រាជធានីភ្នំពេញ ៖ ច្បាប់ ស្តីពីការអនុម័តយល់ព្រមលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ត្រូវបានរដ្ឋសភាជាតិ និងព្រឹទ្ធសភា ផ្តល់សច្ចាប័ន ហើយកាលពីខែកញ្ញា កន្លងទៅ តែយ៉ាងណាមិញ គិតត្រឹមថ្ងៃទី ១២ ខែតុលា ម្សិលមិញនេះ កម្ពុជានៅមិនទាន់បានលិខិតស្នាម ពាក់ព័ន្ធនឹងកម្ពុជាដែលបានផ្តល់ សច្ចាប័ន លើកិច្ចព្រមព្រៀងនេះ ទៅកាន់អគ្គលេខាធិការដ្ឋានអាស៊ាននៅឡើយទេ ។
ថ្លែងប្រាប់សារព័ត៌មានកោះសន្តិភាពនៅរសៀលថ្ងៃទី ១៣ ខែតុលា ឆ្នាំ ២០២១ នេះ ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្ម បានបញ្ជាក់ថា កម្ពុជាគ្រោងនឹងបញ្ជូនកិច្ចព្រមព្រៀង RCEPT ទៅកាន់អគ្គលេខាធិការដ្ឋានអាស៊ាន ឆាប់ៗនេះ ព្រោះ ឯកឧត្ដម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានចុះហត្ថលេខាលើលិខិតជូនឯកឧត្ដមឧបនាយរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ស្នើឲ្យជូនដំណឹងទៅអគ្គលេខាធិការអាស៊ាន អំពីការបញ្ចប់នីតិវិធីផ្ទៃក្នុង ក្នុងការធ្វើសច្ចាប័នកិច្ចព្រមព្រៀង RCEP ។
សូមបញ្ជាក់ថា RCEP ត្រូវបានគេស្គាល់ជាភាសាខ្មែរ «កិច្ចព្រមព្រៀងស្តីពីភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់» និងជាភាសាអង់គ្លេស «Regional Comprehensive Economic Partnership»។ RCEP នេះ គឺជាកិច្ចព្រមព្រៀងដោះដូរពាណិជ្ជកម្មសេរី ដែលមានសមាជិកសរុបចំនួន ១៥ ប្រទេស រួមមានសមាជិកអាស៊ានទាំង១០ប្រទេស និងប្រទេសជាដៃគូអាស៊ានទាំង៥ គឺចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់ ។
ឯកឧត្តម ប៉ាន សូរស័ក្តិ ធ្លាប់មានប្រសាសន៍កន្លងមកថា កិច្ចព្រមព្រៀង RCEP មានសារៈសំខាន់ ដែលនឹងបង្កើតនូវក្របខណ្ឌភាពជាដៃគូដែលមានលក្ខណៈទំនើប ទូលំទូលាយ គុណភាពខ្ពស់ ព្រមទាំងផ្តល់អត្ថប្រយោជន៍សេដ្ឋកិច្ចឱ្យគ្នាទៅវិញទៅមក ដែលនឹងសម្រួលដល់ការពង្រីកខ្សែច្រវាក់ផ្គត់ផ្តង់ពាណិជ្ជកម្មនិងការវិនិយោគក្នុងតំបន់ ការផ្តល់សញ្ញាទៅកាន់ពិភពលោកអំពីការគាំទ្រប្រព័ន្ធពាណិជ្ជកម្មសេរីពហុភាគីដែលផ្អែកលើគោលការណ៍ច្បាប់ និងជាពិសេសការចូលរួមចំណែកក្នុងការស្តារសេដ្ឋកិច្ចកម្ពុជា និងតំបន់ឡើងវិញបានឆាប់រហ័សពីវិបត្តិកូវីដ-១៩។ និងកម្ពុជារំពឹងថា កិច្ចព្រមព្រៀងនេះអាចចូលជាធរមាននៅថ្ងៃទី ១ ខែមករា ឆ្នាំ ២០២២ ខាងមុខ។
ឯកឧត្តម បានបញ្ជាក់បន្តថា ឯកឧត្ដមរដ្ឋមន្ត្រីក្រសួងពាណិជ្ជកម្ម បានចុះហត្ថលេខាលើលិខិតជូនឯកឧត្ដមឧបនាយរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ស្នើឲ្យជូនដំណឹងទៅអគ្គលេខាធិការអាស៊ាន អំពីការបញ្ចប់នីតិវិធីផ្ទៃក្នុង ក្នុងការធ្វើសច្ចាប័នកិច្ចព្រមព្រៀង RCEP។
ឯកឧត្តម ក៏បានពន្យល់បន្ថែមថា « នីតិវិធីបន្ត គឺក្រសួងពាណិជ្ជកម្មនឹងធ្វើលិខិតជូនទៅក្រសួងការបរទេសនិងសហប្រតិបត្តិការអន្តរជាតិ ហើយក្រសួងការបរទេសនឹងធ្វើលិខិតទៅអគ្គលេខាធិការដ្ឋានអាស៊ាន ដោយភ្ជាប់នូវលិខិតតូបករណ៍បញ្ជាក់ពីការចូលជាធរមាននៃកិច្ចព្រមព្រៀងនេះរបស់កម្ពុជា» ៕
ចែករំលែកព័តមាននេះ