រាជធានីភ្នំពេញ ៖ អគ្គិភ័យឆាបឆេះបន្ទប់ជាន់ទី១ ក្នុងមន្ទីរសម្រាកព្យាបាលមេត្រូ២ បង្កការភ្ញាក់ផ្អើលដល់អ្នកជំងឺ គ្រូពេទ្យ បងប្អូនប្រជាពលរដ្ឋរត់ជួយអន្តរាគមន៍ និងយកបំពង់ពន្លត់អគ្គិភ័យបាញ់ពន្លត់ ។
ករណីអគ្គិភ័យនេះបានកើតឡើង កាលពីវេលាម៉ោង១២ថ្ងៃត្រង់ ថ្ងៃទី១៦ ខែតុលា ឆ្នាំ២០២១ នៅចំណុចជាន់ទី១ របស់មន្ទីរសម្រាកព្យាបាល មេត្រូ២ ក្នុងសង្កាត់ផ្សារថ្មីទី៣ ខណ្ឌដូនពេញ។
តាមប្រភពព័ត៌មានបានឱ្យដឹងថា នៅមុនពេលកើតហេតុឃើញមានផ្សែងហ៊ុយចេញពីម៉ាស៊ីនត្រជាក់ក្នុងបន្ទប់ជាន់ទី១ ដែលជាបន្ទប់ដាក់សម្ភារៈប្រើប្រាស់របស់មន្ទីរពេទ្យ មន្ទីរសម្រាកព្យាបាល មេត្រូ២ ខាងលើ ។
ភ្លាមៗនោះ គ្រូពេទ្យ និងបុគ្គលិកបាននាំគ្នាយកបំពង់ពន្លត់អគ្គិភ័យបាញ់ពន្លត់ តែមិនអាចគ្រប់គ្រងក៏បានរាយការណ៍ទៅអាជ្ញាធរមូលដ្ឋានចេញរ៉ឺម៉កបាញ់ទឹករបស់សាលាខណ្ឌ និងទាក់ទងទៅកម្លាំងជំនាញចេញរថយន្តពន្លត់អគ្គិភ័យរបស់ការិយាល័នៃស្នងការនគរបាលរាជធានីភ្នំពេញចំនួន៣គ្រឿងជួយអន្តរាគមន៍បាញ់ពន្លត់ភ្លាមៗ ។
លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញបានប្រាប់ឲ្យដឹងថា ម្ចាស់ទីតាំងឈ្មោះ ផេង ស្រីភស្ស ភេទស្រី អាយុ ២៨ឆ្នាំ មុខរបរប្រធានរដ្ឋបាល ចំពោះមូលហេតុនៃការឆាបឆេះបណ្តាលមកពីការឆ្លងចរន្តអគ្គិសនីពីម៉ាស៊ីនត្រជាក់ ក្នុងបន្ទប់ជាន់ទី១ ។
ក្នុងករណីអគ្គិភ័យមួយនេះ បណ្តាលឲ្យឆាបឆេះខូចខាតទំហំថ្មបេតុងទំហំ៤ម៉ែត្រ x ៦ម៉ែត្រ សម្ភារៈម៉ាស៊ីនត្រជាក់ចំនួនមួយ, សម្ភារៈប្រើប្រាស់មួយចំនួន និងពុំបណ្តលឲ្យឆេះរាលដាលដល់បន្ទុប ផ្សេង ឬផ្ទះអ្នកជិតខាងឡើយ ។
សម្រាប់ប្រតិបត្តិការសង្គ្រោះវិញ សមត្ថកិច្ចប្រើប្រាស់រថយន្ដការិយាល័យបង្ការ និងពន្លត់អគ្គិភ័យ ចំនួន៣គ្រឿង ប្រើប្រាស់ទឹកអស់ ៣ឡាន ស្មើរនឹង ១២ម៉ែត្រគូប ទើបរលត់ទាំងស្រុងនៅវេលាម៉ោង១២ និង៣០នាទីនៅថ្ងៃដដែល ៕
ចែករំលែកព័តមាននេះ