រាជធានីភ្នំពេញ ៖ ប្រមុខរាជរដ្ឋាភិបាលបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ធនាគារជាតិនៃកម្ពុជា ក្នុងនាមជាអាជ្ញាធរបញ្ញត្តិកម្ម និងត្រួតពិនិត្យដើម្បីរួមចំណែកដល់ការអភិវឌ្ឍវិស័យមីក្រូហិរញ្ញវត្ថុនៅកម្ពុជា
រាជធានីភ្នំពេញ ៖ ប្រមុខរាជរដ្ឋាភិបាលបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ធនាគារជាតិនៃកម្ពុជា ក្នុងនាមជាអាជ្ញាធរបញ្ញត្តិកម្ម និងត្រួតពិនិត្យដើម្បីរួមចំណែកដល់ការអភិវឌ្ឍវិស័យមីក្រូហិរញ្ញវត្ថុនៅកម្ពុជា ជាពិសេស ក្នុងរយៈពេលមួយទសវត្សរ៍ចុងក្រោយនេះ ពោលគឺចាប់តាំងពីការប្រកាសជាផ្លូវការរបស់រាជរដ្ឋាភិបាល យកឆ្នាំ២០០៦ ជាឆ្នាំមីក្រូហិរញ្ញវត្ថុកម្ពុជា ។ ទោះបីជាយ៉ាងណា ក៏នៅមានភាពអសកម្មមួយចំនួនផងដែរ ដែលគ្រប់ភាគីពាក់ព័ន្ធ និងអាជ្ញាធរមូលដ្ឋានត្រូវសហការគ្នាដោះស្រាយដើម្បីទប់ស្កាត់ និងការពារប្រយោជន៍ដល់ប្រជាពលរដ្ឋ ។
ថ្លែងក្នុងពិធីបិទសន្និសីទជាតិ ស្តីពីការអភិវឌ្ឍវិស័យមីក្រូហិរញ្ញវត្ថុនៅកម្ពុជា កាលពីល្ងាចថ្ងៃទី១៥ មីនា នៅសាលកោះពេជ្រ លោក ជា ចាន់តូ ទេសាភិបាលធនាគារជាតិនៃកម្ពុជា បានលើកឡើងថា នៅក្នុងវិស័យមីក្រូហិរញ្ញវត្ថុ មានភាពអសកម្មមួយចំនួន ដែលគ្រប់ភាគីពាក់ព័ន្ធត្រូវដោះស្រាយ ដូចជា ៖
១-សកម្មភាពក្រៅផ្លូវការ ឬខុសច្បាប់មួយចំនួនដែលត្រូវបានប្រើប្រាស់ជាលេសក្នុងគោលដៅកេងប្រវ័ញ្ច និងទុច្ចរិត បណ្តាលឲ្យប្រជាជនធ្លាក់ក្នុងភាពក្រីក្រ និងរឹបអូសផ្ទះសម្បែង និងទ្រព្យសម្បត្តិ ។ សកម្មភាពទាំងនេះបង្ហាញឲ្យឃើញតាមរយៈការផ្តល់ឥណទានដោយមានលក្ខណៈធូររលុង ដោយមិនគិតពីគោលបំណងកម្ចីថា តើយកទៅបង្កើត ឬពង្រីកមុខរបរអាជីវកម្ម ឬយកប្រើប្រាស់ជាការកម្សាន្ត ឬលេងល្បែងស៊ីសង ។
២-សកម្មភាពតាំងខ្លួនជាគ្រឹះស្ថានមីក្រូហិរញ្ញវត្ថុស្របច្បាប់ ដោយគិតអត្រាការប្រាក់ខ្ពស់ ឬការទាក់ទាញប្រាក់បញ្ញើ ដោយសន្យាផ្តល់ការប្រាក់ខ្ពស់ហួសហេតុ ។ ឧទាហរណ៍ ១២%ក្នុងមួយខែ ឬ១៤៤%ក្នុងមួយឆ្នាំ ដែលបានកើតឡើងរួចមកហើយនៅក្នុងខេត្តបាត់ដំបង នាពេលកន្លងមក ។ សកម្មភាពនេះ គឺជាសកម្មភាពបោកប្រាស់ ។
