រាជធានីភ្នំពេញ ៖ យោងតាមការប្រកាសរបស់ស្ថានីយទូរទស្សន៍ប៉ុស្ដិ៍លេខ៥ គឺនៅថ្ងៃសៅរ៍ទី១៩ មីនា សប្ដាហ៍នេះ ព្រឹត្តិការណ៍ប្រដាល់ជើងឯកស៊ីម៉ង់ត៍អូដ្ឋវគ្គ៣ នឹងត្រឡប់មកកាន់សង្វៀនទូរទស្សន៍ប៉ុស្ដិ៍លេខ៥
រាជធានីភ្នំពេញ ៖ យោងតាមការប្រកាសរបស់ស្ថានីយទូរទស្សន៍ប៉ុស្ដិ៍លេខ៥ គឺនៅថ្ងៃសៅរ៍ទី១៩ មីនា សប្ដាហ៍នេះ ព្រឹត្តិការណ៍ប្រដាល់ជើងឯកស៊ីម៉ង់ត៍អូដ្ឋវគ្គ៣ នឹងត្រឡប់មកកាន់សង្វៀនទូរទស្សន៍ប៉ុស្ដិ៍លេខ៥ជ្រោយចង្វាដូចការគ្រោងទុកវិញហើយ ។ ប៉ុន្តែអ្វីដែលគេកត់សម្គាល់គឺការប្រកួតលើកនេះ មានកីឡាករបរទេសដល់ទៅ៣រូបមិនមែន២រូបដូចការប្រកួតជើងឯករបស់ព្រឹត្តិការណ៍នេះកាលពី២លើកមុនឡើយ ។
លោក សេង កដិកា អ្នករៀបចំការប្រកួតប្រចាំស្ថានីយទូរទស្សន៍ប៉ុស្ដិ៍លេខ៥ បានថ្លែងប្រាប់ឲ្យដឹងជាមុនថា ការប្រកួតជើងឯកវគ្គ៣របស់ក្រុមហ៊ុនស៊ីម៉ង់ត៍អូដ្ឋ ដែលនឹងត្រឡប់មកវិញនៅល្ងាចថ្ងៃសៅរ៍ខានស្អែកនេះ គឺធ្វើឡើងក្នុងប្រភេទទម្ងន់៦៧គីឡូក្រាម ដោយមានកីឡាករ៨រូបទាំងបរទេសនិងកម្ពុជា នឹងចែកពូលគ្នាប្រកួតសាជាថ្មី ។ លោកថា ការប្រកួតលើកនេះខុសប្លែកពីមុនដោយសារវត្តមានកីឡាករបរទេសលោកសម្រេចដាក់ដល់ទៅ៣រូបដែលតាមគម្រោងត្រូវដាក់រហូតដល់ទៅ៤រូបឯណោះ ប៉ុន្តែមកពីរកកីឡាករល្អៗបានតែ៣រូបទើបសម្រេចដាក់៣រូបសិន ដោយកំណត់ឲ្យចែក២ពូល គឺមួយពូលមានកីឡាករបរទេស២រូប និងមួយពូលទៀតមាន១រូប ។ លោកថា កីឡាករបរទេសទាំង៣រូបគឺ ២រូបជាកីឡាករថៃ និង១រូបទៀតជាកីឡាករជនជាតិស្លូវ៉ាគី។
សមាសភាពរបស់អ្នកទាំង៣នោះសុទ្ធតែបានជ្រើសចេញពីកីឡាករជើងឯកក្នុងប្រភេទទម្ងន់៦៧គីឡូក្រាម ដោយសូម្បីតែជនជាតិស្លូវ៉ាគីក៏ជាកីឡាករទទួលការហ្វឹកហាត់ និងប្រកួតនៅក្នុងប្រទេសថៃធ្វើឲ្យមានការកត់សម្គាល់រួចមកហើយ ។ លោកនៅតែអះអាងថា ហេតុផលនៃការពន្យារពេលមិនទាន់បើកប្រកួតជើងឯករបស់ក្រុមហ៊ុនស៊ីម៉ង់ត៍អូដ្ឋវគ្គ៣ រហូតមកដល់ថ្ងៃទី១៩ មីនានេះ គឺដោយសារតែហេតុផលរង់ចាំឲ្យកីឡាករបរទេសទាំង៣បញ្ចប់កុងត្រាត្រូវប្រកួតនៅក្នុងប្រទេសថៃ ដើម្បីអាចមកប្រកួតនៅប៉ុស្ដិ៍លេខ៥បាន ។
