រាជធានីភ្នំពេញ ៖ វិស័យមីក្រូហិរញ្ញវត្ថុនៅកម្ពុជាបានដើរតួនាទីយ៉ាងសំខាន់ក្នុងការកៀរគរប្រាក់សន្សំរបស់សាធារណជន និងប្រភពទុនផ្សេងៗទៀតក្នុងទីផ្សារអន្តរជាតិ មកចាក់បញ្ចូលទៅក្នុងសេដ្ឋកិច្ចជាតិ
រាជធានីភ្នំពេញ ៖ វិស័យមីក្រូហិរញ្ញវត្ថុនៅកម្ពុជាបានដើរតួនាទីយ៉ាងសំខាន់ក្នុងការកៀរគរប្រាក់សន្សំរបស់សាធារណជន និងប្រភពទុនផ្សេងៗទៀតក្នុងទីផ្សារអន្តរជាតិ មកចាក់បញ្ចូលទៅក្នុងសេដ្ឋកិច្ចជាតិ តាមរយៈការផ្ដល់ហិរញ្ញប្បទាន និងឥណទានដល់ការវិនិយោគ ជាពិសេសដល់វិស័យផលិតកម្ម សហគ្រាសធុនតូច និងមធ្យម ដែលជាការជួយបង្កើនសមត្ថភាពផលិតកម្ម ការធ្វើទំនើបកម្មផលិតកម្ម និងការលើកកម្ពស់ស្ដង់ដាផលិតផលកម្ពុជា ដែលជាការរួមចំណែកបង្កើនប្រសិទ្ធភាពសេដ្ឋកិច្ចជាតិ ។
មានប្រសាសន៍ក្នុងពិធីបើកសន្និសីទ ស្ដីពី ការអភិវឌ្ឍនៃវិស័យមីក្រូហិរញ្ញវត្ថុនៅកម្ពុជា លោកជា ចាន់តូ ទេសាភិបាលធនាគារជាតិនៃកម្ពុជា បានឲ្យដឹងថា ៖ « ក្នុងរយៈពេល១០ឆ្នាំចុងក្រោយនេះ វិស័យហិរញ្ញវត្ថុនៅកម្ពុជាមានការអភិវឌ្ឍរីកចម្រើនគួរឲ្យកត់សម្គាល់ ទាំងផ្នែកវិសាលភាព ទំហំប្រតិបត្តិការ ផលិតផល និងបណ្ដាញសេវាប្រជាជនយល់ដឹងពីសារសំខាន់នៃវប្បធម៌ឥណទាន និងបានលើកកម្ពស់បរិយាប័ន្នហិរញ្ញវត្ថុ ហើយវិស័យនេះក៏ត្រូវបានដើរតួនាទីយ៉ាងសំខាន់ក្នុងការរួមចំណែកកាត់បន្ថយភាពក្រីក្ររបស់ប្រជាជន ។ មិនតែប៉ុណ្ណោះ វិស័យមីក្រូហិរញ្ញវត្ថុនៅកម្ពុជា ក៏ត្រូវបានទទួលស្គាល់ថា ជាវិស័យមីក្រូហិរញ្ញវត្ថុមួយដ៏រីកចម្រើនក្នុងពិភពលោក និងជាគំរូដ៏ល្អសម្រាប់បណ្ដាប្រទេសដទៃទៀតផងដែរ ។ សមិទ្ធផលទាំងនេះ កើតឡើងដោយការខិតខំប្រឹងប្រែងរួមគ្នា និងកិច្ចសហការរវាងធនាគារជាតិនៃកម្ពុជា ជាមួយអាជ្ញាធរពាក់ព័ន្ធ សមាគមមីក្រូហិរញ្ញវត្ថុកម្ពុជា និងដៃគូអភិវឌ្ឍន៍ជាតិ និងអន្តរជាតិ ជាពិសេស រាជរដ្ឋាភិបាលដែលតែងតែគាំទ្រដល់ការអភិវឌ្ឍវិស័យទាំងមូល » ។
