ចោរគាស់ហាងចូលលួចទូរស័ព្ទប្រមូលយកអស់អាទំនើបៗ
ខេត្តបាត់ដំបង ៖ ហាងលក់ទូរស័ព្ទដ៏ធំមួយកន្លែងយីហោ «ពិភពអេឡិចត្រូនិក» មានទីតាំងនៅផ្លូវលេខ១ ស្ថិតក្នុងភូមិកំពង់ក្របី សង្កាតស្វាយប៉ោ ក្រុងបាត់ដំបង ត្រូវចោរ…
ខេត្តបាត់ដំបង ៖ ហាងលក់ទូរស័ព្ទដ៏ធំមួយកន្លែងយីហោ «ពិភពអេឡិចត្រូនិក» មានទីតាំងនៅផ្លូវលេខ១ ស្ថិតក្នុងភូមិកំពង់ក្របី សង្កាតស្វាយប៉ោ ក្រុងបាត់ដំបង ត្រូវចោរចូលលួចយកទូរស័ព្ទដៃ ស៊េរីទំនើបៗអស់ជិត២០០គ្រឿងដែលគិតជាទឹកប្រាក់ប្រមាណជាង៦ម៉ឺនដុល្លារ ។ ចោរបានលួចអស់ខណៈម្ចាស់ហាងបិទទ្វារចាក់សោទុកចោល ខានស្នាក់នៅមួយយប់ ហើយម្ចាស់ទើបបានដឹងនៅម៉ោង៧និង៣០នាទីព្រឹកថ្ងៃទី១៣ មីនា ពេលបើកទ្វារហាងលក់ដូរ ឃើញបាត់ទូរស័ព្ទពីក្នុងទូអស់ទើបមានការឆោឡោតែម្ដង ។
ម្ចាស់ហាងលក់ទូរស័ព្ទយីហោ «ពិភពអេឡិចត្រូវនិក» អ្នកស្រី ជោត ច័ន្ទចរិយា អាយុ៣០ឆ្នាំ បាននិយាយថា អ្នកស្រីបានជួលផ្ទះគេបើកហាងលក់ទូរស័ព្ទនេះ គឺជួលត្រឹមជាន់ទី១មកជាន់ផ្ទាល់ដី ។ រីឯជណ្ដើរឡើងទៅជាន់ទី២ ត្រូវបានធ្វើគម្របដែក ផ្សារបិទជិតមិនអាចឡើងចុះបានឡើយ ។ អ្នកស្រីបន្តថា នៅយប់កើតហេតុ ក្រុមគ្រួសារអ្នកស្រីបានបិទទ្វារចាក់សោទុកចោល រួចនាំគ្នាទៅដេកមើលម្ដាយឈឺនៅឯផ្ទះ ។ លុះនៅម៉ោង៧និង៣០នាទីព្រឹកថ្ងៃទី១៣មិនា ពេលអ្នកស្រីមកចាក់សោបើកទ្វារហាងលក់ដូរធម្មតា ស្រាប់តែបាត់ទូរស័ព្ទស៊េរីទំនើបៗអស់រលីងពីក្នុងទូ ទើបមានការភ្ញាក់ផ្អើលតែម្ដង ។
អ្នកស្រី ជោត ច័ន្ទចរិយា បានបញ្ជាក់ថា ក្រោយពីមានហេតុការនេះ អ្នកស្រីបានដើរ ពិនិត្យមើលទ្វារក្រោយ មិនឃើញមានរបើកសោទ្វារទេ ។ លុះឡើងមើលគម្របដែកដែល ផ្សារបិទជណ្ដើរជាន់ទី១ ស្រាប់តែមានស្នាមកាត់ផ្ដាច់ ។ អ្នកស្រីបានបញ្ជាក់បន្ថែមថា គាត់មិនដឹងថា ចោរកាត់គម្របជណ្ដើរចុះពីលើមក ឬចូលតាមណាទេ ប៉ុន្តែជាន់ខាងលើម្ចាស់ផ្ទះតែងចេញចូលជាប្រចាំដែរ ។ អ្នកស្រីក៏បានប្ដឹងទៅសមត្ថកិច្ចឲ្យជួយពិនិត្យស្លាកស្នាមទាំងនោះភ្លាមៗដែរ ។
សមត្ថកិច្ចដែលបានចុះទៅពិនិត្យស្លាកស្នាមក្នុងហាងលក់ទូរស័ព្ទនោះ បានឲ្យដឹងថា គម្របជណ្ដើរជាន់ទី១ ឡើងទៅជាន់ទី២ ត្រូវបានចោរប្រើរណារអារផ្ដាច់ ។ រីឯជាន់ទី២ ឡើងទៅដំបូល ដែលម្ចាស់ផ្ទះផ្សារដែកបិទក៏មានស្នាមកាត់ផ្ដាច់ដែរ តែមានទំហំតូចមនុស្សមិនអាចចេញរួចឡើយ ។ ដោយឡែកនៅជាន់ផ្ទាល់ដីវិញ សមត្ថកិច្ចបានបញ្ជាក់ថា គឺទ្វារខាងក្រោយជាប់សោធម្មតា តែមានស្នាមកាត់ទម្លុះសំណាញ់ដែកមួយប្រឡោះ ដែលម្ចាស់ផ្ទះធ្វើដើម្បីការពារសុវត្ថិភាពពីខាងក្រោយផ្ទះ ។
