ប្រទេសវៀតណាម ៖ ក្រុមហ៊ុនសិង្ហបុរី Keppel Land បានចុះហត្ថលេខាលើកិច្ចព្រមព្រៀងដែលមានចំណែក៤០% ជាមួយក្រុមហ៊ុន Empire City ក្រោមទឹកប្រាក់ចំនួន៩៣,៩លានដុល្លារអាមេរិក ។ ភាគីរួមគ្នារបស់ក្រុមហ៊ុន Empire City គឺក្រុមហ៊ុនអចលនទ្រព្យ Tien Phuoc និង Tran Thai ក៏ដូចជាក្រុមហ៊ុនអចលនទ្រព្យហុងកុង ។ នេះបើតាមការផ្សាយរបស់ក្រុមហ៊ុន Keppel Land ។
ប្រធាននាយកប្រតិបត្តិក្រុមហ៊ុន លោក Ang Wee Gee បានឲ្យដឹងថា ៖ « យើងមានក្តីរំភើបរីករាយជាខ្លាំង ដោយមានកិត្តិយសបានចូលរួមអភិវឌ្ឍន៍តំបន់ទីក្រុងថ្មី Thu Thiem ដែលនឹងក្លាយជាសង្កាត់ពាណិជ្ជកម្មក្នុងទីក្រុងហូជីមិញ នាពេលអនាគត » ។
លោកបន្ថែមថា ៖ « គម្រោងនេះនឹងធ្វើឲ្យតំបន់មាត់ទន្លេ និងការប្រើជីវិតនៅទីក្រុងហូជីមិញមានភាពសម្បូរបែប និងល្អបំផុត ក៏ដូចជាបង្កើនគុណភាពអចលនទ្រព្យលំនៅឋាន និងពាណិជ្ជកម្មនៅក្នុងទីក្រុងឱ្យកាន់តែមានគុណភាពខ្ពស់ជាងមុន » ។
គួរបញ្ជាក់ថា ក្រុមហ៊ុន Keppel Land ជាសាខារបស់ក្រុមហ៊ុនសាជីវកម្ម Keppel Corporation Limited ត្រូវបានគេទទួលស្គាល់ថា ជាក្រុមហ៊ុនអភិវឌ្ឍន៍ និងវិនិយោគអចលនទ្រព្យប្រកបដោយស្តង់ដា មានគុណភាពខ្ពស់ ដែលមានកិច្ចសហប្រតិបត្តិការគ្រប់គ្រង និងតម្លាភាព ។
នៅប្រទេសវៀតណាម ក្រុមហ៊ុនបានប្រតិបត្តិលើ១៩គម្រោង ដោយគ្រោងសាងសង់លំនៅឋានចំនួន២២.០០០ខ្នងនៅក្រុងហូជីមិញ ភាគខាងត្បូងខេត្ត Dong Nai និងខេត្ត Vung Tau ៕
ចែករំលែកព័តមាននេះ