ប្រធានាធិបតីរុស្ស៊ី លោកវ្ល៉ាឌីមៀរ ពូទីន ប្រកាសគួរឱ្យភ្ញាក់ផ្អើលជាទូទៅកាលពីយប់ថ្ងៃទី១៤ មីនា ពីការដកកងឯកភាពយោធាភាគច្រើនរបស់រុស្ស៊ីចេញពីស៊ីរី ក្រោយរយៈពេល២សប្តាហ៍នៃបទឈប់បាញ់គ្នានៅក្នុងប្រទេសនេះ
ប្រធានាធិបតីរុស្ស៊ី លោកវ្ល៉ាឌីមៀរ ពូទីន ប្រកាសគួរឱ្យភ្ញាក់ផ្អើលជាទូទៅកាលពីយប់ថ្ងៃទី១៤ មីនា ពីការដកកងឯកភាពយោធាភាគច្រើនរបស់រុស្ស៊ីចេញពីស៊ីរី ក្រោយរយៈពេល២សប្តាហ៍នៃបទឈប់បាញ់គ្នានៅក្នុងប្រទេសនេះ និងខណៈពេលការចរចាសន្តិភាពអន្តរស៊ីរី កំពុងធ្វើនៅក្រុងហ្សឺណែវនាថ្ងៃទី១៥ មីនា ហើយជម្លោះឈានចូលដល់ឆ្នាំទី៦ ។
ក្រុមប្រឹក្សាសន្តិសុខ អ.ស.ប ក៏ដូចជាអីុរ៉ង់តាមរយៈសម្តីរបស់រដ្ឋមន្ត្រីការបរទេសរបស់ខ្លួន លោក MOHAMMAD JAVAD ZARIF ចាត់ទុករឿងនេះជាវិជ្ជមាន ។
យោងតាមសេតវិមានថា នាយប់ថ្ងៃទី១៤ មីនា លោកពូទីន បានទូរស័ព្ទមកកាន់សមភាគីអាេមរិកលោកបារ៉ាក់ អូបាម៉ា រួចលោកលើកឡើងពីការដកកងកម្លាំងរុស្ស៊ីមួយផ្នែកធំចេញពីស៊ីរី ។ លោក JOSH EARNEST អ្នកនាំពាក្យសេតវិមាននាពេលមុននេះគូសបញ្ជាក់ថាវាជាការលំបាកក្នុងការស្ទង់ពីទំហំផលប៉ះពាល់នៃការប្រកាសនេះលើការចរចាដែលកំពុងធ្វើ ។
ប្រមុខរដ្ឋរុស្ស៊ីដែលបញ្ជូនកងយន្តហោះចម្បាំងមកកាន់ស៊ីរីពីថ្ងៃទី៣០ កញ្ញា ឆ្នាំ២០១៥ មក បានប្រកាសពីការដកទ័ពនេះ ក្រោយពីទាក់ទងតាមទូរស័ព្ទជាមួយប្រធានាធិបតីស៊ីរីលោកបាចា អាល់អាសាដ ។
លោកពូទីន ថ្លែងតាមទូរទស្សន៍ថា ភារកិច្ចរបស់ក្រសួងការពារប្រទេស និងកងទ័ពរុស្ស៊ីនៅស៊ីរីត្រូវបានបំពេញទាំងស្រុង ដូច្នេះខ្ញុំចេញបញ្ជាដល់ក្រសួងការពារប្រទេសឱ្យចាប់ផ្តើមពីថ្ងៃទី១៥ មីនា ទៅដកកងកម្លាំងរបស់យើងមួយផ្នែកធំចេញពីស៊ីរី ។
ទោះបីយ៉ាងណា យោងតាមសេចក្តីប្រកាសមួយរបស់វិមានក្រឹមឡាំងថា ដើម្បីអាចត្រួតពិនិត្យបទឈប់បាញ់គ្នាដែលចូលជាធរមានពីថ្ងៃទី២៧ កុម្ភៈ មក ភាគីរុស្ស៊ីនឹងរក្សាទុកលើដែនដីស៊ីរី នូវទីតាំងសម្រាប់ការឡើងចុះនៃយន្តហោះមួយ ។ វិមានក្រឹមឡាំងពុំបានបញ្ជាក់ថាតើយន្តហោះប្រភេទណាខ្លះដែលធានាការហោះហើរត្រួតពិនិត្យឡើយ។ វិមានក្រឹមឡាំងក៏មិននិយាយថា តើបណ្តាយន្តហោះប្រយុទ្ធរុស្ស៊ីនឹងស្ថិតនៅស៊ីរីទៀតឬយ៉ាងណាឡើយ ។