៣-រដូវកាលឃោសនាបោះឆ្នោតជិតមកដល់ មានគណបក្សនយោបាយ និងបុគ្គលមួយចំនួនបាននិងកំពុងកេងយកផលចំណេញផ្នែកនយោបាយថែមទៀត តាមរយៈការឃោសនាឲ្យប្រជាជនយល់ច្រឡំថា គ្រឹះស្ថានមីក្រូហិរញ្ញវត្ថុជាគ្រឹះស្ថានរបស់រដ្ឋ ដូច្នេះ ប្រាក់ដែលខ្ចីជារបស់រដ្ឋ ហើយប្រជាជនខ្ចីប្រាក់មិនចាំបាច់សងប្រាក់កម្ចីនោះត្រឡប់មកវិញទេ ហើយថែមទាំងសន្យាថា បើពួកគេឈ្នះឆ្នោតនោះ ពួកគេនឹងលុបចោលប្រាក់កម្ចីទាំងនោះ ។
លោកទេសាភិបាលធនាគារជាតិនៃកម្ពុជា បន្តថា៖« ចំពោះមុខ យើងឃើញថា ធនាគារជាតិនៃកម្ពុជាបានរួមចំណែកបង្កើនចំណេះដឹងលើការប្រើប្រាស់សេវាហិរញ្ញវត្ថុដល់ថ្នាក់មូលដ្ឋាន ដែលធ្វើឲ្យប្រជាជនមានការយល់ដឹងកាន់តែច្រើនក្នុងការស្វែងរកប្រភពហិរញ្ញវត្ថុពីធនាគារពាណិជ្ជ និងគ្រឹះស្ថានមីក្រូហិរញ្ញវត្ថុ ជាពិសេស ធ្វើឲ្យពួកគេយល់ច្បាស់ថា មីក្រូហិរញ្ញវត្ថុពុំមែនជាសកម្មភាពសប្បុរសធម៌ទេ » ។
ទាក់ទងនឹងវិស័យមីក្រូហិរញ្ញវត្ថុនេះដែរ លោក ជា ចាន់តូ ក៏បានលើកឡើងនូវអនុសាសន៍មួយចំនួនដូចជា ៖
១-ភាគីទាំងអស់ត្រូវបន្តជំរុញសេវាហិរញ្ញវត្ថុផ្សេងទៀតបន្ថែមលើសេវាឥណទាន ជាពិសេស ការផ្តល់សេវាហិរញ្ញវត្ថុជូនប្រជាពលរដ្ឋក្នុងតម្លៃសមរម្យ ។
២-ធនាគារជាតិនៃកម្ពុជា ក្រសួងមហាផ្ទៃ និងភាគីពាក់ព័ន្ធទាំងអស់ ត្រូវបន្តចាត់វិធានការម៉ឺងម៉ាត់ចំពោះអង្គការមិនមែនរដ្ឋាភិបាល សមាគម និងអ្នកឲ្យខ្ចីចងការក្រៅផ្លូវការ ដែលធ្វើប្រតិបត្តិធនាគារដោយពុំមានច្បាប់អនុញ្ញាតត្រឹមត្រូវ ។
៣-គ្រឹះស្ថានមីក្រូហិរញ្ញវត្ថុត្រូវផ្តល់ឥណទានផ្អែកលើសមត្ថភាពនៃការសងត្រឡប់ និងផលិតភាពនៃមុខរបរ ឬអាជីវកម្មរបស់អតិថិជន និងត្រូវចៀសវាងការផ្តល់ឥណទានដែលមានភាពធូរលុង និងពឹងផ្អែកតែទៅលើទ្រព្យធានាតែម្យ៉ាង ។
៤-គ្រឹះស្ថានមីក្រូហិរញ្ញវត្ថុ ត្រូវពង្រឹងយន្តការនៃកិច្ចការពារអតិថិជន ដោយផ្តោតលើការអនុវត្តក្រមប្រតិបត្តិ តម្លាភាព ការបង្ហាញព័ត៌មានភាពសមស្របនៃផលិតផល ព្រមទាំងគោលការណ៍ និងយន្តការដោះស្រាយបណ្តឹងដែលសាមញ្ញ និងងាយស្រួល ។
៥-ធនាគារជាតិនៃកម្ពុជា ក្រសួងអប់រំ យុវជន និងកីឡា សមាគមមីក្រូហិរញ្ញវត្ថុ និងដៃគូអភិវឌ្ឍន៍នានា ត្រូវបន្តសហការលើកកម្ពស់កម្មវិធីអប់រំផ្នែកហិរញ្ញវត្ថុដល់ប្រជាជន។
៦-គ្រឹះស្ថានមីក្រូហិរញ្ញវត្ថុត្រូវបន្តរក្សាបេសកកម្មសង្គម និងបរិស្ថាន ក្នុងគោលបំណងរួមចំណែកដល់ការអភិវឌ្ឍសេដ្ឋកិច្ច និងសង្គម ៕
ចែករំលែកព័តមាននេះ