ក្រោយពេលកោះសន្តិភាពចេញផ្សាយមួយឈុត លើគេហទំព័ររបស់ខ្លួន ស្តីពីឧកញ៉ា ប៉ែន នួន គេចវេះមិនបង់ប្រាក់ថ្លៃចុះផ្សាយសារជូនពរ ក៏មានព័ត៌មានលេចចេញមកហូរហែ ស្តីពីសកម្មភាពមិនប្រក្រតីរបស់ឧកញ៉ាម្នាក់នេះ
រាជធានីភ្នំពេញ ៖ ក្រោយពេលកោះសន្តិភាពចេញផ្សាយមួយឈុត លើគេហទំព័ររបស់ខ្លួន ស្តីពីឧកញ៉ា ប៉ែន នួន គេចវេះមិនបង់ប្រាក់ថ្លៃចុះផ្សាយសារជូនពរ ក៏មានព័ត៌មានលេចចេញមកហូរហែ ស្តីពីសកម្មភាពមិនប្រក្រតីរបស់ឧកញ៉ាម្នាក់នេះ ដែលកោះសន្តិភាពសន្យាចុះផ្សាយម្តងមួយៗ…ឬម្តង២ ឱ្យតែមានព័ត៌មានបញ្ជូនមកដល់ ។
ឱ!អ្នកក្រសែតទាំងឡាយអើយ…មិនគួរនាំគ្នាចាញ់បោកឧកញ៉ា ប៉ែន នួន ដែលកន្លងមក មនុស្សនិងសត្វតិចណាស់ដែលបានស្គាល់ បែរជានាំគ្នាលើកគាត់ឱ្យគេស្គាល់ ។
ប៉ុន្តែណ្ហើយចុះ…បានជានាំគ្នាជួយលើកគាត់ដូចលើកដុំថ្មបង្ហាញឱ្យគេស្គាល់ក៏ដោយចុះ…យ៉ាងហោចក៏មហាជនបានស្គាល់មារយាទល្អរបស់គាត់នៅពេលនេះដែរ ។
ខាងក្រោមនេះ និងបន្តបន្ទាប់ទៀត យើងនឹងចុះផ្សាយពាណិជ្ជកម្មជូនឧកញ៉ា ប៉ែន នួន ឱ្យល្បីល្បាញដោយមិនគិតថ្លៃ ។
មិនគួរទៅបោកប្រាស់ក្រុមសិល្បករ
កាលពីថ្ងៃទី២៩ តុលា ឆ្នាំ២០១៥ កន្លងទៅ មហាជនភាគច្រើនសុទ្ធតែបានដឹងថា លោកឧកញ៉ា ប៉ែន នួន អគ្គនាយកក្រុមហ៊ុនស៊ីខេអេ ចំរើនកសិឧស្សាហកម្ម អភិវឌ្ឍន៍(កម្ពុជា) អ៊ីមផតអិចផត ដែលជាក្រុមហ៊ុនធ្វើការទៅលើវិស័យសាងសង់ បានប្រកាសប្រគល់ប្រាក់ក្នុងមួយខែ៥០០ដុល្លារ ដោយប្រកាសសុំបង់មួយឆ្នាំមុនតែម្ដង ឧបត្ថម្ភដល់សមាគមសិល្បករខ្មែរ ដើម្បីឲ្យសមាគមនេះមានលទ្ធភាពជួយដល់ក្រុមសិល្បករចាស់ៗក្រីក្រ ។
ពិធីនោះមានការចូលរួមយ៉ាងច្រើនកុះករ ពីក្រុមអ្នកសារព័ត៌មាន ទាំងកាសែត វេបសាយ និងទូរទស្សន៍ ដោយឈ្មោះលោក និងភរិយាឈ្មោះ កាយ សុជាតា មិនទាន់ដឹងភរិយាទីប៉ុន្មានទេ ត្រូវគេផ្សាយពីទឹកចិត្តសប្បុរសធម៌នោះយ៉ាងគគ្រឹកគគ្រេង ។ ប៉ុន្តែក្រោយការផ្ទុះដំណឹងថា