ករណីប្លន់ប្រដាប់អាវុធ លើថៅកែដំឡូងមី
ខេត្តស្ទឹងត្រែង ៖ មុននេះបន្តិច ថ្ងៃទី១៦ មីនា មានករណីប្លន់ប្រដាប់អាវុធលើថៅកែដំឡូងមី ដោយបានប្រមូលយកទ្រព្យសម្បតិ្ដអស់មួយចំនួន
ខេត្តស្ទឹងត្រែង ៖ មុននេះបន្តិច ថ្ងៃទី១៦ មីនា មានករណីប្លន់ប្រដាប់អាវុធលើថៅកែដំឡូងមី ដោយបានប្រមូលយកទ្រព្យសម្បតិ្ដអស់មួយចំនួន។ ក្រុមចោរប្លន់មានគ្នាបីនាក់ប្រដាប់ដោយអាវុធ បានប្លន់ផ្ទះថៅកែដំឡូងមី នៅចំណុចផ្លូវលេខ៧៨ ចម្ងាយពីអូពងមាន់ប្រហែល៥គីឡូម៉ែត្រ ត្រង់ចំណុចភូមិរាជាណុកូល សង្កាត់ស្ទឹងត្រែង ក្រុងស្ទឹងត្រែង។
តាមប្រភពព័ត៌មានបានឱ្យដឹងថា ក្រុមចោរប្លន់មានគ្នា៣នាក់ប្រដាប់អាវុធ៣ដើម កាំភ្លើងខ្លី២ដើម អាកាមួយដើម បានធ្វើសកម្មភាពប្លន់ទៅលើជនរងគ្រោះ ដោយបានប្រតាយប្រតបគ្នា និងបានបាញ់ចំនួនមួយគ្រាប់ចំចុងដង្ហើមធ្លាយទៅក្រោយបណ្ដាលឱ្យរងរបួសធ្ងន់ រួចប្រមួលទ្រព្យសម្បត្ដគេចខ្លួនដោយសុវត្ថិភាព។
ជនរងគ្រោះឈ្មោះ លាង សុខឡែន អាយុ២៥ឆ្នាំ ជាអ្នកដើរប្រមូលទិញដំឡូងមី មានទីលំនៅភូមិថ្មី ឃុំរំចេក ស្រុកកំពង់សៀម ខេត្តកំពុងចាម ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យខេត្ត។ ភ្លាមៗនោះលោកស្នងកាខេត្តរួមជាមួយសមត្ថកិច្ចបានដាក់កម្លាំងធ្វើការពួនស្ទាក់និងតាមដានគ្រប់ច្រកល្លក ដើម្បីស្វែងរកក្រុមចោរប្លន់ទាំងនោះ ចំណែកទ្រព្យសម្បត្ដដែលក្រុមចោរប្លន់បាន មានប្រាក់៥០ម៉ឺនរៀលនិងទ្រព្យសម្បត្ដិមួយចំនួនថែមទៀត។
គួរំលឹកផងដែរថា នៅគ្រប់តំបន់តែងតែមានករណីប្លន់កើតឡើងជារឿយៗដែលធ្វើឱ្យប្រជាពលរដ្ឋមានការភ័យខ្លាម ដូច្នេះសមត្ថកិច្ចគួចាត់វិធានការរឹតបន្ដឹងបន្ថែម ដើម្បីធានាឱ្យបាននូវសុវត្ថិភាព៕
ចែករំលែកព័តមាននេះ