ខេត្តកំពង់ឆ្នាំង៖ លោកយាយម្នាក់ អាយុជិត ១០០ឆ្នាំ ចង់ចាក់វ៉ាក់សាំង ការពារជំងឺកូវីដ-១៩។ ប៉ុន្តែលោកយាយ មិនមានលទ្ធភាព ធ្វើដំណើរទៅមណ្ឌលសុខភាព ឬមន្ទីរពេទ្យបានទេ ដោយសារតែគាត់ជរាលំបាកក្នុងការធ្វើដំណើរ។ ដូច្នេះលោកយាយ ចង់ឲ្យគ្រូពេទ្យ មកចាក់វ៉ាក់ជូនលោកយាយ ដល់ផ្ទះ ។
នៅពីមុខផ្ទះបុរាណមួយខ្នង ធ្វើអំពីឈើ ប៉ុន្តែត្រូវបានជួសជុលកែលម្អជញ្ជាំងថ្មី ដោយរក្សាទ្រង់ទ្រាយដើម លោកយាយ សៅ ហោន ក្នុងសម្លៀកបំពាក់ខោខ្មៅជើងខ្លី ត្រឹមក្បាលជង្គង់ អាវផ្កា និងក្រមាពណ៌ក្រហម តែស្ទើរបាត់ពណ៌ដើម ដោយសារតែក្អែល ប្រែពណ៌ ទៅជាក្រម៉ៅ បានអង្គុយផ្ទាល់ដី ដោយបញ្ឈរជង្គង់ដល់ចង្កា ប្រឹងបោចស្មៅមុខផ្ទះ ហើយបានងើបមុខឡើង សម្លឹងទៅរកសម្រឹបជើងមនុស្ស កំពុងដើរចូលទៅ ដោយក្រសែភ្នែកពណ៌ស្រអាប់ ស្បែកជ្រីវជ្រួញលើផ្ទៃមុខ ក្នុងវ័យចាស់ជរា ព្រមជាមួយនឹងការលើកដៃសំពះ ជម្រាបសួរដល់អ្នកចំណូលថ្មី ផងដែរ។
លោកយាយ សៅ ហោន ព្យាយាមនិយាយ ដោយមិនមានភ្លេចភ្លាំងថា លោកយាយមានអាយុ ១០៤ឆ្នាំ បច្ចុប្បន្នរស់នៅជាមួយចៅប្រុសស្រីចំនួន ២នាក់ប្តីប្រពន្ធ ក្នុងភូមិថ្លុកជ្រៅ ឃុំអញ្ចាញរូង ស្រុកបរិបូណ៌។
លោកយាយមានកូន ៦នាក់។ ប៉ុន្តែស្លាប់អស់ទៅហើយ ក្នុងសម័យប៉ុលពត នៅសល់តែកូនម្នាក់ ដែលមានប្ដីប្រពន្ធ ហើយបែកគ្រួសារទៅនៅផ្សេង។ ប៉ុន្តែបានឱ្យកូន ២នាក់ប្តីប្រពន្ធ ដែលត្រូវជាចៅលោកយាយ មករស់នៅមើលថែលោកយាយ នៅផ្ទះពីសង្គមដើមរបស់លោកយាយផ្ទាល់ ដែលមានអាយុជាង ១០០ឆ្នាំ ដូចលោកយាយដែរ។ ប៉ុន្តែបានប្តូរជញ្ជាំង ក្តារក្រាលអស់ហើយ។
ពេលសួរ លោកយាយមានបានចាក់វ៉ាក់សាំងការពារកូវីតទេ? លោកយាយឆ្លើយយ៉ាងលឿន ដោយមិនបាច់គិតថា៖ លោកយាយ ក៏ខ្លាចនូវជំងឺកូវីដដែរ! ហើយលោកយាយ ក៏ចង់ចាក់វ៉ាក់សាំងការពារកូវីតដែរ ប៉ុន្តែមិនអាចធ្វើដំណើរបាន ព្រោះតែជរាណាស់ទៅហើយ ប្រសិនបើមានគ្រូពេទ្យយកវ៉ាក់សាំង មកចាក់ដល់ផ្ទះលោកយាយ នឹងព្រមចាក់ភ្លាម មិនរុញរាឡើយ។
លោកយាយ សៅ ហោន ក៏បានរៀបរាប់ពីការលំបាក ដែលខ្វះខាតជីវភាព ប្រចាំថ្ងៃ ពឹងលើចៅ ២នាក់ ប្តីប្រពន្ធ ក៏ហូបមិនសូវគ្រប់គ្រាន់ដែរ ព្រោះចៅគេ ក៏មានកូនដែរ ម្លោះហើយបញ្ហាជីវភាពពិតជាខ្វះខាតមែន។
ក្មួយស្រី វ៉ែន សុម៉ាលី អាយុ ២៨ឆ្នាំ ដែលត្រូវជាចៅស្រីរបស់លោកយាយខាងលើ បានបញ្ជាក់ថា សព្វថ្ងៃក្មួយស្រី និងប្តី ជាអ្នកមើលថែលោកយាយ។ ប៉ុន្តែជីវភាពក៏ខ្វះខាតដែរ ព្រោះជាអ្នកជនបទ ពឹងតែលើស្រែមួយមុខ មិនមានចំណូលអ្វីឡើយ ណាមួយគ្រួសារក្មួយស្រី ក៏មានកូន ២នាក់ដែរ។
ក្រោយពេលចៅស្រី យកសៀវភៅគ្រួសារ និងអត្តសញ្ញាណប័ណ្ណរបស់លោកយាយ មកឱ្យពិនិត្យ ឃើញថ្ងៃខែឆ្នាំកំណើតរបស់លោកយាយ សៅ ហោន កើតថ្ងៃទី៩ ខែសីហា ឆ្នាំ១៩២៨។ ដូច្នេះបើគិតតាមអត្តសញ្ញាណប័ណ្ណ លោកយាយ មានអាយុត្រឹម ៩៣ឆ្នាំ តែក៏ជាវ័យចាស់ជរាណាស់ទៅហើយដែរ៕ ពៅ សុខហ៊ាន
ចែករំលែកព័តមាននេះ