លោកមិនព្រមបង់ប្រាក់ថ្លៃចុះផ្សាយសារជូនពរសម្ដេចតេជោ ហ៊ុន សែន នៅលើទំព័រកោះសន្ដិភាព ក៏មានការទម្លាយថា ថវិកាឧបត្ថម្ភដែលលោកបានប្រកាសយកមុខយ៉ាងធំថ្លោសកាលនោះ គឺបង់ឲ្យបានតែមួយខែប៉ុណ្ណោះ ក្រោយមកក៏ចេះតែថាថ្ងៃនេះថ្ងៃនោះ ហើយមិនប្រគល់ដល់សមាគមឡើយគឺម៉ាងតែម្រ៉ង ។
លោក សុះ ម៉ាច ប្រធានសមាគមសិល្បករខ្មែរបានថ្លែងប្រាប់ថា រហូតមកដល់ពេលនេះ លោកឧកញ៉ា ប៉ែន នួន ដែលត្រូវគេស្គាល់ច្រើនដោយសារព័ត៌មានផ្សាយថា បានប្រគល់ជូនសមាគមក្នុងមួយខែ៥០០ដុល្លាររាប់ចាប់ពីខែតុលា ឆ្នាំ២០១៥នោះ គឺមិនបានប្រគល់ប្រាក់ដូចអ្វីដែលបានប្រកាសនោះទេ។ សមាគមបានទទួលតែ៥០០ដុល្លារសម្រាប់ខែដំបូង ក្នុងថ្ងៃធ្វើពិធីនាថ្ងៃនោះប៉ុណ្ណោះ ។ ប៉ុន្តែបន្តបន្ទាប់មកគឺលោកលើកថ្ងៃលើកខែជាប់រហូត បើទោះជាខាងសមាគមបានទទូចសុំឲ្យលោកប្រគល់ជូន ដើម្បីកុំឲ្យមានការភាន់ច្រឡំថា សមាគមមានប្រាក់ពីការឧបត្ថម្ភដូចការផ្សព្វផ្សាយហើយ ប៉ុន្តែមិនធ្វើសកម្មភាពអ្វី ។
ប្រធានសមាគមសិល្បករខ្មែររូបនេះ បញ្ជាក់ថា លោកឧកញ៉ា ប៉ែន នួន បានសន្យាប្រគល់ថវិកា៥៥០០ដុល្លារបន្ថែមទៀត ឲ្យគ្រប់១២ខែនៅក្រោយសន្និសីទរយៈពេលមួយខែ ។ ប៉ុន្តែធាតុពិត គឺបានតែសន្យាខ្យល់តែប៉ុណ្ណោះ ។ លោកមានប្រសាសន៍ថា «អាកាលដែលយើងធ្វើសន្និសីទកាសែតហ្នឹង គាត់ប្រគល់ឲ្យតែ៥០០ដុល្លារទេ ឯ៥៥០០ដុល្លារទៀតហ្នឹង គាត់ថា នឹងប្រគល់ឲ្យមួយខែក្រោយ ដើម្បីផ្ដាច់មួយឆ្នាំតែម្ដង ហើយយើងចេះតែចាំគាត់ពន្យាថ្ងៃនេះថ្ងៃនោះ រហូតដល់សព្វថ្ងៃនេះតែម្ដង យើងក៏នឹកឃើញថា ក្រែងគាត់ស្ទះ ព្រោះគាត់ប្រាប់ថា គាត់ស្ទះលុយ យើងចេះតែចាំៗ ហើយមានតែក្រុមប្រឹក្សាសមាគមទេដែលដឹងថា ថវិកាអត់ទាន់បានទទួល!» ។
