ខេត្តសៀមរាប ៖ បុរសឈាមរាវ២នាក់ បាននាំគ្នាពួនស្ទាក់វ៉ៃមន្ត្រីនគរបាលប៉ុស្តិ៍រដ្ឋបាលឃុំគោកដូងម្នាក់ ខណៈកំពុងដើរល្បាតក្នុងមូលដ្ឋានឱ្យរងរបួសធ្ងន់ មូលហេតុផ្តើមចេញពីភ្លើងគំនុំអស់
ខេត្តសៀមរាប ៖ បុរសឈាមរាវ២នាក់ បាននាំគ្នាពួនស្ទាក់វាយមន្ត្រីនគរបាលប៉ុស្តិ៍រដ្ឋបាលឃុំគោកដូងម្នាក់ ខណៈកំពុងដើរល្បាតក្នុងមូលដ្ឋានឱ្យរងរបួសធ្ងន់ មូលហេតុផ្តើមចេញពីភ្លើងគំនុំអស់រយៈពេលជាច្រើនឆ្នាំកន្លងមកហើយ ដែលមន្ដ្រីនគរបាលស្រុកអង្គរជុំ បានចាប់សាច់ញាតិរបស់ខ្លួនដាក់គុក ទើបពួកគេមានគំនុំយ៉ាងដូច្នេះ។ ករណីឃាត់ខ្លួនយុវជនឈាមរាវទាំង២នាក់នេះ កើតឡើងនៅយប់ថ្ងៃទី១៥ ខែមីនា ឆ្នាំ២០១៦ នៅចំណុចភូមិដូនអែម ឃុំគោកដូង ស្រុកអង្គរជុំ ខេត្តសៀមរាប។
លោកវរសេនីយ៍ត្រី ម៉ាន់ សុខាត់ អធិការនគរបាលស្រុកអង្គរជុំ បានឱ្យដឹងនៅរសៀលថ្ងៃទី១៦នេះថា ក្នុងហេតុការណ៍នោះ ដែលបានកើតឡើងបន្ទាប់ពីកម្លាំងរបស់លោកបានចុះការពារ និងល្បាតតាមភូមិ ជូនប្រជាពលរដ្ឋនៅក្នុងមូលដ្ឋាន។ ជាក់ស្តែងនៅយប់ថ្ងៃទី១៥ ខែមីនា ឆ្នាំ២០១៦ ជនរងគ្រោះដែលត្រូវយុវជនស្ទាវស្ទាក់វាយនោះ គឺ លោក ផាត់ ភឿន អាយុ៥៥ឆ្នាំ ជាមន្ត្រីនគរបាលប៉ុស្តិ៍រដ្ឋបាលឃុំគោកដូង ត្រូវបានជនសង្ស័យ ១ក្រុមស្ទាក់វ៉ៃ រួចគេចខ្លួនចូលក្មុងព្រៃបាត់ នៅចំណុចភូមិដូនអែម ឃុំគោកដូង ស្រុកអង្គរជុំ។លោកបន្តថា នៅក្នុងពេលនោះមន្ត្រីនគរបាលដែលរងគ្រោះ បានធ្វើការទំនាក់ទំនងតាមទូរស័ព្ទទៅកម្លាំងសមត្ថកិច្ចរួមការងារក្នុងការចុះជួយអន្តរាគមន៍ភ្លាមៗ នោះកម្លាំងសមត្ថកិច្ចបានចុះសហការគ្នារួចព័ទ្ធ កន្លែងដែលក្រុមក្មេងទាំងនោះបានរត់ចូលព្រៃ ទើបឈានដល់ធ្វើការចាប់ខ្លួនបានជនសង្ស័យចំនួន០២នាក់ភ្លាមៗ នាំមកធ្វើការសាកសួរនៅអធិការដ្ឋាននគរបាលស្រុកអង្គរជុំតែម្តង។ លោកបានបន្ថែមទៀតថា ជនសង្ស័យទាំង២នាក់ដែលវាយទៅលើនគរបាល មានទី១/ឈ្មោះ ឡាក់ ផាន ភេទប្រុស អាយុ២៣ឆ្នាំ និងទី២/ឈ្មោះ អួន ឃាត់ ភេទប្រុស អាយុ២៣ឆ្នាំ ជនទាំង០២នាក់រស់នៅភូមិដូនអែម ឃុំគោកដូង ស្រុកអង្គរជុំ ខេត្តសៀមរាប។
លោកបានបញ្ជាក់ថា ក្រោយពីធ្វើការសួរនាំរួមមក ជនសង្ស័យទាំង២នាក់បានសារភាពថា មូលហេតុដែលពួកគេស្ទាក់វាយនគរបាលរូបនោះ ដោយសារខឹងនគរាបាលរូបនោះ ដែលបានចាប់បងប្អូនគេ កាលពីឆ្នាំ២០១៣ រួចបញ្ជូនទៅសាលាដំបូងខេត្ត ពាក់ព័ន្ធករណីឃាដកម្មស្ទាក់វាយពលរដ្ឋបណ្តាលឱ្យស្លាប់ចំនួន២នាក់ ដូច្នេះពួកខ្ញុំក៏មានចិត្តខឹងក៏ធ្វើដូច្នេះទៅ។ បច្ចុប្បន្នជនសង្ស័យទាំង២នាក់ ត្រូវបានកម្លាំងជំនាញ បញ្ជូនទៅសាលាដំបូងខេត្ត ដើម្បី ចាត់ការតាមនីតិវិធីច្បាប់៕
ចែករំលែកព័តមាននេះ