ខេត្តកំពង់ឆ្នាំង ៖ ប្រជាពលរដ្ឋជាង៨០គ្រួសារមកពីច្រើនភូមិ ក្នុងឃុំជ្រៃបាក់ ស្រុករលាប្អៀរ នៅព្រឹកថ្ងៃទី១៣ ខែតុលា ឆ្នាំ២០២១ បាននាំគ្នាតវ៉ានៅចំណុចអន្លង់ភ្លង ក្នុងឃុំជ្រៃបាក់…
ខេត្តកំពង់ឆ្នាំង ៖ ប្រជាពលរដ្ឋជាង៨០គ្រួសារមកពីច្រើនភូមិ ក្នុងឃុំជ្រៃបាក់ ស្រុករលាប្អៀរ នៅព្រឹកថ្ងៃទី១៣ ខែតុលា ឆ្នាំ២០២១ បាននាំគ្នាតវ៉ានៅចំណុចអន្លង់ភ្លង ក្នុងឃុំជ្រៃបាក់ ជាចំណុចដែលពួកគាត់ជីកយកដីដើម្បីផលិតស្មូនឆ្នាំង ហើយត្រូវបានភាគី ក្រុមហ៊ុនជីកប្រឡាយបិទផ្លូវ មិនអនុញ្ញាតឲ្យពួកគាត់ចូលយកដីមកធ្វើស្មូនឆ្នាំងដូចសព្វដងឡើយ ។ ប្រជាពលរដ្ឋទាំងនោះបានបញ្ជាក់ថា ពួកគាត់ជាអ្នកស្មូនឆ្នាំង រស់ក្នុង ភូមិចំនួន៨ ក្នុងឃុំជ្រៃបាក់ ស្រុករលាប្អៀរ , សុទ្ឋតែជាអ្នកប្រកបមុខរបរស្មូនឆ្នាំង តាំងពីដូនតាដល់បច្ចុប្បន្ន។
ចំពោះទីតាំងដែលពួកគាត់កំពុងយកដីធ្វើស្មូនឆ្នាំង ក្នុងរយៈពេលប៉ុន្មានថ្ងៃថ្មីៗនេះ ត្រូវបានក្រុមហ៊ុនជីកប្រឡាយបិទផ្លូវ មិនឲ្យពួកគាត់ចូលយកដីធ្វើស្មូនឆ្នាំងឡើយ ។ ពួកគាត់បានបញ្ជាក់ថា៖កន្លងទៅកាលពីប្រមាណជាង៣ឆ្នាំមុន ភាគីក្រុមហ៊ុនបានបិទផ្លូវមិនឲ្យគាត់យកដីម្ដងហើយ ក្រោយមកពួកគាត់ក៏បានស្នើសុំ និងតវ៉ាដោយមានការសម្របសម្រួលរបស់អាជ្ញាធរមូលដ្ឋាន ទើបភាគីខាងក្រុមហ៊ុន បានអនុញ្ញាតឱ្យដីទំហំ៤ ហិកតាសម្រាប់ ពួកគាត់ចូលយកដីធ្វើស្មូនឆ្នាំង ។ ប៉ុន្តែកាលណោះ ពួកគាត់បានទីតាំងដីទំហំ៤ហិកតា ពិតមែន ប៉ុន្តែ ដីក្នុងទីតាំងនោះមិនអាចធ្វើស្មូនឆ្នាំងបានទេ ព្រោះជាដីខ្មៅ ដីមិនស្អិត និង ពេលដុតទៅផ្ទុះ ប្រេះបែកជាដើម។ ម្ល៉ោះហើយពួកគាត់ ក៏ទៅជីកនៅកន្លែងផ្សេង ក្រៅពីទីតាំងដែលក្រុមហ៊ុនកំណត់ឱ្យ៤ហិកតា ។កាលណោះក្រុមហ៊ុនមិនដែលរករឿងឡើយ ព្រោះទីតាំងដែលកំណត់ឱ្យពួកគាត់៤ហិកតា ក៍ត្រូវបានក្រុមហ៊ុនជីកយកដីគ្រួសក្រហម ទៅប្រើការដែរ ។
