ខេត្តបាត់ដំបង ៖ ក្រុមកូនអ្នកមានទ្រព្យស្ដុកស្ដម្ភ និងកូនមន្ត្រីមានអំណាចខ្លះក្នុងខេត្តបាត់ដំបង យ៉ាងតិច១៦នាក់ ក្នុងនោះមានស្រី៤នាក់ផង ត្រូវកម្លាំងនគរបាលព្រហ្មទណ្ឌខេត្តឃាត់ខ្លួន កាលពីវេលាម៉ោង៩និង៣០នាទីយប់ថ្ងៃទី១៣ មីនា គ្រាដែលពួកគេកំពុងពពាក់ពពូនគ្នាចែកចាយ និងសេពថ្នាំញៀនយ៉ាងវក់វីនៅក្នុងបន្ទប់ខារ៉ាអូខ េល្បីឈ្មោះមួយកន្លែងស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ។
លោកឧត្តសេនីយត្រី ជេត វណ្ណនី ស្នងការរងខេត្តដែលដឹកនាំកិច្ចប្រតិបត្តិការនេះបានឱ្យដឹងថា បានធ្វើឡើងក្រោមការបញ្ជាផ្ទាល់ពីលោកស្នងការខេត្ត និងលោកព្រះរាជអាជ្ញាអមសាលាដំបូងខេត្ត ។ លោកថា ក្លិបខារ៉ាអូខេយីហោ «ប៉ាស៊ីហ្វិកណៃធ៏ថេសធ៏» ដែលមានទីតាំងក្នុងភូមិ-សង្កាត់ខាងលើ ត្រូវគេសង្ស័យថា បើកដៃឱ្យក្រុមអ្នកចែកចាយនិងប្រើប្រាស់គ្រឿងញៀនធ្វើសកម្មភាពដោយខុសច្បាប់ ដែលមានរយៈពេលយូរក្រែលកន្លងមកហើយ នេះបើតាមព័ត៌មានដែលបានបែកធ្លាយ ។
លោកស្នងការរងមានប្រសាសន៍ថា ក្រោយពីក្ដាប់បានព័ត៌មានជាក់លាក់ នូវសកម្មភាពទាំងនេះ លោកស្នងការនិងលោកព្រះរាជអាជ្ញារង ក៏បានបើកកិច្ចប្រតិបត្តិតាមឃ្លាំមើលរហូតឈានដល់ការបង្ក្រាបតែម្ដង ។ លោកថា កិច្ចប្រតិបត្តិការនេះ យើងបានឃាត់ខ្លួនមនុស្សចំនួន១៦នាក់ ក្នុងនោះមានស្រី៤នាក់ រួមទាំងដកហូតថ្នាំញៀនមួយចំនួនផង ដែលពួកគេកំពុងប្រើប្រាស់យ៉ាងភ្លើតភ្លើនវក់វី នៅក្នុងខារ៉ាអូខេចំនួន២បន្ទប់នៅក្បែរគ្នា ។
បើតាមប្រភពព័ត៌មានថា ម្ចាស់ក្លិបខារ៉ាអូខេយីហោ«ប៉ាស៊ីហ្វិកណៃធ៏ថេសធ៏» មានថៅកែឈ្មោះ រ៉េន ហៅ ហ៊ារ៉េន អាយុជាង៥០ឆ្នាំ។ ម្ចាស់ក្លិបនេះល្បីថាមានខ្នង ឬខ្សែក្រាស់គ្រាន់បើដែរ ដូច្នេះហើយទើបគាត់ហ៊ានប្រថុយបំពានច្បាប់ផ្ដល់ទីតាំងក្លិបខារ៉ាអូខេ របស់គាត់ឱ្យក្រុមទុច្ចរិតដែលខ្លះជាកូនអ្នកមានអំណាច និងខ្លះមានទ្រព្យសម្បត្តិស្ដុកស្ដម្ភធ្វើសកម្មភាពចែកចាយ និងប្រើប្រាស់ថ្នាំញៀនយ៉ាងអនាធិបតេយ្យបែបនេះ។ ប្រភពដដែលបង្ហើបឱ្យដឹងថា មិនមែនមានតែក្លិបខារ៉ាអូខេរបស់លោកថៅកែរ៉េនមួយទេ ដែលបើកដៃឱ្យក្រុមជនទុច្ចរិតចែកចាយ និងប្រើប្រាស់ថ្នាំញៀនបែបនេះ នៅមានក្លិបខារ៉ាអូខេ និងក្លិបកម្សាន្តជាច្រើនទៀតក្នុងក្រុងបាត់ដំបង ដែលកំពុងមានសកម្មភាពដូចគ្នានេះដែរ ។
ប្រភពពីបុគ្គលិកនៅក្នុងក្លិបខារ៉ាអូខេនេះបាននិយាយថា នៅពេលក្រុមអ្នកប្រើប្រាស់ថ្នាំញៀនចូលបន្ទប់ខារ៉ាអូខេម្ដងៗ ពួកគេបានម៉ៅម៉ោងផ្ដាច់ ដោយមិនអនុញាតឱ្យមានអ្នកបម្រើការចេញចូលឡើយ លើកលេងតែនារីកំណាន់ចិត្តរបស់ពួកគេ ដែលបម្រើការនៅទីនោះប៉ុណ្ណោះ ដែលអាចឱ្យចេញចូលបាន ។ ឬពួកគេនាំនារីកំណាន់ចិត្តពីខាងក្រៅចូលទៅរាំក្រវីនៅក្នុងបន្ទប់តែម្ដង ។ ប្រភពនេះបញ្ជាក់ថា ថៅកែក្លិបតែងណែនាំដល់បុគ្គលិកទាំងអស់ឱ្យរក្សាភាពស្ងៀមស្ងាត់ និងហាមដាច់ខាតមិនឱ្យនិយាយផ្ដេសផ្ដាស់ ដែលនាំឱ្យបែកធ្លាយពីរឿងប្រើប្រាស់ថ្នាំញៀនក្នុងបន្ទប់ខារ៉ារអូខេនេះ ។
