រាជធានីភ្នំពេញ ៖ កត្តាធនធានបេតិកភណ្ឌ និងធនធានធម្មជាតិដ៏សម្បូរបែបរបស់កម្ពុជា បានក្លាយជាគោលដៅទេសចរណ៍បេតិកភណ្ឌ និងអេកូទេសចរណ៍ប្រកបដោយសក្តានុពលខ្ពស់មួយនៅក្នុងតំបន់ ក៏ដូចជានៅលើពិភពលោក
រាជធានីភ្នំពេញ ៖ កត្តាធនធានបេតិកភណ្ឌ និងធនធានធម្មជាតិដ៏សម្បូរបែបរបស់កម្ពុជា បានក្លាយជាគោលដៅទេសចរណ៍បេតិកភណ្ឌ និងអេកូទេសចរណ៍ប្រកបដោយសក្តានុពលខ្ពស់មួយនៅក្នុងតំបន់ ក៏ដូចជានៅលើពិភពលោក ជាពិសេស ក្នុងតំបន់អាស៊ានដែលជាទីផ្សារទេសចរណ៍ដ៏ធំមួយ និងមានភ្ញៀវទេសចរអន្តរជាតិមកទស្សនាចំនួនប្រមាណ១០៥លាននាក់កាលពីឆ្នាំ២០១៥ ។ តាមការព្យាកររបស់ក្រសួងទេសចរណ៍កម្ពុជារំពឹងថា នឹងទទួលបានភ្ញៀវទេសចរអន្តរជាតិរហូតដល់ជាង៧លាននាក់នៅឆ្នាំ២០២០ ។ ទន្ទឹមនឹងកំណើនភ្ញៀវទេសចរមកទស្សនានៅកម្ពុជា បានកើនឡើងជាបន្ដបន្ទាប់ដូចនេះ វិស័យអាកាសចរណ៍ស៊ីវិលកម្ពុជា ក៏មានការរីកចម្រើនគួរឱ្យកត់សម្គាល់ជាលំដាប់ផងដែរ ។
ថ្លែងក្នុងពិធីសម្ពោធស្ថានីយអ្នកដំណើរថ្មី នៃអាកាសយានដ្ឋានអន្តរជាតិភ្នំពេញ កាលពីថ្ងៃទី១៦ មីនា ម្សិលមិញ លោកឧបនាយករដ្ឋមន្ត្រី បណ្ឌិតសភាចារ្យ សុខ អាន បានមានប្រសាសន៍ថា ៖ « ក្នុងឆ្នាំ២០១៥ អាកាសយានដ្ឋានអន្តរជាតិទាំង៣របស់កម្ពុជា បានទទួលអ្នកដំណើរសរុបរហូតដល់ចំនួន៦,៤លាននាក់ គឺមានការកើនឡើង៣០០% បើប្រៀបធៀបនឹងឆ្នាំ២០០៥ មានចំនួនតែ២,១លាននាក់ប៉ុណ្ណោះ ដែលជាកំណើនមួយដ៏ខ្ពស់ក្នុងរយៈពេល១០ឆ្នាំចុងក្រោយ និងបានធ្វើឱ្យកម្ពុជាក្លាយជាទីផ្សារលូតលាស់លឿនបំផុតមួយនៅក្នុងតំបន់អាស៊ី » ។
វិស័យអាកាសចរណ៍ស៊ីវិលកម្ពុជា ត្រូវបានរំពឹងថា នឹងបន្តកើនឡើងបន្ថែមទៀតទៅអនាគត ស្របពេលដែលការព្យាកររបស់អង្គការអាកាសចរណ៍ស៊ីវិលអន្តរជាតិ (ICAO) សម្រាប់រយៈពេល២០ឆ្នាំខាងមុខ បានបង្ហាញថា កម្រិតលូតលាស់របស់វិស័យអាកាសចរណ៍ពិភពលោកប្រចាំឆ្នាំមាន៤,៧% ឬកើនឡើងចំនួនទ្វេដងក្នុងរយៈពេល១៥ឆ្នាំខាងមុខ ។
ជាការពិត ឧស្សាហកម្មអាកាសចរណ៍មានតួនាទីយ៉ាងសំខាន់ក្នុងការជំរុញការលូតលាស់សេដ្ឋកិច្ចរបស់បណ្តាប្រទេសក្នុងតំបន់ ក៏ដូចជាពិភពលោកទាំងមូល ។
បច្ចុប្បន្ននេះ អាកាសយានដ្ឋានអន្តរជាតិភ្នំពេញមានចំណតយន្តហោះចំនួន១៨ សម្រាប់យន្តហោះដឹកអ្នកដំណើរធំ-តូចគ្រប់ប្រភេទ អាចឈប់សំចតបាន ស្របតាមបទដ្ឋានអាកាស យានដ្ឋានអន្តរជាតិលំដាប់ថ្នាក់ 4D ដែលមានសមត្ថភាពទទួលការចុះចតនៃយន្តហោះដឹកអ្នកដំណើរធុនធ្ងន់ ។ នេះជាការវាយតម្លៃជាវិជ្ជមានទៅលើហេដ្ឋារចនាសម្ព័ន្ធអាកាសយានដ្ឋានកម្ពុជា ដោយអង្គការអាកាសចរណ៍ស៊ីវិលអន្តរជាតិ ដូចជា ICAO និង IATA ។