យោងតាមរបាយការណ៍របស់ធនាគារជាតិនៃកម្ពុជា គិតមកដល់បច្ចុប្បន្ននេះ គ្រឹះស្ថានធនាគារ និងមីក្រូហិរញ្ញវត្ថុនៅកម្ពុជា មានធនាគារពាណិជ្ជ៣៦, ធនាគារឯកទេស១១, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ៨, គ្រឹះស្ថានមីក្រូហិរញ្ញវត្ថុ៥០, ប្រតិបត្តិករមីក្រូហិរញ្ញវត្ថុ១០៤, គ្រឹះស្ថានចំណុះច្បាប់ផ្សេងៗ ក្នុងនោះមានការិយាល័យតំណាងធនាគារបរទេស៨, ក្រុមហ៊ុនភតិសន្យា៩, អ្នកដំណើរការតតិយភាគី៥, ក្រុមហ៊ុនក្រេឌីតប្យ៊ូរ៉ូ១ និងអាជីវករប្តូរប្រាក់២០១០ ។
ការរីកចម្រើននៃវិស័យនេះ ត្រូវបានឆ្លុះបញ្ចាំងតាមរយៈកំណើនអត្រាបរិយាប័ន្នហិរញ្ញវត្ថុ ដែលត្រូវបានទទួលស្គាល់ថា ជាកម្លាំងចលកររួមចំណែកកាត់បន្ថយភាពក្រីក្រនៅកម្ពុជា។ ជាក់ស្ដែង ប្រជាជនពេញវ័យដែលកំពុងប្រើប្រាស់សេវាហិរញ្ញវត្ថុក្នុងប្រព័ន្ធ កើនពីប្រមាណ៨,៧%នៅឆ្នាំ២០០៦ ដល់ប្រមាណ៥១%ក្នុងឆ្នាំ២០១៥ ។ ឥណទានក្នុងវិស័យមីក្រូហិរញ្ញវត្ថុមានចំនួនប្រមាណ១២ទ្រីលានរៀល (សមមូលនឹង៣ប៊ីលានដុល្លារអាមេរិក) កើនឡើងលើសពី៣០ដង ធៀបនឹងឆ្នាំ២០០៦ និងប្រាក់បញ្ញើសរុបមានចំនួនប្រមាណ៥ទ្រីលានរៀល (សមមូលនឹង១,៣ប៊ីលានដុល្លារអាមេរិក) ។ នេះបើតាមលោកទេសាភិបាលធនាគារជាតិនៃកម្ពុជា ។
ទន្ទឹមនឹងការអភិវឌ្ឍរីកចម្រើននៃវិស័យមីក្រូហិរញ្ញវត្ថុកម្ពុជា លោកទេសាភិបាលធនាគារជាតិនៃកម្ពុជា បានលើកឡើងថា ៖ « មានអង្គការ សមាគម និងអ្នកឲ្យខ្ចីចងការក្រៅផ្លូវការមួយចំនួនបានឆ្លៀតឱកាសបង្កបញ្ហាដល់សង្គម ដូចជា ការផ្ដល់កម្ចីដោយយកការប្រាក់ខ្ពស់ ធ្វើឲ្យកូនបំណុលរបស់ខ្លួនធ្លាក់ក្នុងគ្រោះអាសន្ន រើពីបំណុលមិនរួច ហិនហោចទ្រព្យសម្បត្តិ និងធ្លាក់ក្នុងភាពក្រីក្រ ។ ក្រៅពីនេះ ក៏មានអង្គការ និងសមាគមមួយចំនួនទៀត ប្រើប្រាស់ឈ្មោះនាមករណ៍ដូចជា «ទីភ្នាក់ងារ» ឬ «អង្គការមនុស្សធម៌» នានា ដែលអាចធ្វើឲ្យប្រជាពលរដ្ឋយល់ច្រឡំថាជារបស់រដ្ឋ ជាគ្រឹះស្ថានផ្ដល់អំណោយមនុស្សធម៌ ឬមិនស្វែងរកប្រាក់ចំណេញ » ។