វត្តមានរបស់កីឡាករបរទេសសម្រាប់ការប្រកួតវគ្គ៣នេះលោកអះអាងថា រួមមានកីឡាករថៃឈ្មោះTaharn Ek អាយុ២៦ឆ្នាំ កម្ពស់១,៦៨ម៉ែត្រ ធ្លាប់ប្រកួតបាន៧៩លើក ឈ្នះ៦៣លើក ចាញ់១៣លើក ស្មើ៣លើក និងធ្លាប់ផ្ដួលគូប្រកួតបាន១៣លើក ។ កីឡាករSuper Chai អាយុ២៦ឆ្នាំ កម្ពស់១,៦៨ម៉ែត្រ ធ្លាប់ប្រកួតបាន៧៥លើក ឈ្នះ៦០លើក ចាញ់១០លើក ស្មើ៥លើក និងធ្លាប់ផ្ដួលគូប្រកួតបាន១៥លើក។ ដោយឡែកសម្រាប់កីឡាករស្លូវ៉ាគីលោកថាមានឈ្មោះKevinn អាយុ២៣ឆ្នាំ កម្ពស់១,៧០ម៉ែត្រ ធ្លាប់ប្រកួតបាន៥៣លើក ឈ្នះ៤៥លើក ចាញ់១២លើក ស្មើ៣លើក និងធ្លាប់ផ្ដួលគូប្រកួតបាន១៣លើក ។
លោក សេង កដិកា បន្តថា ចំណែកសមាសភាពកីឡាករកម្ពុជាចំនួន៥រូបដែលចូលរួម ប្រកួតវគ្គ៣នេះក៏ខុសប្លែកជាងមុនផងដែរ ដោយសារតែប្រភេទទម្ងន់៦៧គីឡូក្រាមសំបូរ កីឡាករជើងខ្លាំងល្អៗ ដែលពិតជាធ្វើឱ្យការប្រកួតជើងឯកលើកនេះទាក់ទាញជាងលើកមុន ។ លោកថា វត្តមានរបស់កីឡាករកម្ពុជាទាំង៥រូបមាន ជើងខ្លាំងអ៊ុំ ចំរើន មកពីក្លិបតាឡីដំរីមានឫទ្ធិ អាយុ២២ឆ្នាំ ធ្លាប់ប្រកួតបាន៨៥លើក ឈ្នះ៧០លើក ចាញ់១២លើក ស្មើ៣លើក និងធ្លាប់ផ្ដួលគូប្រកួតឲ្យសន្លប់បាន៣១លើក ។ កីឡាករធី តុងហ៊ី មកពីក្លិបសាលវ័ន្ដកីឡា អាយុ២៥ឆ្នាំ ធ្លាប់ប្រកួតបាន១០៥លើក ឈ្នះ៧៨លើក ចាញ់២៥លើក ស្មើ២លើក និងធ្លាប់ផ្ដួលគូប្រកួតឲ្យសន្លប់បាន៥២លើក ។ កីឡាករ កន ចន្ថា មកពីសមាគមកីឡាប្រដាល់ក្រសួងការពារជាតិ អាយុ២៥ឆ្នាំ ធ្លាប់ប្រកួតបាន១០២លើក ឈ្នះ៨៦លើក ចាញ់១៣លើក ស្មើ៣លើក និងធ្លាប់ផ្ដួលគូប្រកួតឱ្យសន្លប់បាន៣០លើក ។ កីឡាករ ធា នុរាជ ដែលមានឈ្មោះដើមថា សូយ ភារម្យ មកពីក្លិបពោធិ៍ជ័យកីឡា អាយុ២៦ឆ្នាំ ធ្លាប់ប្រកួតបាន៩៥លើក ឈ្នះ៧៥លើក ចាញ់១៥លើក ស្មើ៥លើក និងធ្លាប់ផ្ដួលគូប្រកួតឱ្យសន្លប់បាន១៦លើក ។
