រាជធានីភ្នំពេញ ៖ ក្នុងខែកុម្ភៈ ឆ្នាំ២០១៦អគ្គនាយកដ្ឋានពន្ធដារប្រមូលចំណូលពន្ធ-អាករគ្រប់ប្រភេទបានចំនួន៣៨៣.៧០៨,៨៣លានរៀល (គិតជាដុល្លារស្មើនឹងប្រមាណ៩៥,៩៣លានដុល្លារ) ។ សម្រាប់រយៈពេល២ខែដំបូងឆ្នាំ២០១៦នេះ
រាជធានីភ្នំពេញ ៖ ក្នុងខែកុម្ភៈ ឆ្នាំ២០១៦អគ្គនាយកដ្ឋានពន្ធដារប្រមូលចំណូលពន្ធ-អាករគ្រប់ប្រភេទបានចំនួន៣៨៣.៧០៨,៨៣លានរៀល (គិតជាដុល្លារស្មើនឹងប្រមាណ៩៥,៩៣លានដុល្លារ) ។ សម្រាប់រយៈពេល២ខែដំបូងឆ្នាំ២០១៦នេះ ការប្រមូលចំណូលពន្ធ-អាករគ្រប់ប្រភេទសរុបបានចំនួន៨៤៩.៩៣៣,៣៥លានរៀល (គិតជាដុល្លារប្រមាណ២១២,៤៩លានដុល្លារ) ស្មើនឹង១៤,៩៤% នៃគោលដៅកំណត់ក្នុងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១៦ ។ បើធៀបនឹងឆ្នាំ២០១៥ឃើញថា ការប្រមូលចំណូលពន្ធអាករគ្រប់ប្រភេទសម្រាប់ឆ្នាំ២០១៦នេះ កើនឡើងប្រមាណ១៤,៩៤% ។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ កាលពីថ្ងៃទី១១ មីនា កន្លងមក ក្នុងកិច្ចប្រជុំបូកសរុបការងារសារពើពន្ធប្រចាំខែកុម្ភៈឆ្នាំ២០១៦ ។
របាយការណ៍បានឲ្យដឹងទៀតថា ចំណូលពន្ធ-អាករតាមប្រភេទពន្ធសំខាន់ៗមួយចំនួនក៏មានការកើនឡើងដែរ ដូចជា ពន្ធលើប្រាក់ចំណេញកើនឡើងប្រមាណ៩,៨% ពន្ធលើប្រាក់បៀវត្សកើនឡើងប្រមាណ១៥,០% អាករលើតម្លៃបន្ថែមកើនឡើងប្រមាណ១៤,៩% និងអាករពិសេសកើនឡើងប្រមាណ១៩,៣% ។ ម្យា៉ងទៀតចំណូលពន្ធតាមសកម្មភាពអាជីវកម្ម ក៏មានការកើនឡើងស្ទើរតែទាំងអស់ដែរ ។
ថ្លែងនាឱកាសនោះ លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានវាយតម្លៃខ្ពស់ដល់គ្រប់អង្គភាពពន្ធដារ ដែលបានខិតខំប្រឹងប្រែងប្រមូលចំណូលពន្ធមានការកើនឡើងគួរជាទីពេញចិត្ត ។
ដើម្បីប្រមូលចំណូលពន្ធបានគ្រប់តាមផែនការច្បាប់សម្រាប់ឆ្នាំ២០១៦ ក៏ដូចជាសម្រាប់បណ្តាឆ្នាំបន្តបន្ទាប់ អគ្គនាយកដ្ឋានពន្ធដារនឹងបន្តអនុវត្តយ៉ាងម៉ឺងម៉ាត់នូវគោលយោបាយកែទម្រង់ដ៏មុតស្រួចរបស់រាជរដ្ឋាភិបាល និងបានដាក់ចេញនូវវិធានការ និងទិសដៅអនុវត្តដូចជា ៖
