រាជធានីភ្នំពេញ ៖ ទំហំពាណិជ្ជកម្មទ្វេភាគីកម្ពុជា-ឥណ្ឌា នៅក្នុងឆ្នាំ២០១៤ និង២០១៥ សរុបមានតម្លៃ១៦០,៤៩លានដុល្លារអាមេរិក ក្នុងនោះការនាំចេញរបស់ឥណ្ឌាមកកម្ពុជា មានតម្លៃ១៤២,៥៣លានដុល្លារអាមេរិក
រាជធានីភ្នំពេញ ៖ ទំហំពាណិជ្ជកម្មទ្វេភាគីកម្ពុជា-ឥណ្ឌា នៅក្នុងឆ្នាំ២០១៤ និង២០១៥ សរុបមានតម្លៃ១៦០,៤៩លានដុល្លារអាមេរិក ក្នុងនោះការនាំចេញរបស់ឥណ្ឌាមកកម្ពុជា មានតម្លៃ១៤២,៥៣លានដុល្លារអាមេរិក និងនាំចូលពីកម្ពុជាមានតម្លៃ១៧,៩៦លានដុល្លារអាមេរិក។ ការនាំចេញរបស់ប្រទេសឥណ្ឌាជាចម្បងគឺផលិតផលឱសថ សារធាតុគីមីប្រណីត ក្រណាត់ ក្រណាត់ឡែន សារធាតុជ័រ ត្បូងមានតម្លៃ ឧបករណ៍ធ្វើដំណើរ និងគ្រឿងយន្ត ។ ចំណែកឥណ្ឌានាំចូលជាចម្បង គឺសារធាតុដែលគ្មានផ្ទុកជាតិដែកពីប្រទេសកម្ពុជា ។ នេះបើតាមមន្ត្រីសភាពាណិជ្ជកម្មឥណ្ឌា បានថ្លែងក្នុងកម្មវិធី«វិនិយោគ និងជំនួញឥណ្ឌាប្រចាំឆ្នាំ២០១៦ » ដែលប្រារព្ធធ្វើនៅមជ្ឈមណ្ឌសន្និបាតនិងពិព័រណ៍កោះពេជ្រ កាលពីថ្ងៃទី១១ មីនា កន្លងមក ។
លោក Shiv Siddhant Kaul ប្រធានសភាពាណិជ្ជកម្មឥណ្ឌា (ICC) បានមានប្រសាសន៍ថា ៖ « កម្ពុជា ជាប្រទេសដែលទទួលបានគុណប្រយោជន៍បែបភូមិសាស្ត្រ ព្រោះជាប្រទេសដែលមានទីផ្សារធំអាចចូលទីផ្សារសហគមន៍អាស៊ានបាន ។ ទន្ទឹមនឹងនេះ កម្ពុជាមានដំណាក់កាលនៃការរីកច្រើនសេដ្ឋកិច្ចរបស់ខ្លួន និងជំហាននៃកិច្ចសហប្រតិបត្តិការសកល។ ដូច្នេះប្រទេសឥណ្ឌាចាំបាច់ត្រូវតែមើលនូវសក្តានុពលនេះ ហើយពង្រឹងជំនួញពាណិជ្ជកម្មជាមួយប្រទេសកម្ពុជា » ។
ថ្លែងនាឱកាសនោះលោក Soum Sambath អគ្គលេខាធិការសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានឲ្យដឹងថា ៖ « ប្រទេសឥណ្ឌាមានចំណាត់ថ្នាក់សេដ្ឋកិច្ចទី៩ នៅក្នុងសេដ្ឋកិច្ចពិភពលោក ដែលជាឱកាសធំសម្រាប់កម្ពុជា » ។
លោកបន្ដថា ៖ « ប្រជាជនកម្ពុជា៧៣%ធ្វើកសិកម្ម ហើយពួកគេនឹងទទួលបានអត្ថប្រយោជន៍ពីប្រទេសឥណ្ឌា ដោយហេតុថា ឥណ្ឌាកំពុងបើកវិស័យកសិកម្មផងដែរ ។ ប្រទេសកម្ពុជាបាននាំចូលបន្លែចំនួន៣០០តោនជារៀងរាល់ថ្ងៃ ដូច្នេះឥណ្ឌានឹងមានឱកាសវិនិយោគលើវិស័យនេះ ។ ក្រៅពីវិស័យកសិកម្ម ប្រទេសកម្ពុជាក៏មានសក្តានុពលយ៉ាងធំធេងចំពោះសហគ្រាសធុនតូចនិងមធ្យម (SME) ដែលបច្ចុប្បន្ន កម្ពុជាមានសហគ្រាសធុនតូចនិងមធ្យមចំនួន៦០០.០០០ ហើយអត្ថប្រយោជន៍ខ្លះៗពីពលរដ្ឋឥណ្ឌា នឹងត្រូវបានរំពឹងចេញពីវិស័យ SME នេះ » ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានរំពឹងថា ទំហំវិនិយោគពាណិជ្ជកម្មកម្ពុជា-ឥណ្ឌា នឹងកើនឡើងខ្លាំងក្នុងរយៈពេលប៉ុន្មានឆ្នាំខាងមុខ ។
