នុងមួយថ្ងៃ និងផ្ដល់ការងារដ៏ច្រើនសន្ធឹកសន្ធាប់ដល់ប្រជាជនកម្ពុជា ជាពិសេស ប្រជាជននៅក្នុងមូលដ្ឋាននេះតែម្ដង » ។
លោកឧកញ៉ាបន្ដទៀតថា ៖ « នៅពេលកំពុងសាងសង់នេះ រោងចក្រត្រូវការកម្លាំងពលកម្មប្រមាណ៦០០ទៅ១.៨០០នាក់ ហើយនៅពេលសាងសង់រួច រោងចក្រត្រូវការកម្លាំងពលកម្មផ្ទាល់ចំនួន១.៥០០នាក់ និងផ្ដល់ការងារដោយប្រយោលប្រមាណ៥.០០០នាក់បន្ថែមទៀត » ។
« រោងចក្រនេះសាងសង់ឡើងតាមបទដ្ឋានអន្តរជាតិ និងក្លាយជារោងចក្រផលិតស៊ីម៉ង់ត៍មួយសន្សំសំចៃថាមពល ដែលផលិតស៊ីម៉ង់ត៍មានគុណភាពខ្ពស់ ។ រោងចក្រស៊ីម៉ង់ត៍នេះដែរ នឹងផ្ដល់ផលប្រយោជន៍ជាច្រើនដល់កម្ពុជា តាមរយៈការកាត់បន្ថយការនាំចូលស៊ីម៉ង់ត៍ពីបរទេស ការប្រើប្រាស់ធនធានធម្មជាតិ ដោយភាពឆ្លាតវៃ ការផ្ដល់ឱកាសការងារជាច្រើនដល់ប្រជាជនកម្ពុជា និងកាត់បន្ថយភាពក្រីក្រ ហើយជាពិសេស កាត់បន្ថយអត្រាចំណាកស្រុករបស់ប្រជាជនកម្ពុជា » ។ នេះបើតាមការបញ្ជាក់របស់លោកអគ្គនាយកក្រុមហ៊ុនជីបម៉ុង គ្រុប ។
លោក ខូយ ឃុនហ៊ួរ អភិបាលខេត្ត បានមានប្រសាសន៍ថា ៖ « បើគិតទូទាំងខេត្តកំពត យើងមាន៦ទីតាំងរោងចក្រស៊ីម៉ង់ត៍ ប៉ុន្តែរោងចក្រស៊ីម៉ង់ត៍៣កន្លែងកំពុងដំណើរការ និង៣កន្លែងទៀតកំពុងសាងសង់ និងត្រៀមសាងសង់។ ទន្ទឹមនឹងនេះ ខេត្តកំពតក៏ដូចជាខេត្តទូទាំងប្រទេសទៀតដែរ បានឆ្លុះបញ្ចាំងឱ្យឃើញពីជំហានអភិវឌ្ឍន៍ដែលជាប៉ូលសេដ្ឋកិច្ចមួយដ៏សំខាន់សម្រាប់កម្ពុជា » ។
សម្ដេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា ដែលបានចូលរួមជាអធិបតីក្នុងពិធីនោះ បានថ្លែងថា ៖« ការវិនិយោគរោងចក្រនេះនៅកម្ពុជា មិនត្រឹមតែបម្រើនៅក្នុងទីផ្សារកម្ពុជាដែលមានប្រជាជនប្រមាណ១៥លាននាក់ប៉ុណ្ណោះទេ តែក៏ត្រូវគិតដល់ទីផ្សារប្រទេសក្នុងមហាអនុតំបន់ទន្លេមេគង្គ ដែលមានប្រជាជនប្រមាណ៣២៦លាននាក់ និងធំជាងនេះទៅទៀត ត្រូវបម្រើទៅដល់ប្រជាជនអាស៊ានទាំងមូលដែលមានប្រជាជនប្រមាណ៦៣០លាននាក់ » ។