– បន្តដាក់ឲ្យអនុវត្តការប្រើប្រាស់បង្កាន់ដៃបញ្ជាក់ការបង់ប្រាក់ពន្ធ (Tax Payment Receipt) តាមប្រព័ន្ធអនឡាញ ។
– បន្តអនុវត្តប្រកបដោយប្រសិទ្ធភាពខ្ពស់នូវយុទ្ធសាស្ត្រកៀរគរចំណូលរយៈពេលមធ្យមរបស់រាជរដ្ឋាភិបាល និងកម្មវិធីកែទម្រង់ហិរញ្ញវត្ថុសាធារណៈ ។
– បន្តពង្រឹងការអនុវត្ត និងផ្សព្វផ្សាយឲ្យបានកាន់តែទូលាយនូវប្រកាសស្តីពីការកំណត់វិធាន និងនីតិវិធីនៃការអនុវត្តបញ្ជីគណនេយ្យសាមញ្ញ ។
– បន្តពង្រឹងការគ្រប់គ្រង និងអនុវត្តវិធានវិក្កយបត្ររបស់សហគ្រាសឲ្យបានកាន់តែប្រសើរថែមទៀត ដើម្បីងាយស្រួលក្នុងការគ្រប់គ្រងវិក្កយបត្រអាករលើតម្លៃបន្ថែម (Tax Invoice) ។
– បន្តពង្រឹងការគ្រប់គ្រង និងអនុវត្តអាករពិសេសលើទំនិញស្រា ស្រាបៀរ និងបារី តាមរយៈការពិនិត្យកែសម្រួលអត្រា និងមូលដ្ឋានគិតអាករពិសេសលើស្រា ស្រាបៀ និងបារី ។
– បន្តធ្វើទំនើបកម្មប្រព័ន្ធព័ត៌មានវិទ្យាតាមរយៈការរៀបចំកែលម្អទិន្នន័យអ្នកជាប់ពន្ធ ទិន្នន័យអចលនទ្រព្យ និងទិន្នន័យយានជំនិះគ្រប់ប្រភេទដែលអគ្គនាយកដ្ឋានពន្ធដារមានស្រាប់ ព្រមទាំងស្នើសុំទិន្នន័យពីស្ថាប័នពាក់ព័ន្ធផ្សេងៗសម្រាប់រៀបចំប្រព័ន្ធគ្រប់គ្រងទិន្នន័យ (Data Base) ដែលមានលក្ខណៈល្អប្រសើរដើម្បីងាយស្រួលក្នុងការគ្រប់គ្រងប្រមូលចំណូលពន្ធ ។
– បន្តរៀបចំនីតិវិធីធ្វើអង្កេតស្រាវជ្រាវសហគ្រាសតាមដងផ្លូវ (Street Survey) ដើម្បីឲ្យសហគ្រាសដែលមិនបានចុះបញ្ជីត្រឹមត្រូវ ឬលាក់ខ្លួនមិនព្រមមកចុះបញ្ជីពន្ធដារ បានមកចុះបញ្ជីពន្ធដារបានគ្រប់ៗគ្នា ។
– បន្តពង្រឹងគ្រប់គ្រងធនធានមនុស្ស ធ្វើយា៉ងណា ឲ្យមន្ត្រីពន្ធដារគ្រប់រូបក្លាយជាមន្ត្រីដែលកាន់តែជំនាញ ស្វាហាប់ ពូកែ ស្មោះត្រង់ មានភាពម្ចាស់ការ និងមានមនសិការវិជ្ជាជីវៈ សំដៅធានាបាននូវសមធម៌ បង្កើនផលិតភាព ក៏ដូចជាប្រសិទ្ធភាពការងារ ។
– បន្តលើកកម្ពស់បញ្ជ្រាបវប្បធម៌ពន្ធដារ បន្ដពង្រឹងការអនុវត្តច្បាប់ស្តីពីសារពើពន្ធក្នុងចំណោមធុរជនគ្រប់មជ្ឈដ្ឋាន តាមរយៈការរៀបចំសិក្ខាសាលាផ្សព្វផ្សាយស្តីពីប្រព័ន្ធពន្ធដារកម្ពុជា ៕
ចែករំលែកព័តមាននេះ