លោកមានប្រសាសន៍ថា ៖ « ការវិនិយោគពាណិជ្ជកម្មឥណ្ឌាមកប្រទេសកម្ពុជា នឹងកើនឡើងច្រើន បន្ទាប់ពីរៀបចំកម្មវិធីនេះឡើងនៅរាជធានីភ្នំពេញ » ។ ទន្ទឹមនឹងនេះ លោកគិតថា នឹងទទួលបានលទ្ធផលផ្លែផ្កា ដើម្បីឲ្យសហគ្រាសកម្ពុជាអាចរកដៃគូត្រឹមត្រូវជាមួយក្រុមហ៊ុននៃប្រទេសឥណ្ឌា ។
ឯកអគ្គរដ្ឋទូតឥណ្ឌាប្រចាំកម្ពុជា លោក Naveen Srivastava បានថ្លែងថា ៖ « ប្រទេសឥណ្ឌានិងកម្ពុជា មានទំនាក់ទំនងនយោបាយ និងវប្បធម៌ដ៏ស៊ីជម្រៅ ហើយចំណងសេដ្ឋកិច្ចកាន់តែកើនឡើងរវាងប្រទេសទាំងពីរ ប៉ុន្តែវាស្ថិតនៅក្រោមសក្តានុពលនៅឡើយ » ។
លោកឯកអគ្គរដ្ឋទូត ក៏បានទទូចឲ្យសភាពាណិជ្ជកម្មនៃប្រទេសទាំងពីរធ្វើការជាមួយគ្នា ដើម្បីសម្របសម្រួលពាណិជ្ជកម្មឲ្យកាន់តែប្រសើរឡើង ។ លោកថា ៖ « ប្រទេសឥណ្ឌាមានសេដ្ឋកិច្ចរីកលូតលាស់លឿនជាងគេជាមួយនឹងអត្រារីកចម្រើន៧,៦%ក្នុងឆ្នាំ២០១៦នេះ ហើយរំពឹងថា នឹងកើនទៅ៧,៧% នៅឆ្នាំក្រោយ ។ ទន្ទឹមនឹងនេះ បច្ចុប្បន្នវិនិយោគិនឥណ្ឌាកំពុងតែស្វែងរកឱកាសពង្រីកខ្លួនមកកាន់ប្រទេស CLMV ផងដែរ » ។
លោកឯកអគ្គរដ្ឋទូតឥណ្ឌា ក៏បានលើកឡើងពីគុណប្រយោជន៍ប្រទេសកម្ពុជាថា ៖ « អាចផ្តល់ឲ្យវិនិយោគិននូវទីតាំងដ៏ល្អ របបវិនិយោគបើកចំហ ជាប្រទេសសេរីជាងគេក្នុងតំបន់អាស៊ាន ហើយទីផ្សារនៅកម្ពុជា និងការឈានចូលទីផ្សារដែលមានតម្លៃច្រើនដល់៦០០លាននាក់ ។ ប្រទេសក ម្ពុជាមានសេដ្ឋកិច្ចប្រើប្រាស់ដុល្លារូបនីយ-កម្ម ជាមួយនឹងឱកាសវិនិយោគបរទេស១០០% » ។
ក្នុងឱកាសនៃពិព័រណ៍នេះដែរ សភាពាណិជ្ជកម្មកម្ពុជា និងសភាពាណិជ្ជកម្មឥណ្ឌា បានព្រមព្រៀងគ្នាចុះអនុស្សរណៈយោគយល់ក្នុងគោលបំណងចម្បងគឺលើកម្ពស់ពាណិជ្ជកម្ម និងការវិនិយោគរវាងប្រទេសទាំងពីរ ដោយមានលោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា និង លោក Shiv Siddhanth Kaul, ប្រធានសភាពាណិជ្ជកម្មឥណ្ឌា ជាហត្ថលេខីនៃអនុស្សរណៈយោគយល់នេះ ៕
ចែករំលែកព័តមាននេះ