រាជធានីភ្នំពេញ ៖ កត្ដាសន្តិភាព ស្ថិរភាពនយោបាយ និងច្បាប់វិនិយោគអំណោយផលល្អសម្រាប់វិនិយោគិនបរទេស ព្រមជាមួយនឹងគោលនយោបាយ « បើកចំហជើងមេឃ » របស់ប្រមុខរាជរដ្ឋាភិបាល គឺជាមូលដ្ឋានគ្រឹះដ៏ចាំបាច់ ដែលនាំឲ្យកម្ពុជាក្លាយជាប្រទេសមានសក្ដានុពលវិនិយោគលើគ្រប់វិស័យ ។ ដោយសារស្ថានភាពប្រទេសកម្ពុជាមានលក្ខណៈល្អបែបនេះ ទើបវិនិយោគិនបរទេសបានសម្លឹងឃើញឱកាសមកបណ្ដាក់ទុនវិនិយោគ ក៏ដូចជាពង្រីកប្រតិបត្តិការរបស់ខ្លួនជាបន្ដបន្ទាប់ ។
ជាក់ស្ដែង សហព័ន្ធរុស្ស៊ីគ្រោងនឹងចុះកិច្ចព្រមព្រៀងជាមួយកម្ពុជា ស្តីពីកិច្ចសហប្រតិបត្តិការជំរុញលើវិស័យវិនិយោគ និងទេសចរណ៍ឲ្យកាន់តែល្អប្រសើរបន្ថែមទៀត ។ នេះបើតាមការលើកឡើងរបស់អនុប្រធានទី១ ក្រុមប្រឹក្សាសហព័ន្ធនៃសភាសហព័ន្ធរុស្ស៊ី ។
លោក ម៉ម ប៊ុននាង អ្នកនាំពាក្យព្រឹទ្ធសភាបានប្រាប់អ្នកសារព័ត៌មានក្រោយជំនួបរវាងសម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងលោក NIKOLAY FEDOROV អនុប្រធានទី១ ក្រុមប្រឹក្សាសហព័ន្ធនៃសភាសហព័ន្ធរុស្ស៊ី កាលពីថ្ងៃទី១៦ មីនា ថា ៖ « នៅឆ្នាំក្រោយ សម្តេចតេជោនាយករដ្ឋមន្ត្រី ហ៊ុន សែន នឹងធ្វើទស្សនកិច្ចនៅប្រទេសរុស្ស៊ី ដើម្បីចុះហត្ថលេខាលើឯកសារមួយចំនួន ដែលរៀបចំកិច្ចសហប្រតិបត្តិការរវាងប្រទេសទាំងពីរ កម្ពុជា-រុស្ស៊ី » ។
លោក ម៉ម ប៊ុននាង បានស្រង់សម្ដីលោក NIKOLAY FEDOROV ថា ៖ « លោកបានសន្យានឹងជួយដល់ប្រទេសកម្ពុជា និងធ្វើកិច្ចសហប្រតិបត្តិការឲ្យបានល្អលើវិស័យវិនិយោគ និងទេសចរណ៍ ព្រមទាំងសន្យាជំរុញកំណើនភ្ញៀវទេសចររុស្ស៊ីឲ្យកើនឡើងពី២០ម៉ឺននាក់ ដល់៣០ម៉ឺននាក់យ៉ាងតិច » ។
ថ្លែងនាឱកាសនោះ សម្តេចវិបុលសេនាភក្ដី ក៏បានថ្លែងអំណរគុណដល់សហព័ន្ធរុស្ស៊ី ដែលបានជួយដល់និស្សិតខ្មែរទៅសិក្សាប្រមាណ៨ពាន់នាក់ ហើយក្នុងនិស្សិតទាំងនោះបានបម្រើការងារក្នុងស្ថាប័នរដ្ឋ និងឯកជនជាច្រើន ។ ពិសេស និស្សិតចំនួន៣រូបបានធ្វើជារដ្ឋមន្ត្រី គឺរដ្ឋមន្ត្រីក្រសួងអប់រំ យុវជន និងកីឡា រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងវប្បធម៌ និងវិចិត្រសិល្បៈ ។
គួរបញ្ជាក់ថា ក្នុងជំនួបនោះក៏មានការចុះហត្ថលេខា ស្តីពីការលើកកម្ពស់កិច្ចសហប្រតិបត្តិការអង្គសភានៃប្រទេសទាំងពីរផងដែរ ៕
ចែករំលែកព័តមាននេះ