បុណ្យកឋិនទាន ឆ្នាំនេះ ហាមឃាត់ផ្សព្វផ្សាយកម្មវិធីបុណ្យ និងដង្ហែតាមដងផ្លូវ ឬជុំវិញព្រះវិហារ
- ភ្នំពេញ
ភ្នំពេញ៖ ក្រសួងធម្មការ និងសាសនា នៅថ្ងៃទី១៤ ខែតុលានេះ បានចេញសេចក្តីណែនាំបន្ថែម ស្តីអំពី ពិធីបុណ្យកឋិន។ បុណ្យកឋិនទាន នៅឆ្នាំនេះ…
ភ្នំពេញ៖ ក្រសួងធម្មការ និងសាសនា នៅថ្ងៃទី១៤ ខែតុលានេះ បានចេញសេចក្តីណែនាំបន្ថែម ស្តីអំពី ពិធីបុណ្យកឋិន។ បុណ្យកឋិនទាន នៅឆ្នាំនេះ…
ភ្នំពេញ៖ ក្រសួងធម្មការ និងសាសនា នៅថ្ងៃទី១៤ ខែតុលានេះ បានចេញសេចក្តីណែនាំបន្ថែម ស្តីអំពី ពិធីបុណ្យកឋិន។ បុណ្យកឋិនទាន នៅឆ្នាំនេះ ត្រូវបានក្រសួងធម្មការ និងសាសនា ហាមឃាត់ មិនឲ្យផ្សព្វផ្សាយកម្មវិធីបុណ្យ និងដង្ហែតាមដងផ្លូវ ឬជុំវិញព្រះវិហារ ឡើយ។ វិធានការនេះ ដើម្បីទប់ស្កាត់ការឆ្លងរាលដាលជំងឺកូវីដ១៩។
សេចក្តីណែនាំ លើកឡើងថា បុណ្យកឋិនទាន ជាកាលទានមួយដ៏ថ្លៃថ្លាក្នុងព្រះពុទ្ធសាសនាមាន ផលានិសង្សខ្ពស់ ទាំងទាយក ទាយិកា និងបដិគ្គាហក ជាទីជ្រះថ្លារបស់ពុទ្ធបរិស័ទខ្មែរ តែងតែប្រារព្ធធ្វើឡើង រៀងរាល់ឆ្នាំ មានរយ:ពេលកំណត់តែ ២៩ថ្ងៃ ដោយវត្តនីមួយៗ ទទួលអង្គកឋិនបានតែមួយលើកប៉ុណ្ណោះ។
ក្រសួងធម្មការ និងសាសនា បន្ថែមថា សម្រាប់ឆ្នាំ២០២១នេះ ពិធីបុណ្យកឋិនទាន នឹងប្រព្រឹត្តទៅចាប់ពីថ្ងៃសុក្រ ១រោច ខែអស្សុជ ដល់ថ្ងៃសុក្រ ១៥កើត ខែកត្តិក ត្រូវនឹងថ្ងៃទី២២ ខែតុលា ដល់ថ្ងៃទី១៩ ខែវិច្ឆិកា ឆ្នាំ២០២១។
សេចក្តីណែនាំ លើកឡើងថា ដើម្បីរៀបចំបុណ្យកឋិនទានឱ្យដំណើរការ នឹងប្រព្រឹត្តទៅស្របតាមទំនៀមទម្លាប់ប្រពៃណីព្រះពុទ្ធសាសនា និងចូលរួមបដិបត្តិតាមសេចក្ដីណែនាំនានារបស់រាជរដ្ឋាភិបាល ក្រសួងសុខាភិបាល និងអាជ្ញាធរដែនដី តាមសភាពជាក់ស្តែងនៃទីកន្លែងនីមួយៗ ក្នុងការអនុវត្តវិធានការចាំបាច់នានា សំដៅកាត់ផ្តាច់ និងក្នុងការទប់ស្កាត់ ការឆ្លងរីករាលដាលនៃជំងឺកូវីដ-១៩ នៅទូទាំងប្រទេស ជាពិសេសមេរោគបំប្លែងខ្លួនថ្មី ប្រភេទដែលតា (Delta) ដែលមានកម្រិតនៃការឆ្លងរាលដាលឆាប់រហ័ស និងយោងលើភាពចាំបាច់ ដើម្បីធានាការពារអាយុជីវិត និងសុខភាព របស់ប្រជាជន ខណៈដែលព្រះរាជាណាចក្រកម្ពុជា ឈានឆ្ពោះទៅបើកដំណើរការប្រទេសពេញលេញឡើងវិញ នាពេលខាងមុខ ក្រសួងធម្មការ និងសាសនា សូមធ្វើការណែនាំ ដូចខាងក្រោម៖
