បណ្តេញជនជាតិវៀតណាម៣៧នាក់ តាមច្រកទ្វារក្អមសំណ
រាជធានីភ្នំពេញ ៖ ជនជាតិវៀតណាមចំនួន៣៧នាក់ ត្រូវបានកម្លាំងនគរបាលនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃធ្វើការបណ្តេញចេញតាមច្រកទ្វារអន្តរជាតិក្អមសំណ
រាជធានីភ្នំពេញ ៖ ជនជាតិវៀតណាមចំនួន៣៧នាក់ ត្រូវបានកម្លាំងនគរបាលនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃធ្វើការបណ្តេញចេញតាមច្រកទ្វារអន្តរជាតិក្អមសំណ ដែលធ្វើឡើងក្រោមអធិបតីភាព លោកឧត្តមសេនីយ៍ត្រីយ៍ ម៉ុក ប៊ុនឈាង អនុប្រធាននាយកដ្ឋានស៊ើបអង្កេត និងអនុវត្តនីតិវិធី ជាតំណាងដ៏ខ្ពង់ខ្ពស់របស់លោកឧត្តមសេនីយ៍ទោ អ៊ុក ហៃសីឡា ។
ក្រោយពីបានរកឃើញនៅពេលដែលពួកគេបានលួចចូលមកស្នាក់នៅ និងបំពេញការងារដោយខុសច្បាប់ក្នុងការដ្ឋានសំណង់ធនាគារវៀតណាមមួយមានឈ្មោះ BIDC ខណ្ឌច្បារអំពៅ រាជធានីភ្នំពេញ កាលពីពេលកន្លងមក។ ការបណ្តេញចេញនេះបានធ្វើឡើងកាលពីវេលាម៉ោង ៩និង៣០នាទីព្រឹក ថ្ងៃទី១៩ ខែមីនា ឆ្នាំ២០១៦ នៅអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដែលមានទីតាំងទល់មុខអាកាសយានដ្ឋានអន្តរជាតិភ្នំពេញ។
លោកឧត្តមសេនីយ៍ត្រី ម៉ុក ប៊ុនឈាង អនុប្រធាននាយកដ្ឋានស៊ើបអង្កេត និងអនុវត្តន៍នីតិវិធីបានមានប្រសាសន៍ថា ក្នុងនាមរូបលោកជួសមុខអោយលោកឧត្តមសេនីយ៍ទោ អ៊ុក ហៃសីឡា ជាប្រធាននាយកដ្ឋាន នៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ។ ដើម្បីធ្វើយ៉ាងណាអោយកម្លាំងរបស់លោកពង្រឹងនូវច្បាប់អន្តោប្រវេសន៍នៅក្នុងព្រះរាជាណាចក្រកម្ពុជាអោយមានប្រសិទ្ធភាពខ្ពស់នោះ កម្លាំងនគរបាលនៃនាយកដ្ឋានស៊ើបអង្កេត និងអនុវត្តនីតិវិធីតែងតែបានចុះប្រតិបត្តិការចុះត្រួតពិនិត្យរាល់ការស្នាក់នៅ និងបំពេញការងាររបស់ជនបរទេសជាច្រើនកន្លែងនៅតាមបណ្តាខេត្ត និងរាជធានីភ្នំពេញ។ លោកបន្តទៀតថា ជាក់ស្តែងក្នុងថ្ងៃនេះដែរ កម្លាំងនគរបាលនៃនាយកដ្ឋានស៊ើបអង្កេត និងអនុវត្តន៍នីតិវិធី បានធ្វើការបណ្តេញចេញជនអន្តោប្រវេសន៍ខុសច្បាប់ដែលជាជនជាតិវៀតណាមប្រុសស្រីសរុបចំនួន៣៧នាក់ ទៅតាមច្រកទ្វារអន្តរជាតិក្អមសំណ។
ក្រុមជនជាតិវៀតណាមដែលត្រូវធ្វើការបណ្តេញចេញទៅកាន់ស្រុកកំណើតវិញទាំង៣៧នាក់ខាងលើនេះ គឺបានធ្វើឡើងក្រោយកម្លាំងរបស់លោកធ្វើការសហការណ៍ជាមួយនឹងកម្លាំងនគរបាល នៃការិយាល័យគ្រប់គ្រងជនបរទេសរាជធានីភ្នំពេញ បានរកឃើញពួកគេកំពុងតែស្នាក់នៅ និងបំពេញការងារដោយខុសច្បាប់ក្នុងកាដ្ឋានសំណង់ធនាគារដ៏ធំមួយកន្លែងគឺសំណង់ធនាគារ BIDC របស់ប្រទេសវៀតណាម ដែលមានទីតាំងនៅក្នុងភូមិព្រែកតាអុក សង្កាត់វាលស្បូវ ខណ្ឌច្បារអំពៅ ដោយក្រុមជនជាតិវៀតណាមទាំងនោះ ប្រកបមុខរបរជាកម្មករសំណង់ ។ ជនអន្តោប្រវេសន៍ខុសច្បាប់ជាជនជាតិវៀតណាមទាំងនោះ ពួកគេតែងតែបានលួចចូលមកស្នាក់នៅ និងបំពេញការងារនៅក្នុងប្រទេសកម្ពុជាយើង តាមច្រករបៀងមួយចំនួនដែលមានព្រំប្រទល់ជាប់គ្នារវាងប្រទេសទាំងពីរ ហើយក៏ត្រូវធ្វើការបណ្តេញចេញទៅវិញនៅពេលដែលកម្លាំងរបស់លោកបានចុះប្រតិបត្តិការ ត្រួតពិនិត្យរកឃើញថា ពួកគេកំពុងតែស្នាក់នៅ និងបំពេញការងារដោយគ្មានលិខិតស្នាមអ្វីទាំងអស់។ លោកឧត្តមសេនីយ៍ត្រីបានបញ្ជាក់ទៀតថា ការឃាត់ខ្លួន និងការបណ្តេញចេញនូវជនបរទេសនេះដែរមិនមែនធ្វើឡើងតែលើជនជាតិវៀតណាមឡើយ គឺធ្វើឡើងទៅគ្រប់ជនជាតិទាំងអស់ដែលបានលួចចូលមកស្នាក់នៅ និងបំពេញការងារដោយខុសច្បាប់នៅក្នុងប្រទេសកម្ពុជា។
ថ្វីបើប្រទេសរបស់យើងទាំងពីរមានព្រំប្រទល់ជាប់គ្នា តែប្រសិនបើបងប្អូនណាមានបំណងចង់ចូលមកស្នាក់នៅ និងបំពេញការងារនៅក្នុងប្រទេសកម្ពុជានោះ គឺត្រូវតែបំពេញលិខិតស្នាមឲ្យបានត្រឹមត្រូវ។ ប្រសិនបើមិនដូចច្នោះទេបើនៅតែលួចចូលមកស្នាកក់នៅ និងបំពេញការងារដោយខុសច្បាប់ ហើយកម្លាំងរបស់កលោកធ្វើការរឃាត់ខ្លួនបានជាថ្មីម្តងទៀតនោះ និងកាសាងសំណុំរឿងបញ្ជូនខ្លួនទៅកាន់តុលាការដើម្បីចាត់ការទៅតាមផ្លូវច្បាប់ជាមិនខាន៕
ចែករំលែកព័តមាននេះ