គេចាំបានថា នៅក្នុងពេលនោះអ្នកកាសែតដែលបានទទួលថវិកាឧបត្ថម្ភពីលោក បានចុះផ្សាយពីការប្រកាសរបស់លោកស្ទើរគ្រប់ស្ថាប័ន ដោយតារាសិល្បៈយ៉ាងច្រើនកុះករ ក៏បានចូលរួម និងបង្ហាញការកោតសរសើរចំពោះគាត់ ដែលជួយឲ្យលោកឧកញ៉ា ប៉ែន នួន មានមុខមានមាត់នៅលើបណ្ដាញសារព័ត៌មាននោះផង ។ ស្ទើរតែគ្រប់ស្រទាប់វណ្ណៈ បានស្គាល់លោកនៅក្នុងគម្រោងសប្បុរសធម៌នោះហើយ ដោយតារាភាគច្រើនបានទាំងបញ្ចេញទស្សនៈថា លោកប៉ែន នួន ជាឧកញ៉ាគំរូទី១ ដែលមើលឃើញពីទុក្ខលំបាករបស់សមាគមសិល្បករនោះផង។ ក្រោយត្រូវគេស្គាល់នៅក្នុងឱកាសនោះ លោកឧកញ៉ា ប៉ែន នួន ក៏តែងភ្ជាប់ខ្លួនជាមួយសកម្មភាពរបស់តារាសិល្បៈ ធ្វើឲ្យមានការចុះផ្សាយហូរហែ នៅលើបណ្ដាញសារព័ត៌មាន ដោយគេមិននឹកស្មានថា លោកមិនទាន់ប្រគល់ថវិកាដែលបានប្រកាសក្ដែងៗជូនដល់សមាគមនោះឡើយ ។
លោក សុះ ម៉ាច បញ្ជាក់ថា ការចុះផ្សាយថា លោកឧកញ៉ា ប៉ែន នួន ប្រគល់លុយជូនដល់សមាគមបានធ្វើឲ្យមានការយល់ច្រឡំថា សមាគមរបស់លោកមានជំនួយក្នុងមួយខែ៥០០ដុល្លារ ឬបានទទួលទឹកប្រាក់ពីលោកប៉ែន នួន សរុប៦០០០ដុល្លារសម្រាប់មួយឆ្នាំបាត់ទៅហើយ ។ ប៉ុន្តែការពិតគឺមិនមានទទួលបានអ្វីសោះ ក្រៅពីទឹកប្រាក់៥០០ដុល្លារ ក្នុងពេលប្រកាសចំពោះមុខអ្នកសារព័ត៌មានជំហានដំបូងនោះ ។ លោកមានបំណងចង់ប្រកាសឲ្យដឹងពីបញ្ហានោះ ដើម្បីឱ្យអ្នកដឹងឮតាមរយៈការចុះផ្សាយរបស់អ្នកកាសែតយល់ថា ខាងសមាគមពិតជាបានទទួលប្រាក់ការឧបត្ថម្ភ នាំឲ្យមានការយល់ឃើញផ្សេងៗមកលើថ្នាក់ដឹកនាំសមាគម ។ ប៉ុន្តែលោកចង់ទុកមុខឲ្យ ទើបចេះតែលើកពេលរង់ចាំ ។ លោកនិយាយថា «យើងចេះតែចង់ទុកកិត្តិយសឲ្យគ្នា ក្រែងថាគាត់វាទាល់ទើបចេះហីៗ ហើយបើថា អាបង់ផ្ដាច់វាមិនទាន់បាន សុំតែមួយខែ៥០០ដុល្លារក៏មិនឃើញទៀត» ។
កាលពីថ្ងៃ២១ វិច្ឆិកា ក្នុងឆ្នាំ២០១៥ លោកឧកញ៉ា ប៉ែន នួន បានអញ្ជើញអ្នកសារព័ត៌មាន និងតារាសិល្បៈយ៉ាងច្រើនកុះករ រួមមានលោកសុះ ម៉ាច, អ្នកនាងចាន់ តារាទី, លោក អ៊ឹម ជីវ៉ា, លោកនាយ ឃ្លោក, លោក សន វិជ្ជបុត្រ, លោក ឈឿន ឧត្តម, នាយ ចេក, លោកម៉ាដូណា, អ្នកនាង ស៊ុន ណារីម៉ូនីកា និងអ្នកនាង គឹម សុគន្ធា ជាដើមឲ្យទៅចុះច្រៀងក្នុងពិធីបុណ្យកឋិននៅស្រុករបស់ភរិយាម្នាក់ទៀតមិនដឹងទីប៉ុន្មានទេ ឈ្មោះ ខេង ស្រីឡា នៅខេត្តព្រៃវែង ដោយមិនបានផ្ដល់កម្រៃឲ្យតារាទាំងនោះដូចការសន្យានោះឡើយ ។