១-ត្រូវយកចិត្តទុកដាក់បង្កលក្ខណ:ឱ្យបានល្អប្រសើរ ប្រគេនព្រះសង្ឃ ជូនពុទ្ធបរិស័ទ ប្រារព្ធពិធីបុណ្យ កឋិនទានស្របតាមប្រពៃណីព្រះពុទ្ធសាសនា ដោយត្រូវអនុវត្តឱ្យបានយ៉ាងម៉ឺងម៉ាត់នូវវិធានការការពារនានា របស់ក្រសួងសុខាភិបាល វិធានការរដ្ឋបាល និងជាពិសេសត្រូវប្រកាន់ភ្ជាប់ជានិច្ចនូវវិធានការ “៣ការពារ ៣កុំ” របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
២- ហាមឃាត់ផ្សព្វផ្សាយកម្មវិធីបុណ្យ ដង្ហែតាមដងផ្លូវ ឬជុំវិញព្រះវិហារ ដោយគ្រាន់តែវេរប្រគេនត្រៃចីវរជាកិច្ចសម្រេចបុណ្យ។
សូមរម្លឹកថា នៅមុនពិធីបុណ្យកាន់បិណ្ឌ និងភ្ជុំបិណ្ឌ ចូលមកដល់ ក្រសួងធម្មការ និងសាសនា ក៏បានចេញសេចក្តីណែនាំ អំពីការរៀបចំពិធីបុណ្យកាន់បិណ្ឌ ភ្ជុំបិណ្ឌ និងពិធីបុណ្យកឋិនទាន ដើម្បីទប់ស្កាត់ការឆ្លងរាលដាលជំងឺកូវីដ១៩។ ក្នុងនោះ គ្រាន់តែចាប់ផ្តើមពិធីបុណ្យកាន់បិណ្ឌ បានតែ ២ថ្ងៃ គឺនៅថ្ងៃទី២២-២៣ ខែកញ្ញា ឆ្នាំ២០២១ ក៏រកឃើញព្រះសង្ឃ តាអាចារ្យ យាយជី និងអ្នកស្នាក់នៅវត្ត ជាច្រើន ឆ្លងកូវីដ១៩ ពិសេសនៅក្នុងរាជធានីភ្នំពេញ។ ភ្លាមៗ រាជរដ្ឋាភិបាល បានសម្រេចផ្អាកពិធីបុណ្យកាន់បិណ្ឌ និងភ្ជុំបិណ្ឌ តែនៅតែបន្តបើកឲ្យប្រជាពុទ្ធបរិស័ទយកចង្ហាន់ និងទេយ្យវត្ថុ ទៅវត្ត ប្រគេនព្រះសង្ឃ ដើម្បីឧទ្ទិសកុសលជូនបុព្វការីជន ញាតិការទាំង ៧សន្តាន ដែលបានចែកឋានទៅហើយ។
ក្នុងពេលបុណ្យភ្ជុំបិណ្ឌ ក៏រាជរដ្ឋាភិបាលអនុញ្ញាតឲ្យឈប់សម្រាក ហើយបើកឲ្យដើរលេង ពេលឈប់សម្រាកបុណ្យភ្ជុំបិណ្ឌ ពេញផ្ទៃប្រទេស។ មកដល់ពេលនេះ មិនទាន់រកឃើញករណីឆ្លងរាលដាលជំងឺកូវីដ១៩ ក្នុងទ្រង់ទ្រាយធំ ក្រោយបុណ្យភ្ជុំបិណ្ឌ នៅឡើយទេ ខណៈតាមក្រសួងមន្ទីរស្ថាប័នរដ្ឋ និងក្រុមហ៊ុនឯកជន រួមទាំងកម្មករកាត់ដេរ បានធ្វើតេស្តរកមេរោគកូវីដ១៩ រួចហើយក៏ដោយ៕
ចែករំលែកព័តមាននេះ