រាជធានីភ្នំពេញ ៖ កាលពីថ្ងៃទី៦ មេសា លោកថោង ខុន រដ្ឋមន្ត្រីក្រសួងទេសចរណ៍ បានអនុញ្ញាតឱ្យលោកស្រី Anne Hog Lund ឯកអគ្គរាជទូតស៊ុយអែតប្រចាំនៅប្រទេសកម្ពុជាចូលជួបសម្តែងការគួរសម និងពិភាក្សាការងារនៅទីស្តីការក្រសួង។ ក្នុងជំនួបពិភាក្សានេះលោកស្រីឯកអគ្គរាជទូតស៊ុយអែតមានគោលបំណងសិក្សាស្វែងយល់អំពីការរីកចម្រើនវិស័យទេសចរណ៍នៅកម្ពុជា ព្រមទាំងចូលរួមជំរុញភ្ញៀវទេសចរ និងអ្នកវិនិយោគពីប្រទេសស៊ុយអែតមកកម្ពុជា។
លោករដ្ឋមន្ត្រី ថោង ខុន បានជម្រាបជូនភ្ញៀវថា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននាំឱ្យកម្ពុជាបច្ចុប្បន្នមានសុខសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ពេញលេញ និងមានការអភិវឌ្ឍរីកចម្រើនលើគ្រប់វិស័យ ក្នុងនោះវិស័យទេសចរណ៍ក៏មានការរីកចម្រើនគួរឱ្យកត់សម្គាល់ផងដែរ។ លោករដ្ឋមន្ត្រី ថោង ខុន បានគូសបញ្ជាក់ថា ឆ្នាំ២០១០កន្លងទៅ កម្ពុជាទទួលបានភ្ញៀវទេសចរ២,៥០លាននាក់ ក្នុងកំណើន១៦ភាគរយ។ ដោយឡែកសម្រាប់២ខែ ដើមឆ្នាំ២០១១នេះ ទទួលភ្ញៀវទេសចរបានជាងកន្លះលាននាក់ កើនឡើង១៦,៥ភាគរយ ហើយរំពឹងថាឆ្នាំ២០១១ កម្ពុជាទទួលបានភ្ញៀវទេសចរប្រមាណ២,៨លាននាក់។
លោករដ្ឋមន្ត្រីបានជម្រាបជូនភ្ញៀវអំពីតំបន់ជាសក្តានុពលទេសចរណ៍នៅក្នុងប្រទេសកម្ពុជា ក្នុងនោះមានតំបន់ទេសចរណ៍វប្បធម៌នៅខេត្តសៀមរាប តំបន់អេកូទេសចរណ៍ និងទេសចរណ៍ធម្មជាតិនៅតំបន់ឆ្នេរ និងនៅតំបន់ភូមិភាគឦសាន ដែលពោរពេញទៅដោយកន្លែងកំសាន្តល្អមិនចាញ់ប្រទេសជិតខាងឡើយ។ លោកស្រី Anne Hog Lund បានសម្តែងការចាប់អារម្មណ៍ចំពោះការរីកចម្រើននៃវិស័យទេសចរណ៍របស់កម្ពុជា និងបានសន្យាចូលរួមសហការជំរុញភ្ញៀវទេសចរប្រទេសស៊ុយអែត មកកម្ពុជាឱ្យបានច្រើនថែមទៀត ជាពិសេសលោកស្រីជួយជំរុញអ្នកវិនិយោគស៊ុយអែតមកកម្ពុជាឱ្យបានច្រើនផងដែរ។
លោករដ្ឋមន្ត្រីមានគម្រោងអញ្ជើញមន្ត្រីទូតទាំងអស់ប្រចាំនៅព្រះរាជាណាចក្រកម្ពុជាធ្វើដំណើរទស្សនកិច្ចនៅតំបន់ទេសចរណ៍ក្នុងប្រទេសកម្ពុជា ដូចជានៅតំបន់ឆ្នេរ ភូមិភាគនិរតី និងតំបន់ភូមិភាគឦសានដែលមាន៤ខេត្ត គឺខេត្តក្រចេះ ស្ទឹងត្រែង រតនគិរី និងមណ្ឌលគិរី។ គម្រោងនេះនឹងអាចប្រព្រឹត្តទៅក្នុងខែឧសភា ខាងមុខនេះ ក្នុងគោលបំណងឱ្យមន្ត្រីទូតនានាបានស្វែងយល់ពីសក្តានុពលទេសចរណ៍នៅក្នុងប្រទេសកម្ពុជា៕
ចែករំលែកព័តមាននេះ