ថ្លែងក្នុងពិធីសម្ពោធដាក់ឲ្យដំណើរការស្ថានីយចេញដំណើរថ្មីនាឱកាសនោះដែរ ប្រមុខរាជរដ្ឋាភិបាលបានសម្ដែងនូវមោទនភាពនៃចំនួនទេសចរដែលបានធ្វើដំណើរមកកាន់ប្រទេសកម្ពុជា មានការកើនឡើងពីមួយឆ្នាំទៅមួយឆ្នាំ ដែលនាំឲ្យមានការបង្កើតស្ថានីយថ្មីនាពេលនេះ។
សម្ដេចតេជោ ហ៊ុន សែន បានថ្លែងថា ៖ « កាលពីជំនាន់សង្គ្រាម ចាប់ពីការធ្វើរដ្ឋប្រហារសម្ដេច ព្រះនរោត្តម សីហនុ នាឆ្នាំ១៩៧០មក គឺមិនមានភ្ញៀវទេសចរណាម្នាក់មកកាន់ប្រទេសកម្ពុជានោះទេ ប៉ុន្ដែបច្ចុប្បន្ននេះមានភ្ញៀវទេសចររាប់លាននាក់បានមកកាន់ប្រទេសកម្ពុជា ។ ជាក់ស្ដែង កាលពីឆ្នាំ២០១៥កន្លងទៅនេះ មានភ្ញៀវទេសចរអន្ដរជាតិជាង៤លាននាក់បានធ្វើដំណើរមកដល់ប្រទេសកម្ពុជា » ។
ទោះបីជាយ៉ាងណា សម្ដេចតេជោ ហ៊ុន សែន ក៏បានអំពាវនាវដល់មន្ត្រីគ្រប់ផ្នែកទាំងអស់ ដែលកំពុងបម្រើការនៅអាកាសយានដ្ឋានអន្ដរជាតិ ទាំងនៅរាជធានីភ្នំពេញ ខេត្ដសៀមរាប និងខេត្ដព្រះសីហនុ ត្រូវបន្ដបម្រើភ្ញៀវឲ្យបានល្អ ហើយត្រូវពង្រឹងការថែរក្សាសុខសុវត្ថិភាពជូនភ្ញៀវគ្រប់ជាតិសាសន៍ ដើម្បីឲ្យពួកគេបន្ដមកកាន់ប្រទេសកម្ពុជាម្ដងហើយម្ដងទៀត ហើយលើកក្រោយពួកគេក៏អាចនាំមិត្ដភក្ដិឲ្យស្គាល់តំបន់ទេសចរណ៍នានានៅក្នុងព្រះរាជាណាចក្រកម្ពុជាផងដែរ ។
ថ្លែងប្រាប់ទីភ្នាក់ងារសារព័ត៌មានស៊ីនហួ លោក Xavier Huillard ប្រធាននិងជានាយកប្រតិបត្តិក្រុមហ៊ុនVINCI Airports គ្រុប របស់ប្រទេសបារាំងដែលជាក្រុមហ៊ុនមេរបស់ក្រុមហ៊ុនអាកាសយានដ្ឋាកម្ពុជាបានថ្លែងថា ៖ «ស្ថានីយអ្នកដំណើរថ្មីនេះ ត្រូវបានបំពាក់កន្លែងត្រួតពិនិត្យ(chick-in)ចំនួន៣២ និងបញ្ជរអន្តោប្រវេសន៍, ប្រព័ន្ធត្រួតពិនិត្យអីវ៉ាន់ និងម៉ាស៊ីនកាំរស្មីX សម្រាប់ទំនិញ ផ្សេងៗទៀត » ។
ការពង្រីកព្រលានយន្ដហោះនេះ គឺជាផ្នែកមួយនៃទឹកប្រាក់១០០លានដុល្លារអាមេរិក នៅក្នុងកម្មវិធីធ្វើឲ្យប្រសើរឡើង កាលពីឆ្នាំ២០១៤ ដើម្បីពង្រីកស្ថានីយអ្នកដំណើរនៅក្នុងអាកាសយានដ្ឋានចំនួន២គឺ នៅអាកាសយានដ្ឋានអន្តរជាតិភ្នំពេញ និងអាកាសយានដ្ឋានអន្តរជាតិខេត្តសៀមរាប ។ នេះបើតាមការបញ្ជាក់របស់នាយកប្រតិបត្តិនៃក្រុមហ៊ុន VINCI Airports គ្រុប ។
ស្ថានីយចេញដំណើរថ្មីនៃអាកាសយានដ្ឋានអន្ដរជាតិភ្នំពេញនេះ នឹងជួយបង្កើនសមត្ថភាពទ្វេដងសម្រាប់ត្រៀមទទួលភ្ញៀវទេសចរ៥លាននាក់ក្នុង១ឆ្នាំ និងសម្រាប់សមត្ថភាពបម្រើតម្រូវការទេសចរពី៥ទៅ៨ឆ្នាំទៅមុខទៀត ហើយក៏ជាសមិទ្ធផលថ្មីមួយទៀត ក្នុងចំណោមសមិទ្ធផលនានាដែលរាជរដ្ឋាភិបាលសម្រេចបាន ។
ជាមួយគ្នានេះ នឹងបានរួមចំណែកបន្ថែមទៀតក្នុងការជំរុញអភិវឌ្ឍន៍វិស័យអាកាសចរណ៍ស៊ីវិល និងវិស័យទេសចរណ៍ ដែលវិស័យទាំង២នេះ បាននិងកំពុងតែដើរតួនាទីយ៉ាងសំខាន់ក្នុងសកម្មភាពអភិវឌ្ឍន៍សេដ្ឋកិច្ចសង្គមនៅកម្ពុជា ៕
ចែករំលែកព័តមាននេះ