ដំបូងគេយកផ្តិលបាក់បែកដែលមានជាតិលង្ហិនសុទ្ធ មកដុតក្នុងកំដៅធម្មតាដើម្បីឱ្យផ្តិលទាំងនោះមានសភាពស្រួយស្រួលនឹងដំកំទេចឱ្យល្អិត ។ ពេលបានកំទេចលង្ហិនហើយ ទើបគេចាប់ថ្លឹងតាមកំណត់ទម្ងន់ផ្លែនីមួយៗ ដែលមានទម្ងន់ពី១,០០គីឡូក្រាម ទៅ១,២០គីឡូក្រាម ។ គេយកលង្ហិនសំរាប់ផ្លែគងនីមួយៗ ទៅដាក់ក្នុងបាវ (ធ្វើអំពីដីដំបូកលាយអង្កាមរាងក្រឡូមដូចចាន) មួយ រួចកប់ទៅក្នុងភ្លើងធ្យូងដែលមានកំដៅខ្លាំងដោយសារការសប់យ៉ាងញាប់ដៃទុករហូតដល់លោហធាតុនោះរលាយទៅជាទឹក ។ គេយកទឹកលោហធាតុនោះទៅចាក់ក្នុងពុម្ព (ធ្វើអំពីដីដំបូកមានរាងដូចជាពែង អាកោធុនធំ) ប៉ុន្តែមុននឹងចាក់ទឹកលោហធាតុចូលទៅក្នុងពុម្ព គេត្រូវចាក់ខ្លាញ់ត្រីមួយស្លាបព្រាតូចចូលទៅក្នុងពុម្ពជាមុនសិន ទើបគេចាក់ទឹកលោហធាតុចូលជាក្រោយ ។ គេធ្វើរបៀបខាងលើនេះរហូតបានចំនួនដុំលោហធាតុគ្រប់១៦ ទើបគេចាប់បន្តការងារផ្សេងទៀត ។ គេយកដុំលោហធតុទៅដុតក្នុងធ្យូងភ្លើងម្តងមួយដែលមានកំដៅល្មមនៅពេលដុំលោហធាតុឡើងក្រហម គេយកវាមកដំផែឱ្យសំប៉ែតមួល ប៉ាន់ស្មានល្មមសមទៅនឹងទំហំផ្លែគងនៅពេលណាដែលគេយកវាទៅធ្វើជារាងផ្លែគងទាំងនោះបាន ។ គេធ្វើបែបខាងលើនេះ រហូតបានគ្រប់១៦ផែន សំប៉ែតមូល ទើបគេចាប់ផ្តើមបន្តការងារមួយបែបទៀត ។ គេយកលោហធាតុសំប៉ែតនោះទៅដុតម្តងទៀតឱ្យឡើងក្រហមព្រឿងៗ រួចយកមកដំផែវាឱ្យក្រឡូមដូចផ្តិលដងទឹក ។ បានជារាងផ្តិលហើយ ទើបគេយកផ្តិលនោះទៅដុតដំយករាងជាផ្លែគងតាមទំហំធំ ឬតូចនៃផ្លែគងនីមួយៗបានជារាងផ្លែគង ហើយទើបគេយកផ្តិលនោះទៅដុតដំបញ្ចេញដោះជាក្រោយ ។ នៅពេលដែលគេដុតដំចេញជារាងផ្លែគងត្រឹមត្រូវហើយ ទើបគេដុតវាម្តងទៀត រួចយកទៅលត់ (ជ្រលក់ក្នុងទឹក) នឹងទឹកម៉្យាងដែលមានជាតិជូរ ដើម្បីឱ្យផ្លែគងនោះស្វិតជាប់ធ្លាក់មិនបែក ។ គេធ្វើរបៀបនេះរហូតដល់បានគ្រប់ផ្លែទាំង១៦ ទើបគេយកម្តងមួយៗ តាមលេខរៀងទៅក្រឡឹងសំអាតនឹងអន្ទោកក្រឡឹងដៃ ប៉ុន្តែគេប្រុងប្រយ័ត្នខ្លាំងណាស់ក្នុងពេលក្រឡឹងម្តងៗ ខ្លាចជ្រុលហួសសំនៀងដែលគេត្រូវទុក ។ ផ្លែទាំង១៦ បានក្រឡឹងចប់សព្វគ្រប់ហើយ ទើបគេយកវាទៅចោះរន្ធសំរាប់ស៊កខ្សែចងព្យួរទៅនឹងរង្វង់គង រួចទើបគេយកប្រមរមកបិទក្នុងដោះនៃផ្លែនីមួយៗ ដើម្បីរឹតរកសំនៀងត្រូវរបស់វា ។ សំរាប់ផ្លែសំនៀងនីមួយៗ ត្រូវលត់នឹងទឹកសំរាប់លត់២ដង ។