ដោយឡែក ទើបតែថ្មីៗនេះ ក្រុមហ៊ុនបានបិទផ្លូវ មិនឲ្យគាត់យកដីធ្វើស្មូនឆ្នាំងជាថ្មីម្ដងទៀតទើបពួកគាត់តវ៉ា និងសូម សំណូមពរដល់អាជ្ញាធរ ស្រុក ខេត្ត និងមន្ត្រីជំនាញ ជួយសម្របសម្រួល ដោះដូរទីតាំងថ្មី ដែលមានដីអាចផលិតស្មួនឆ្នាំង បាន ដើម្បីប្រកបរបរ ចិញ្ចឹមជីវិតផង។ ជុំវិញបញ្ហានេះ ភាគីក្រុមហ៊ុនយើងមិនអាចសុំការបំភ្លឺបានទេ ប៉ុន្តែ លោក តាំង ប៊ុនទត មេឃុំជ្រៃបាក់ ដែលបានចូលសម្របសម្រួលជាមួយប្រជាពលរដ្ឋ បានបញ្ជាក់ប្រាប់អ្នកសារព័ត៌មានថា៖ ក្រោយពេលមានការសម្របសម្រួល ភាគីក្រុមហ៊ុនបានផ្ដល់ដីចំនួន៤ ហិកតា ឲ្យពួកប្រជាពលរដ្ឋ ចូលយកដីផលិតស្មូនឆ្នាំងពិតមែន ប៉ុន្តែដីនោះមិនអាចយកផលិតស្មូនឆ្នាំងបាន ទើបប្រជាពលរដ្ឋចេះតែទៅ ជីក កាយយកដី នៅទីតាំងផ្សេង ខុសពីទីតាំងកំណត់ក្នុង៤ហិកតា ដែលក្រុមហ៊ុនប្រគល់ឱ្យ។
ប្រជាពលរដ្ឋបានទៅជីកយកដី ធ្វើស្មូនឆ្នាំង ក្នុងរណ្តៅដីដែលក្រុមហ៊ុន បានជីកយកដីគ្រួសក្រហមនៅស្រទាប់ខាងលើ សល់ដីបាតរណ្តៅជាដីស្អិត ធ្វើស្មូនឆ្នាំងបាន ដែលអាចជាហេតុធ្វើឱ្យក្រុមហ៊ុនខឹងទើបសម្រេចជីកប្រឡាយបិទផ្លូវបែបនេះ។យ៉ាងនេះក្តីលោកសូមទទួលយកសំណូមពរប្រជាពលរដ្ឋ ទៅសម្របសម្រួលជាមួយក្រុមហ៊ុនដើម្បីដោះដូរយកទីតាំងថ្មីវិញ បើពុំនោះទេប្រជាពលរដ្ឋ គ្មានដី ផលិតស្មូនឆ្នាំង សម្រាប់ចិញ្ជឹមជីវិតបានឡើយ ហើយរបរស្មូនឆ្នាំងក៍ជាអត្តសញ្ញាណអ្នកកំពង់ឆ្នាំងផងដែរ។ សូមបញ្ជាក់ថា៖ មិនមែនតែអ្នករស់នៅឃុំជ្រៃបាក់នោះទេ ដែលមកយកដីនៅទីតាំងខាងលើទៅផលិតស្មូនឆ្នាំង គឺមានអ្នកភូមិក្តីត្នោត ភូមិអណ្តូងឬស្សី ក្នុងឃុំស្រែថ្មី ស្រុករលាប្អៀរ ក៏មកយកដីនៅទីនោះដែរ៕
ចែករំលែកព័តមាននេះ