ប្រភពដដែលនេះនិយាយថា ក្លិបខារ៉ាអូខេ«ប៉ាស៊ីហ្វិកណៃធ៏ថេសធ៏» បានបើកឱ្យមានសកម្មភាពប្រើប្រាស់ថ្នាំញៀននេះយូរហើយ ។ ភាគច្រើននៃអ្នកលេងថ្នាំញៀន គឺសុទ្ធសឹងជាកូនចៅអ្នកមានទ្រព្យស្ដុកស្ដម្ភ និងកូនចៅមន្ត្រីមានអំណាចខ្លះនៅក្នុងខេត្តបាត់ដំបងតែម្ដង ។ រីឯថ្នាំញៀនដែលពួកគេប្រើប្រាស់ ភាគច្រើនជាប្រភេទថ្នាំញៀនមេតំហ្វេតាមីនក្រាមពណ៌ស(ម៉ាទឹកកក និងថ្នាំក្រវី) ។ ប្រភពដែលគួរឱ្យទុកចិត្តនេះ បានបង្ហើបឱ្យដឹងទៀតថា តាមបណ្ដាក្លិបខារ៉ាអូខេ និងក្លិបកម្សាន្តដែលបើកឱ្យមានសេវាប្រើប្រាស់ថ្នាំញៀននេះ មិនមែនថា សមត្ថកិច្ចមិនដឹងនោះទេ ប៉ុន្តែមន្ត្រីជំនាញមួយចំនួន សុទ្ធតែត្រូវថ្នាំសណ្ដំថៅកែក្លិបទាំងអស់ ដូច្នេះហើយ ទើបអាចដំណើរការបានដោយរលូនរហូតដល់ពេលនេះ ។
ជុំវិញការឃាត់ខ្លួនក្រុមអ្នកញៀនថ្នាំមានប្រុស មានស្រីទាំង១៦នាក់ខាងលើនេះ បើតាមលោកឧត្តសេនីយ៍ត្រី ជេត វណ្ណនី ស្នងការរងខេត្តបានបញ្ជាក់ថា ពួកគេត្រូវបានធ្វើតេស្ដពិនិត្យទឹកនោម ដើម្បីរកសារធាតុញៀនហើយបើតាមមន្ត្រីជំនាញបានរាយការណ៍ថា ក្នុងចំណោម១៦នាក់ មាន១៣នាក់រាប់ទាំងស្រី៤នាក់ផង បានរកឃើញថា មានសារធាតុញៀនយ៉ាងពិតប្រាកដ ។ លោកស្នងការរងបានបញ្ជាក់បន្ថែមថា ក្រុមនេះអាចនឹងត្រូវកសាងសំណុំរឿងបញ្ជូនទៅតុលាការទាំងអស់ ជាមួយនឹងវត្ថុតាងមួយចំនួនផង នេះបើតាមបទបញ្ជារបស់លោកស្នងការខេត្ត និងលោកព្រះរាជអាជ្ញាអមសាលាដំបូងខេត្តដើម្បីចាត់វិធានការតាមផ្លូវច្បាប់ ។ ដោយឡែក ម្ចាស់ក្លិបខារ៉ាអូខេខាងលើនេះ ក៏ត្រូវប្រឈមមុខនឹងផ្លូវច្បាប់ដែរ ថែមទាំងអាចប្រឈមនឹងការបិទអាជីវកម្មរបស់ខ្លួនទៀតផង បើតុលាការរកឃើញថា មានកំហុស ។
សូមបញ្ជាក់ថា កិច្ចប្រតិបត្តិការបង្ក្រាបទីតាំងប្រើប្រាស់ថ្នាំញៀនយ៉ាងវក់វីក្នុងក្លិបខារ៉ាអូខេខាងលើនេះ ហាក់កំពុងទទួលបានការគាំទ្រយ៉ាងពេញទំហឹងពីមន្ត្រីនានា រួមទាំងប្រជាពលរដ្ឋនៅក្នុងក្រុងបាត់ដំបងផង ខណៈសកម្មភាពប្រើប្រាស់ចែកចាយ និងជួញដូរថ្នាំញៀននេះ ត្រូវគេមើលឃើញថា បាននិងកំពុងរីករាលដាលកាន់តែខ្លាំងឡើងៗមិនថា នៅទីក្រុង ឬទីជនបទឡើយ ។
មន្ត្រីនានា និងប្រជាពលរដ្ឋប្រាថ្នាចង់ឃើញសកម្មភាពបង្ក្រាបរបស់សមត្ថកិច្ចនេះ ធ្វើឡើងដូចភ្លៀងរលឹម កុំបន្ធូរដៃ បើទោះជាជនប្រព្រឹត្តជាខ្សែស្រឡាយអ្នកមានទ្រព្យ ឬមន្ត្រីមានអំណាចក្ដី គួរតែត្រូវចាត់ការតាមនីតិវិធីច្បាប់ ។ ជាពិសេស ត្រូវតាមដានឬបង្ក្រាបទៅលើទីតាំងក្លិបកម្សាន្តនេះតែម្ដង ដែលបច្ចុប្បន្នតាមបណ្ដាក្លិបកម្សាន្តទាំងនោះ កំពុងពង្វក់ក្រុមយុវជន និងបើកដៃឱ្យជនទុច្ចរិតប្រព្រឹត្តថ្នាំញៀនយ៉ាងវក់វីបំផុត ៕
ចែករំលែកព័តមាននេះ