តារាភាគច្រើនដែលបានទម្លាយដំណឹងនេះ ក្រោយពីដឹងថា លោកឧកញ៉ា ប៉ែន នួន មិនព្រមបង់ថ្លៃផ្សាយពាណិជ្ជកម្មជូនពរសម្ដេច ហ៊ុនសែន នៅលើទំព័រកោះសន្ដិភាពបានលើកឡើងថា ដោយសារតែយល់ឃើញថា លោកឧកញ៉ារូបនេះចិត្តល្អជួយដល់សមាគមគិតថាដៃទូលាយ និងដើម្បីលួងចិត្តឲ្យលោកប្រគល់ប្រាក់ជួយដល់សមាគមសិល្បៈដូចការសន្យា ទើបម្នាក់ៗសម្រុកគ្នាទៅតាមការអញ្ជើញ។ ប៉ុន្តែ ក្រោយចប់ពិធីបានត្រឹមតែអះអាងថា ចាំដល់ភ្នំពេញវិញចាំគិតគូឲ្យតារាសិល្បៈទាំងនោះ ប៉ុន្តែមកដល់ភ្នំពេញហើយក៏ស្ងាត់ដូចចោរលួចសេះទៅហោង ។
ងាកមកកាន់រឿងចម្រូងចម្រាស់ជាមួយកោះសន្ដិភាព ពាក់ព័ន្ធនឹងការចុះផ្សាយជូនពរនេះវិញ គឺកាលពីថ្ងៃទី៣០ ខែមករា ក្នុងឆ្នាំ២០១៥ថ្ងៃចុងឆ្នាំ លោកឧកញ៉ា ប៉ែន នួន បានណាត់អ្នកយកព័ត៌មានកោះសន្ដិភាពឲ្យទៅជជែកគ្នាពីការចុះផ្សាយព័ត៌មានទាក់ទងនឹងគម្រោងរបស់ខ្លួន នៅក្នុងភោជនីយដ្ឋានមួយនៅម្ដុំព្រែកលាភ ។ ស្ថិតក្នុងទិដ្ឋភាពផឹកស៊ី អមក្លែមទៅដោយស្រីក្មេងអោបដូចដៃម៉ឹកជុំវិញនាពេលនោះ ភ្នាក់ងារកោះសន្ដិភាពក៏បានជម្រាបសួរលោកថា «លោកឧកញ៉ាលោកឧកញ៉ាទើបតែឡើងជាឧកញ៉ាអញ្ចឹង ចុះផ្សាយជូនពរសម្ដេចមួយលេខទៅ នៅថ្ងៃបុណ្យឆ្លងឆ្នាំសកល ដើម្បីឲ្យមហាជនបានស្គាល់ ?»។
លោកឧកញ៉ា ប៉ែន នួន និងបក្ខពួកក៏ឆ្លើយឡើងថា នោះជាគំនិតល្អ ហើយក៏បានស្នើសុំឲ្យអ្នកសារព័ត៌មានរបស់យើងឆែកមើលពីតម្លៃ និងទំព័រដែលគួរតែចុះផ្សាយ ហើយមានការទាក់ទាញ ។ ពេលនេះភ្នាក់ងារកោះសន្ដិភាពក៏បានទំនាក់ទំនងមកកាន់ការិយាល័យទីផ្សារកោះសន្ដិភាព ហើយក៏បានជូនដំណឹងទៅលោកឧញ៉ា ប៉ែន នួន វិញ ដោយលោកឧកញ៉ា ប៉ែន នួន បានសម្រេចឲ្យចុះជូនពរក្នុងទំព័រកីឡាផ្នែកខាងមុខ ដោយព្រមព្រៀងគ្នាក្នុងតម្លៃ៤០០ដុល្លារ ។ មុនឈានដល់ការបោះពុម្ពផ្សាយ ភ្នាក់ងារសារព័ត៌មានកោះសន្ដិភាពបានបញ្ជូនផ្ទាំងសារជូនពរឲ្យលោកបានពិនិត្យនៅគ្រប់ដំណាក់ ទាំងរូបភាពសម្ដេចដែលលោកបានកុម្ម៉ង់ ទាំងទម្រង់ពាក្យពេចន៍ដែលលោកចង់បាន ។ ព្រោះកន្លងមកជាបទពិសោធន៍បើគ្មានការយល់ព្រមត្រួតពិនិត្យពីអ្នកចុះផ្សាយជាមុននោះទេ នោះកោះសន្ដិភាពមិនអាចចេញសារជូនពរឲ្យអតិថិជនណាមួយឡើយ ព្រោះខ្លាចខុសចិត្ត ។
លោកឧកញ៉ា ប៉ែន នួន បានទាំងឲ្យជំនួយការម្នាក់ដែលជាកូនរបស់ខ្លួនជាមួយនឹងភរិយាម្នាក់ផ្សេងទៀត ជាអ្នកធ្វើការដោយផ្ទាល់ក្នុងការសម្រេចលើផ្ទាំងគំរូជូនពរនោះ មុននឹងឲ្យចុះផ្សាយនោះផង ។ ដូច្នេះគឺវាផ្ទុយស្រឡះដែលលោកបានដោះសារថា ភ្នាក់ងារកោះសន្ដិភាពចុះផ្សាយដោយគ្មានការយល់ព្រមពីខ្លួន ហើយក៏ទៅជំរិតទារប្រាក់៤០០ដុល្លារ ទើបលោកមិនព្រមបង់ ។ ម្យ៉ាងទឹកប្រាក់ដែលបានពីការចុះផ្សាយនោះ គឺជាថវិការបស់ការិយាល័យទីផ្សារនៅកោះសន្ដិភាព តើចាំបាច់អីដែលអ្នកយកព័ត៌មានមួយរូបទៅបង្ខំឲ្យលោកចុះសារជូនពរ ហើយទៅជំរិតទារប្រាក់ដូចលោកលើកឡើង ? ជាភស្ដុតាងស្រាប់ នៅថ្ងៃទី១ ខែមករា ក្នុងឆ្នាំ២០១៦ លោកឧកញ៉ា ប៉ែន នួន បានទាំងណាត់ឲ្យអ្នកសារព័ត៌មានយើងយកកាសែតដែលចុះជូនពរសម្ដេច ហ៊ុន សែន ចំថ្ងៃចូលឆ្នាំសាកល ទាំងនោះទៅឲ្យខ្លួននៅក្នុងហាងផឹកស៊ីដដែល នៅម្ដុំព្រែកលាភនោះផង ដោយមានទាំងបុគ្គលិក និងអ្នករត់តុច្រូងច្រាងដណ្ដើមគ្នាមើល និងកោតសរសើរ ។ ក្នុងថ្ងៃនោះ ភ្នាក់ងារសារព័ត៌មានកោះសន្ដិភាពបានប្រគល់វិក័យប័ត្រដែលចេញដោយប្រធានទីផ្សាររបស់កោះសន្ដិភាពជូន ហើយត្រូវបានលោកឧកញ៉ាខ្លួនឯងបញ្ជាក់ថា ចាំស្អែកចាំបង់លុយឲ្យ ព្រោះលុយជាប់ខ្លួនទុកសម្រាប់តែចំណាយផឹកស៊ី ។