ជុំវិញករណីចោរចូលលួចទូរស័ព្ទក្នុងហាង «ពិភពអេឡិចត្រូនិក»ខាងលើនេះ សមត្ថកិច្ចហាក់មិនទាន់ហ៊ានធ្វើការសន្និដ្ឋានបែបណានៅឡើយទេ ព្រោះស្លាកស្នាមទម្លុះទម្លាយដែលមាននៅក្នុងហាងនោះ ហាក់បង្ហាញពីភាពស្មុគស្មាញយ៉ាងខ្លាំង ។
លោកឧត្តមសេនីយ៍ត្រី ជេត វណ្ណនី ស្នងការរងខេត្តដែលបានចុះពិនិត្យផ្ទាល់ទីតាំងកើតហេតុបានថ្លែងថា សមត្ថកិច្ចហាក់ជួបការលំបាកបន្តិច ដោយសារស្លាកស្នាម ឬភស្តុតាងនៅកន្លែងកើតហេតុ មានភាពស្មុគស្មាញ ។
លោក ជេត វណ្ណនី បានមានប្រសាសន៍ថា រូបលោក និងមន្ត្រីជំនាញកំពុងធ្វើការពិនិត្យយ៉ាងយកចិត្តទុកដាក់បំផុត អំពីស្លាកស្នាមទាំងការកាត់ផ្ដាច់គម្របជណ្ដើរជាន់ទី១ ឡើងទៅជាន់ទី២ ទាំងការកាត់ទម្លុះគម្របដែកឡើងលើដំបូល និងការកាត់ទម្លុះសំណាញ់ដែកខាងក្រោយផ្ទះជាន់ផ្ទាល់ដីដែលគេសង្ស័យថា ជាច្រកចេញរបស់ជនសង្ស័យក្រោយធ្វើសកម្មភាព ។ ប៉ុន្តែលោកស្នងការរងបានបញ្ជាក់ថា កម្លាំងជំនាញការិយាល័យបច្ចេកទេសវិទ្យាសាស្ត្រនៃស្នងការដ្ឋានខេត្ត កំពុងធ្វើការត្រូតពិនិត្យលើស្លាកស្នាមទាំងនោះហើយ ។ រីឯជនសង្ស័យកម្លាំងជំនាញក៏កំពុងធ្វើការតាមដានលើមុខសញ្ញាមួយចំនួនដែរ តែមិនទាន់មានតម្រុយឲ្យប្រាកដនៅឡើយទេ ។
ចំពោះការបាត់បង់ទ្រព្យសម្បត្តិ បើតាមរបាយការណ៍បឋមដែលអ្នកស្រី ជោត ច័ន្ទចរិយា ម្ចាស់ហាង «ពិភពអេឡិចត្រូនិក» បានរាយការណ៏ប្រាប់សមត្ថកិច្ចថា ចោរបានប្រមូលយកទូរស័ព្ទស៊េរីទំនើបៗដែលមានតម្លៃចាប់ពី៣០០ដុល្លារ រហូតដល់តម្លៃជាង៨០០ដុល្លារអស់ជិត២០០គ្រឿង គិតជាទឹកប្រាក់ប្រមាណជាង៦ម៉ឺនដុល្លារសហរដ្ឋអាមេរិក ។ អ្នកស្រីបញ្ជាក់ថា ក្នុងហាងលក់ទូរស័ព្ទរបស់អ្នកស្រីមានបុគ្គលិកស្រីបម្រើការចំនួន៤នាក់ តែមិនមានបុគ្គលិកណាម្នាក់ស្នាក់នៅក្នុងហាងទេ ។ ប៉ុន្តែប៉ុន្មានថ្ងៃនេះមានបុគ្គលិកម្នាក់សុំច្បាប់សម្រាកទៅការបងប្អូន និងម្នាក់ទៀតសុំច្បាប់រៀបការខ្លួនឯង ដូច្នេះសល់តែបុគ្គលិក២នាក់ប៉ុណ្ណោះ ដែលនៅធ្វើការជាប្រចាំ ៕
ចែករំលែកព័តមាននេះ