ADផ្ទាំងផ្សព្វផ្សាយពាណិជ្ជកម្ម

Picture

ជនអនាថា​ចំនួន​៣៥​នាក់​ត្រូវ​បាន​ប្រមូល​ធ្វើតេស្ត រក​ឃើញ​វិជ្ជមាន​កូ​វី​ដ​១៩​ម្នាក់

2 ឆ្នាំ មុន
  • ភ្នំពេញ

កម្លាំង​គណៈ​បញ្ជាការ​ឯកភាព​ខណ្ឌដូនពេញ បាន​បន្ដ​ចុះ​ប្រមូល​ជនអនាថា តាម​ទីតាំង​សាធារណៈ​នានា​ក្នុង​មូលដ្ឋាន ដោយ​ប្រមូល​បាន​ជនអនាថា​ប្រុស​ស្រី​ក្មេង​ចាស់​សរុប​ចំនួន​៣៥​នាក់ បញ្ជូន​ទៅ

រាជធានី​ភ្នំពេញ ៖ កម្លាំង​គណៈ​បញ្ជាការ​ឯកភាព​ខណ្ឌដូនពេញ បាន​បន្ដ​ចុះ​ប្រមូល​ជនអនាថា តាម​ទីតាំង​សាធារណៈ​នានា​ក្នុង​មូលដ្ឋាន ដោយ​ប្រមូល​បាន​ជនអនាថា​ប្រុស​ស្រី​ក្មេង​ចាស់​សរុប​ចំនួន​៣៥​នាក់ បញ្ជូន​ទៅ​មន្ទីរ​សង្គមកិច្ច ដោយឡែក​ម្នាក់​ក្នុង​ចំណោម​៣៥​នាក់ មាន​វិជ្ជមាន​មេរោគ​កូ​វី​ដ​១៩ បន្ទាប់​ពី​យក​សំណាក​រួច​។

មន្ត្រី​រដ្ឋបាល​ខណ្ឌដូនពេញ បានឱ្យ​កោះសន្តិភាព​ដឹង​ថា នៅ​ព្រឹក​ថ្ងៃ​ទី​១៣ ខែតុលា ឆ្នាំ​២០២១ កម្លាំង​គណៈ​បញ្ជាការ​ឯកភាព​ខណ្ឌដូនពេញ ដឹកនាំ​ដោយ​លោក សុខ ពេញ​វុ​ធ អភិបាល នៃ​គណៈ​អភិបាល​ខណ្ឌដូនពេញ និង​ជា​ប្រធាន​គណៈ​បញ្ជាការ​ឯកភាព​រដ្ឋ​បាល​ខណ្ឌ បាន​បញ្ជា​ដឹកនាំ​កម្លាំង​ចម្រុះ​គណៈ​បញ្ជាការ​ឯកភាព​រដ្ឋបាល​ខណ្ឌ​-​សង្កាត់​ទាំង​១១ ចុះ​ពិនិត្យ និង​បន្ដ​ប្រតិបត្តិការ​ចុះ​ប្រមូល​ជនអនាថា​ដែល​ស្នាក់​នៅ និង​ដើរ​តាម​ទី​សាធារណៈ​បង្ក​បាត់​សណ្ដាប់ធ្នាប់ អនាម័យ បង្ក​ភាព​អនាធិបតេយ្យ​ក្នុង​មូល​ដ្ឋាន។

មន្ត្រី​ដដែល​បាន​បន្ត​ថា ក្រោយ​ពី​ចុះ​ប្រតិបត្តិការ កម្លាំង​យើង​បាន​ធ្វើការ​ប្រមូល​ជនអនាថា​បាន​សរុប​ចំនួន ៣៥​នាក់ រួម​មាន ៖ ប្រុស​ចំនួន​១៣​នាក់​, ស្រី​ចំនួន​១៦​នាក់ និង​កូន​ក្មេង​ចំនួន​០៦​នាក់ ។ ជា​លទ្ធផល​ការ​យក​សំណាក​ដោយ​ក្រុម​គ្រូពេទ្យ មាន​ជនអនាថា ០១​នាក់ ក្នុង​ចំណោម ៣៥​នាក់ មាន​វិជ្ជមាន​មេរោគ​កូ​វី​ដ​១៩ ហើយ​ក្រោយ​ពី​លទ្ធផល​យក​សំណាក​រួច ក៏​ត្រូវ​បាន​បញ្ជូន​ពួក​គាត់​បន្ដ​ទៅ​មន្ទីរ​សង្គមកិច្ច​រាជធានី​ភ្នំពេញ ដើម្បី​គ្រប់គ្រង ចំណែក​អ្នកមាន​វិជ្ជមាន​មេរោគ​កូ​វី​ដ​១៩ ម្នាក់​នោះ ក៏​ត្រូវ​បាន​បញ្ជូន​ទៅ​ព្យាបាល​នៅ​តាម​មណ្ឌល​ព្យាបាល​ផង​ដែរ ។

មន្ត្រី​ដដែល​បាន​បញ្ជាក់​ថា ជា​រឿយ​ៗ​កន្លង​មក អាជ្ញាធរ​ខណ្ឌ​-​សង្កាត់ តែងតែ​ចុះ​ប្រមូល​ជនអនាថា ស្ដ្រី​រកស៊ី​ផ្លូវភេទ និង​ជន​គ្មាន​ទីពឹង ដែល​ស្នាក់​នៅ​តាម​ទី​សាធារណៈ​ក្នុង​មូលដ្ឋាន​ជា​ប្រចាំ ជា​ពិសេស​ក្នុង​ដំណាក់កាល​ការ​រីក​រាលដាល​ជំងឺ​កូ​វី​ដ​១៩ ពួក​គាត់​ទាំងនេះ ត្រូវ​បាន​ចាត់​ទុក​ថា​ជា​ជន​ងាយ​រង​គ្រោះ និង​ជា​ប្រភព​ចម្លង​មេរោគ​កូ​វី​ដ​១៩​ផង​ដែរ ព្រោះ​ពួក​គាត់​ធ្វើ​ដំណើរ​គ្រប់កន្លែង ហើយ​ធ្វើការ​ប្រមូលផ្ដុំ​គ្នា​ស្នាក់​នៅ តាម​ទីតាំង​មិន​រៀបរយ គ្មាន​អនាម័យ​ជាដើម ដែល​ជា​ហេតុ​ធ្វើ​ឲ្យ​ឆ្លង​ជំងឺ​កូ​វី​ដ​១៩ ។ ជា​វិធានការ​ជាក់ស្ដែង កម្លាំង​គណៈ​បញ្ជាការ​ឯកភាព​រដ្ឋបាល​ខណ្ឌ បាន​និង​កំពុង​បន្ដ​ប្រមូល​ពួក​គាត់​ឲ្យ​មក​ធ្វើ​ច​ត្តា​ឡី​ស័ក និង​យក​សំណាក​រក​មេរោគ​កូ​វី​ដ​១៩ តាម​គោលការណ៍​ក្រសួងសុខាភិបាល រួច​បញ្ជូន​ឲ្យ​មន្ទីរ​សង្គមកិច្ច​រាជធានី​ភ្នំពេញ គ្រប់គ្រង​បន្ដ ។

អត្ថបទសរសេរ ដោយ

កែសម្រួលដោយ