សម្តេចមានប្រសាសន៍ថា ៖ « ដើម្បីសម្រេចបាននូវគោលដៅកំណើនសេដ្ឋកិច្ចប្រកបដោយចីរភាព រាជរដ្ឋាភិបាលបានបង្កើនការវិនិយោគសាធារណៈទៅលើការអភិវឌ្ឍហេដ្ឋារចនាសម្ព័ន្ធ ដោយសហការជាមួយវិស័យឯកជនផងដែរ » ។
សម្ដេចបន្ដថា ៖ « ការចាប់ផ្ដើមអនុវត្តគម្រោងសាងសង់រោងចក្រស៊ីម៉ង់ត៍ដ៏ធំនៅខេត្តកំពតនៅពេលនេះ គឺជាការរួមចំណែកក្នុងការអភិវឌ្ឍសេដ្ឋកិច្ចកម្ពុជា ក៏ដូចជាការវិនិយោគលើអនាគតរបស់កម្ពុជាផងដែរ ។ នៅក្នុងកាលៈទេសៈសង្គមកម្ពុជាបច្ចុប្បន្ននេះ ការអភិវឌ្ឍខាងសំណង់កំពុងមានការរីកចម្រើនយ៉ាងខ្លាំងនៅគ្រប់កន្លែង តាមទីជនបទ និងទីប្រជុំជន ដែលតម្រូវឲ្យមានការផ្គត់ផ្គង់ស៊ីម៉ង់ត៍មានគុណភាពខ្ពស់ អាចជឿជាក់បាន » ។
ទន្ទឹមនឹងនេះ សម្តេចមានជំនឿថា ៖ « ការចាប់ផ្ដើមនូវដំណើរការគម្រោងសាងសង់រោងចក្រស៊ីម៉ង់ត៍របស់ក្រុមហ៊ុនជីបម៉ុង អិុនស៊ី ស៊ីមេន នៅពេលនេះ គឺជាការឆ្លើយតបស្របនឹងតម្រូវការជាក់ស្ដែងរបស់សង្គម និងការវិវត្តនៃចរន្តសេដ្ឋកិច្ចរបស់កម្ពុជា ហើយខ្ញុំសង្ឃឹមថារោងចក្រស៊ីម៉ង់ត៍ដ៏ធំនេះ មិនត្រឹមតែធានាបាននូវការផ្គត់ផ្គង់ស៊ីម៉ង់ត៍ប្រើប្រាស់ក្នុងស្រុកប៉ុណ្ណោះទេ តែក៏អាចមានលទ្ធភាពក្នុងការនាំចេញទៅកាន់ប្រទេសនានាក្នុងតំបន់ និងសកលលោកផងដែរ » ។
តាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បង្ហាញថា ក្នុងឆ្នាំ២០១៥ គម្រោងសាងសង់នៅទូទាំងប្រទេសមានចំនួនសរុប២.៣០៥គម្រោង ដែលមានផ្ទៃក្រឡាសំណង់សរុបចំនួន៧.៦៨៦.១១២ម៉ែត្រការ៉េ មានតម្លៃប៉ាន់ស្មានទុនវិនិយោគប្រមាណ៣.៣៣៨លានដុល្លារ បើធៀបនឹងឆ្នាំ២០១៤ កើនឡើងប្រមាណ៣៣,១៤% ។ កំណើននៃវិស័យសំណង់នេះ ធ្វើឲ្យតម្រូវការស៊ីម៉ង់ត៍មានការកើនឡើងជាបន្ដបន្ទាប់ ។ ដូច្នេះវត្តមានរោងចក្រផលិតសុីម៉ង់ត៍ដ៏ធំមួយនេះ នឹងបម្រើឲ្យសេចក្ដីត្រូវការក្នុងវិស័យសំណង់នៅកម្ពុជាយ៉ាងពិតប្រាកដ ។
គួរបញ្ជាក់ថា ក្រុមហ៊ុនជីបម៉ុង ជាក្រុមហ៊ុនដែលបានវិនិយោគទុនក្នុងប្រទេសកម្ពុជាជាច្រើនដូចជា នាំចូល និងចែកចាយសម្ភារសំណង់ និងគ្រឿងឧបភោគបរិភោគ វិស័យអចលនទ្រព្យ រោងចក្រផលិតបេតុងលាយស្រេច និងរោងចក្រផលិតស្រាបៀរកម្ពុជា ជាដើម ៕
ចែករំលែកព័តមាននេះ