ចាប់តាំងពីខែកញ្ញាមក យន្តហោះប្រយុទ្ធរុស្ស៊ីជាង៥០គ្រឿង បានវាយប្រហារលើគោលដៅពួកភេរវករជាច្រើនពាន់រយៈពេល៥ខែនៃការវាយប្រហារតាមអាកាសយ៉ាងខ្លាំងក្លា ។ ការវាយប្រហារតាមអាកាសយ៉ាងខ្លាំងរបស់រុស្ស៊ីបែបនេះអាចឱ្យកងទ័ពស៊ីរីដណ្តើមបានជ័យជម្នះនានាក្នុងការវាយលុកក្រោយពីស្ថិតក្នុងស្ថានភាពដ៏លំបាកមួយមក ។
វិមានក្រឹមឡាំងគូសបញ្ជាក់ថា ការសម្រេចចិត្តរបស់ប្រធានាធិបតីរុស្ស៊ីជាកម្មវត្ថុនៃកិច្ចព្រមព្រៀងមួយជាមួយសមភាគីស៊ីរី ដែលយល់ថា អន្តរាគមន៍របស់កងទ័ពអាកាសរុស្ស៊ីអាចធ្វើឱ្យមានការផ្លាស់ប្តូរទាំងស្រុងនៃសភាពការណ៍ក្នុងការតស៊ូប្រឆាំងភេរវកម្ម បំផ្លាញបណ្តាហេដ្ឋារចនាសម្ព័ន្ធរបស់ពួកសត្រូវ ហើយធ្វើឱ្យពួកសត្រូវទទួលរងនូវអន្លូងយ៉ាងដំណំមួយ ។
នៅក្រុងញូវយ៉កឯកអគ្គរដ្ឋទូតរុស្ស៊ីប្រចាំ អ.ស.ប លោកវីតាលី ឈួរគីន គូសបញ្ជាក់ថា ខាងផ្នែកការទូតរុស្ស៊ីទទួលបទបញ្ជាឱ្យបង្កើនការខិតខំប្រឹងប្រែង ដើម្បីឱ្យសម្រេចបានដំណោះស្រាយនយោបាយមួយនៅស៊ីរី ។
នៅក្រុងហ្សឺណែវពួកប្រឆាំងស៊ីរីស្វាគមន៍ដោយប្រុងប្រយ័ត្នចំពោះការប្រកាសនេះ ដោយថ្លែងថា រង់ចាំត្រួតពិនិត្យមើលនៅលើទីលានផ្ទាល់ហើយសង្ស័យថា នេះជាល្បិចកលមួយរបស់វិមានក្រឹមឡាំង ។
ចំណែករដ្ឋមន្ត្រីការបរទេសអាល្លឺម៉ង់លោក FRANK WALTER STEINMEIER យល់ឃើញថា ប្រសិនបើការប្រកាសពីការដកកងទ័ពរុស្ស៊ីនេះត្រូវបានអនុវត្តមែននោះនឹងបង្កើនការគាបសង្កត់លើរបបលោកប្រធានាធិបតីអាល់ អាសាដ សម្រាប់ការចរចានៅក្រុងហ្សឺណែវស្តីពីការឆ្លងកាត់នយោបាយមួយ ។
ស៊ីរីកាលពីថ្ងៃទី១៤ មីនា បានបដិសេធពាក្យចចាមអារ៉ាមនានាលើសេចក្តីសម្រេចរបស់រុស្ស៊ីដកកងទ័ពចេញពីប្រទេសនេះថាមកពីជម្លោះ ឬបញ្ហារវាងក្រុងមូស្គូ និងក្រុងដាម៉ាស់ ។
ផ្នែកសារព័ត៌មានរបស់វិមានប្រធានាធិបតីស៊ីរីបានបដិសេធទាំងស្រុងការចោទប្រកាន់នានារបស់បណ្តាញអុីនធើរណេតពួកប្រឆាំងមួយចំនួន ដោយពន្យល់ថា ការសម្រេចចិត្តរបស់រុស្ស៊ីធ្វើឡើងបន្ទាប់ពីការសម្របសម្រួលគ្នាទាំងស្រុងជាមួយភាគីស៊ីរី ៕
ចែករំលែកព័តមាននេះ