កីឡាករកម្ពុជាចុងក្រោយគឺ លួន សុខខេង មកពីក្លិបសិង្ហកីឡា អាយុ២៧ឆ្នាំ ធ្លាប់ប្រកួតបាន១១០លើក ឈ្នះ៨០លើក ចាញ់២០លើក ស្មើ១០លើក និងធ្លាប់ផ្ដួលគូប្រកួតឱ្យសន្លប់បាន៤០លើក ។ លោក សេង កដិកា បញ្ជាក់ថា ការប្រកួតលើកនេះលោករំពឹងថា កីឡាករបរទេស នឹងឈានដល់វគ្គចុងក្រោយដូចគ្នានឹងការប្រកួតជើងឯកស៊ីម៉ង់ត៍អូដ្ឋកាលពីវគ្គ១ដូច្នេះដែរ ។ ស្រួលមិនស្រួលកីឡាករបរទេសម្នាក់ក្នុងចំណោម៣នាក់ នឹងអាចកាន់ពានតំណែងជើងឯក ដូចគ្នានឹងការប្រកួតរដូវកាលទី១ ដែលកីឡាករថៃបានក្លាយជាម្ចាស់ពានជើងឯកនោះផង ។
យ៉ាងណាក៏ដោយលោកបានបង្ហាញអារម្មណ៍ខកចិត្តចំពោះការប្រកួតជើងឯកស៊ីម៉ង់ត៍អូដ្ឋវគ្គ២ ដែលកីឡាករថៃ២រូបត្រូវគេឃើញធ្លាក់តាំងពីវគ្គឆ្លងពូលដែលមានន័យថាកីឡាករបរទេស២រូបដែលជ្រើសយកមកប្រកួតលើកមុនមិនសូវល្អ ។ លោកមានជំនឿលើសមាសភាពជ្រើសរើសក្នុងវគ្គ៣នេះភាគច្រើន បើទោះជាអ្នកតាមដានរង់ចាំអ៊ុតមើលដូចគ្នាថា តើកីឡាករបរទេសទាំង៣រូបពិតជាមកប្រកួតហើយឈានដល់វគ្គចុងក្រោយតាមការចង់បាន ឬយ៉ាងណា។ លោក សេង កដិកា បញ្ជាក់ថា ព្រឹត្តិការណ៍ប្រកួតជើងឯកស៊ីម៉ង់ត៍អូដ្ឋដែលទូរទស្សន៍ប៉ុស្ដិ៍លេខ៥រៀបចំឡើង គឺទោះជាត្រូវប្រកួតដូរប្រភេទទម្ងន់កីឡាករ និងដូររូបមន្តដោយឲ្យកីឡាករបរទេសកើនឡើងដល់ទៅ៣រូបក៏ដោយក៏ប្រាក់រង្វាន់គឺនៅតែដដែល ។
ចំណាត់ថ្នាក់លេខ១ នឹងទទួលបានពានធំមួយ ទឹកប្រាក់២.៥០០ដុល្លារ ។ ចំណាត់ថ្នាក់លេខ២ទទួលបានពានតូចមួយ ទឹកប្រាក់១.០០០ដុល្លារ ។ ចំណាត់ថ្នាក់លេខ៣ទទួលបានពានតូចមួយទឹកប្រាក់៥០០ដុល្លារ និងចំណាត់លេខ៤ទទួលបានពានតូចមួយ ទឹកប្រាក់៣០០ដុល្លារ ។ ក្នុងនោះចំណាត់ថ្នាក់លេខ១ ក៏ទទួលបានប្រាក់ខែចំនួន២០០ដុល្លាររយៈពេល៣ខែ និងទទួលបានឱកាសតំណាងឲ្យប៉ុស្ដិ៍លេខ៥ចេញទៅប្រកួតនៅក្នុងប្រទេសថៃលើសង្វៀនទូរទស្សន៍ប៉ុស្ដិ៍លេខ៨នៅទីនោះផងដែរ ៕
ចែករំលែកព័តមាននេះ