ថ្លែងនៅក្នុងកម្មវិធីនាឱកាសនោះដែរ សម្តេចតេជោ ហ៊ុន សែន បានកោតសរសើរដល់ធនាគារជាតិនៃកម្ពុជា ក្នុងរយៈពេលកន្លងមកនេះ ដែលបានដើរតួនាទីយ៉ាងសំខាន់ក្នុងវិស័យមីក្រូហិរញ្ញវត្ថុ ក្នុងការកាត់បន្ថយភាពក្រីក្ររបស់ប្រជាជន ។ កន្លងមក រាជរដ្ឋាភិបាលកម្ពុជាបានដាក់ចេញនូវយុទ្ធសាស្ត្រមួយចំនួនក្នុងការចូលរួមចំណែកអភិវឌ្ឍន៍វិស័យនេះ ។ ភាពរីកចម្រើននៃមីក្រូហិរញ្ញវត្ថុនេះ គឺដោយសារតែប្រទេសជាតិមានសុខសន្តិភាព ទើបអាចមានឱកាសក្នុងការអភិវឌ្ឍវិស័យនេះបាន ។
ទន្ទឹមនឹងនោះ សម្តេចតេជោក៏បានសង្កត់ធ្ងន់ថា ៖ « កន្លងទៅ មានអង្គការ ឬស្ថាប័នមីក្រូហិរញ្ញវត្ថុមួយចំនួនបានឲ្យលុយប្រជាពលរដ្ឋខ្ចី ដោយមិនមានលក្ខខណ្ឌគ្រប់គ្រាន់ តែដល់ពេលប្រជាពលរដ្ឋមិនមានលុយសងនោះ គឺបានរឹបអូសយកទ្រព្យសម្បតិ្ត ដីធ្លី ឬផ្ទះជាដើម ហាក់ដូចជាមានគម្រោងផែនការកេងចំណេញពីប្រជាពលរដ្ឋ» ។
ក្នុងនោះសម្តេចតេជោ ក៏បានអំពាវនាវដល់ភ្នាក់ងារ អង្គការ និងស្ថាប័នទាំងនេះ បញ្ឈប់សកម្មភាពខាងលើ ហើយអាជ្ញាធរមានសមត្ថកិច្ចមិនត្រូវពាក់ព័ន្ធ ឬការពារភ្នាក់ងារអង្គការទាំងអស់នោះឡើយ ។ ចំណែកក្រសួងពាក់ព័ន្ធ និងមន្ត្រីមានសមត្ថកិច្ច ត្រូវពិនិត្យតាមដានក្រុមហ៊ុន និងភ្នាក់ងារទាំងអស់នោះ ។
ក្នុងសន្និសីទនាឱកាសនោះ ក៏បានពិភាក្សាលើប្រធានបទសំខាន់ៗចំនួន៥ រួមមាន ៖
១-លទ្ធភាពក្នុងការប្រើប្រាស់ និងទទួលបានសេវាហិរញ្ញវត្ថុ ។
២-ការឲ្យខ្ចីក្នុង និងក្រៅប្រព័ន្ធ ។
៣-ចំណេះដឹងផ្នែកហិរញ្ញវត្ថុ និងកិច្ចការពារអតិថិជន ។
៤-សេវាធនាគារចល័ត ៖ ឱកាស និងការប្រឈម ។
៥-តួនាទីរបស់គ្រឹះស្ថានមីក្រូហិរញ្ញវត្ថុក្នុងសកម្មភាពសង្គម និងបរិស្ថាន ។
តាមរយៈសន្និសីទជាតិនេះ នឹងជួយពង្រឹងវិស័យមីក្រូហិរញ្ញវត្ថុឲ្យកាន់តែរឹងមាំ ជាមួយនឹងការទទួលខុសត្រូវខ្ពស់ ក្នុងការចូលរួមអភិវឌ្ឍន៍ជីវភាពរស់នៅរបស់ប្រជាពលរដ្ឋ និងកសាងប្រទេសជាតិឲ្យកាន់តែរីកចម្រើនលឿនថែមទៀត ៕
ចែករំលែកព័តមាននេះ