រកឃើញប្រុសស្រីចំនួន២២នាក់ ត្រូវមេខ្យល់យកមកប្លុងចោលក្នុងផ្ទះមួយកន្លែង
- បន្ទាយមានជ័យ
នគរបាលស្រុកស្វាយចេក បានរកឃើញពលករខ្មែរប្រុស-ស្រីចំនួន២២នាក់ ដែលត្រូវមេខ្យល់នាំយកមកប្លុងចោលនៅផ្ទះមួយកន្លែង ស្ថិតក្នុង
ខេត្តបន្ទាយមានជ័យ ៖ នគរបាលស្រុកស្វាយចេក បានរកឃើញពលករខ្មែរប្រុស-ស្រីចំនួន២២នាក់ ដែលត្រូវមេខ្យល់នាំយកមកប្លុងចោលនៅផ្ទះមួយកន្លែង ស្ថិតក្នុងភូមិតេជោភ្នំឆ័ត្រ៣១៧ ឃុំស្វាយចេក ស្រុកស្វាយចេក ខេត្តបន្ទាយមានជ័យ នៅវេលាម៉ោង០៤និង៣០នាទីល្ងាច ថ្ងៃទី១៣ ខែតុលា ឆ្នាំ២០២១ ។
លោកវរសេនីយ៍ឯក ជា ស្លូញ អធិការនគរបាល ស្រុកស្វាយចេកបានឲ្យដឹងថា នៅថ្ងៃទី១៣ ខែតុលា ឆ្នាំ ២០២១ វេលាម៉ោង៤និង៣០នាទីល្ងាច កម្លាំងអធិការដ្ឋាននគរបាលស្រុកស្វាយចេក បានទទួលព័ត៌មានពីលោកមេភូមិតេជោភ្នំឆ័ត្រ៣១៧ ស្ថិតនៅក្នុងឃុំស្វាយចេក ស្រុកស្វាយចេក ខេត្តបន្ទាយមានជ័យ បានរាយការណ៍ប្រាប់ថា នៅចំណុចផ្ទះរបស់ឈ្មោះ សួន ម៉ាង ភេទប្រុស អាយុ៣៩ឆ្នាំ ស្ថិតក្នុងភូមិតេជោភ្នំឆ័ត្រ៣១៧ មានពលករបម្រុងឆ្លងដែនទៅប្រទេសថៃ មានចំនួន២២នាក់ (ស្រី០៨នាក់) ក្នុងនោះមានកុមារចំនួន០៤នាក់ និងស្រី០២នាក់ ។
លោកអធិការបានបន្តថា ក្រោយពីទទួលបានព័ត៌មាននេះភ្លាម កម្លាំងអធិការដ្ឋាន និងនគរបាលប៉ុស្តិ៍រដ្ឋបាលឃុំស្វាយចេក បានចុះទៅដល់ផ្ទះនោះ ហើយក៏បានឃើញពលករខ្មែរសរុបមាន២២នាក់ ក្នុងនោះមកពីខេត្តឧត្តរមានជ័យចំនួន០៦នាក់ (ស្រី០៣នាក់), មកពីខេត្តបាត់ដំបង ០១នាក់ (ប្រុស), មកពីខេត្តព្រះវិហារចំនួន០៦នាក់ (ស្រី០៣នាក់) និងមកពីខេត្តខេត្តបន្ទាយមានជ័យ ចំនួន០៩នាក់ (ស្រី០២នាក់» ។
លោកអធិការបានបញ្ជាក់ទៀតថា តាមការសួរនាំពលករទាំងនោះបានប្រាប់ថា ពួកគាត់មានបំណងទៅរកការងារធ្វើនៅប្រទេសថៃ ដោយក្នុងម្នាក់ៗត្រូវបានមេខ្យល់យកក្នុងតម្លៃ៦,៥០០បាត នៅពេលទៅដល់ប្រទេសថៃ ។ ចំណែកអ្នកនៅស្រុកព្រះនេត្រព្រះ ខេត្តបន្ទាយមានជ័យ ចំនួន០៧នាក់វិញ ក៏បាននិយាយថា គាត់ជិះឡានមកដល់ភូមិតេជោភ្នំឆ័ត្រនេះ ដោយថ្លៃឡានម្នាក់ចំនួន២០ម៉ឺនរៀល ។
ពាក់ព័ន្ធក្នុងករណីខាងលើនេះ សមត្ថកិច្ចមិនទាន់បានមុខសញ្ញាជនសង្ស័យជាម្ចាស់ និងជាម្ចាស់រថយន្តនោះទេ ព្រោះពួកគេបានរត់គេចខ្លួនបាត់អស់ បន្សល់ទុកតែរថយន្តម៉ាកនីស្សាន់មួយបាំងកន្លះ ពណ៌សស៊េរីឆ្នាំ១៩៩៥ ពាក្យស្លាកលេខសៀមរាប 2A3605 ចង្កូតស្ដាំចំនួន០១គ្រឿង ហើយត្រូវយកមករក្សាទុកនៅកន្លែងអធិការដ្ឋានគរបាលស្រុកស្វាយចេក ។ ចំណែកពលករទាំង២២នាក់វិញ ក្រោយធ្វើការសួរនាំរួច ត្រូវបានបានបញ្ជូនទៅធ្វើចត្តាឡីស័កនៅវិទ្យាល័យស្វាយចេក។ ហើយចំពោះមុខសញ្ញាជាមេខ្យល់នគរបាលកំពុងតែបន្តស្រាវជ្រាវហើយ៕
ចែករំលែកព័តមាននេះ