លត់លើកទី១ គឺនៅពេលដំបានជារាងផ្លែគងហើយភ្លាម ។ ក្រោយពីលត់មកគេត្រូវពិនិត្យសំនៀងរបស់វាជាលើកដំបូងជាមួយនឹងផ្លែសំនៀងរនាតឯក តើវាមានសំនៀងឡើងដល់ត្រឹមណា ។ បើមានសំនៀងខ្ពស់ខ្លាំងពេកគេត្រូវដំបញ្ចុះសំនៀងឱ្យមកនៅត្រឹមសំនៀងកំរិត ។លត់លើកទី២ គឺលត់បញ្ចប់នៅពេលដែលគេដំសំរួលសំនៀងបានត្រឹមត្រូវហើយ គេយកផ្លែគងនោះទៅដុតម្តងទៀតឱ្យក្រហមព្រឿងៗ រួចគេយកទៅជ្រលក់នឹងទឹកសំរាប់លត់នោះមុននឹងយកទៅក្រឡឹង ។ របៀបដំទុកសំលេង និងរបៀបក្រឡឹងទុកសំលេង ចំពោះផ្លែសំនៀងគងវង់តូច ផ្លែសំនៀងគងវង់តូចចែកចេញជាពីរក្រុម ៖
ក្រុមទី១ ហៅថាក្រុមផ្លែមេ គឺពីផ្លែទី៧ ដល់ទី១៦ ។ ក្រុមនេះក្រោយពីក្រឡឹងរួចសំរាប់ផ្លែនីមួយៗត្រូវមានសំនៀង២,៥០ខ្ពស់ជាងសំនៀងត្រឹមត្រូវមែនទែន ។
ក្រុមទី២ ហៅថា ក្រុមផ្លែកូន គឺពីផ្លែទី១ដល់ផ្លែទី៦ ។ ក្រុមនេះក្រោយពីក្រឡឹងរួច សំរាប់ផ្លែនីមួយៗ ត្រូវមានសំនៀង១,៥០ខ្ពស់ជាងសំនៀងត្រឹមត្រូវមែនទែន ។
ការទុកសំនៀងខ្ពស់បែបនេះ គឺសំរាប់នៅពេលណាបិទប្រមរ សំនៀងត្រូវធ្លាក់មកចំសំនៀងមែនទែន ។
ឧទាហរណ៍ ៖ ក្រុមផ្លែមេ «ផ្លែទី១៦»
១-ដំបានជារាងផ្លែគងហើយមានសំនៀង
២-ផ្លែគងក្រឡឹងហើយមានសំនៀង
៣-ផ្លែគងបិទដុំប្រមរហើយមានសំនៀង
ក្រុមផ្លែកូន«ផ្លែទី៦»
១-ដំបានជារាងផ្លែគងហើយមានសំនៀង
២-ផ្លែគងក្រឡឹងហើយមានសំនៀង
៣-ផ្លែគងបិទដុំប្រមរហើយមានសំនៀង
ចំពោះផ្លែសំនៀងគងវង់ធំ
ផ្លែសំនៀងគងវង់ធំចែកចេញជាពីរក្រុម ៖
ក្រុមទី១ ហៅថា ក្រុមផ្លែមេ គឺពីផ្លែទី៩ ដល់ទី១៦ ។ ក្រុមនេះក្រោយពីក្រឡឹងរួចសំរាប់ផ្លែនីមួយៗ ត្រូវមានសំនៀង៣ខ្ពស់ជាងសំនៀងត្រឹមត្រូវមែនទែន ។
ក្រុមទី២ ហៅថាក្រុមផ្លែកូន គឺពីផ្លែទី១ ដល់ទី៨ ។ ក្រុមនេះក្រោយពីក្រឡឹងរួច សំរាប់ផ្លែនីមួយៗ ត្រូវមានសំនៀង២,៥០ខ្ពស់ជាងសំនៀងត្រឹមត្រូវមែនទែន ។
ឧទាហរណ៍ ៖ ក្រុមផ្លែមេ «ផ្លែទី១៦»
១-ដំបានជារាងផ្លែគងហើយមានសំនៀង
២-ផ្លែគងក្រឡឹងហើយមានសំនៀង
៣-ផ្លែគងបិទប្រមរហើយមានសំនៀង
ក្រុមផ្លែកូន «ផ្លែទី១»
១-ដំបានជារាងផ្លែគងហើយមានសំនៀង
២-ផ្លែគងក្រឡឹងហើយមានសំនៀង
៣-ផ្លែគងបិទប្រមរហើយមានសំនៀង
ផ្លែសំនៀងនីមួយៗក្រោយពីដំំសំរួលហើយ ត្រូវមានសំនៀងលើ (ខ្ពស់) ពីកំរិតសំនៀងក្រឡឹង៣ ឬ៤សំនៀង ដើម្បីផ្តល់ការងាយស្រួលដល់ការក្រឡឹងបានរលីងស្អាត ។
ផ្លែសំនៀងនីមួយៗ ក្រោយពីក្រឡឹងរំលីងស្អាត ហើយត្រូវស្ថិតនៅក្នុងកំរិតសំនៀងខ្ពស់នៅឡើយ ពីព្រោះកាលណាគេយកប្រមរមកបិទ សំនៀងនោះត្រូវថយចុះមកត្រឹមសំនៀងកំរិតត្រឹមត្រូវមែនទែន ។ ក្នុងពេលពិនិត្យសំនៀងនៃផ្លែនីមួយៗម្តងៗ គេត្រូវយកផ្លែសំនៀងត្រឹមត្រូវរបស់រនាតឯកមកធ្វើជាគំរូ ៕
ចែករំលែកព័តមាននេះ