ចាប់តាំងពីថ្ងៃណាត់នោះ លោកឧកញ៉ា ប៉ែន នួន បានសន្យាថ្ងៃនេះ ថ្ងៃនោះ ជាប់រហូតដូចណាត់ខ្យល់ គឺមិនខុសពីអ្វីដែលលោក សុះ ម៉ាច បានទម្លាយខាងលើនោះទេ ។ រហូតដល់ថ្ងៃទី១៥ មករា ឆ្នាំ២០១៦ ប្រធានទីផ្សារកោះសន្ដិភាពបានសម្រេចចេញលិខិតជូនដំណឹងមួយ សុំឲ្យលោកជួយពន្លឿនការទូទាត់ថ្លៃចុះផ្សាយជូនពរ ហើយក៏ត្រូវលោកឧកញ៉ា ប៉ែន នួន ខ្លួនឯងបញ្ចេញប្រតិកម្មរបៀបខ្លាចថោក និងឆ្លើយមកវិញថា នោះជាលិខិតមើលងាយចំពោះលោក ទោះបីខ្លួនឯងមិនថ្លៃក៏ដោយ ។ បើទោះជាភ្នាក់ងារកោះសន្ដិភាព និងមន្ត្រីទីផ្សារនៅកោះសន្ដិភាព ប្រើគ្រប់មធ្យោបាដើម្បីទំនាក់ទំនងសុំការដោះស្រាយយ៉ាងណា ក៏ប៉ែន នួន មិនព្រមធ្វើការដោះស្រាយនោះឡើយ ។ ពេលទូរស័ព្ទទាក់ទងម្តងៗ ដោយលេខដែលស្គាល់គឺមិនលើកតែម្តង សង្ស័យដូចមនុស្សខូច ។ ហើយបើយកលេខផ្សេងខលចូល ក៏បិទចោលវិញនៅពេលការជជែកវែកញែកស្ដាប់ក្បាលកន្ទុយមិនទាន់បាន ។
ជាជម្រើសចុងក្រោយ ភ្នាក់ងារកោះសន្ដិភាពបានទាក់ទងសុំឲ្យកូនប្រុសរបស់លោក ដែលត្រូវគេអះអាងថា ជាកូនរបស់ភរិយាដើមជួយសម្រួល ក៏មិនមានលទ្ធផល ដោយត្រូវកូនប្រុសរូបនេះបញ្ជាក់ថា លោក ប៉ែន នួន ខឹងរឿងកោះសន្ដិភាពគ្រាន់តែយឺតបង់លុយបន្តិចបន្តួច ក៏ចេញលិខិតទារប្រាក់ ដោយលោកចាត់ទុកថា នោះលិខិតប្រមាថចំពោះលោកជាឧកញ៉ាដ៏មហិមានៃយើង ។ ឱ!លោកឧកញ៉ា ដ៏មហាមានតម្លៃពេកអើយ… ហេ ! ហេ !
លោកឧកញ៉ា ប៉ែន នួន អាចសុំសិទ្ធិឆែកសំឡេងក្នុងការទំនាក់ទំនងគ្នាកន្លង ពីក្រុមហ៊ុនទូរស័ព្ទទាំងប្រព័ន្ធ Smart និងCellcard បាន ដើម្បីឲ្យច្បាស់ថា តើកោះសន្ដិភាព ចុះជូនពរសម្ដេចដោយមិនឲ្យលោកដឹង រួចទៅជំរិតទារលុយដូចការដោះសារ ឬយ៉ាងណា ?
ម្យ៉ាងកោះសន្ដិភាពមិនដែលមានប្រវត្តិចុះសារជូនពរដោយមិនឲ្យអតិថិជនត្រួតពិនិត្យមុននឹងចេញផ្សាយនោះឡើយ ។ (ការទម្លាយទាំងអស់របស់តារាសិល្បៈ ខ្ញុំមានខ្សែអាត់របស់តារាសិល្បៈទាំងអស់ ហើយរូបថតជាមួយលោក សុះ ម៉ាច ហ្នឹងគឺពេលគាត់ធ្វើពិធី អួតថា គាត់នឹងផ្ដល់មួយខែ៥០០ដុល្លារ ឬមួយឆ្នាំ៦០០០ដុល្លារ ឲ្យសមាគម រាប់ចាប់ពីខែតុលា ក្នុងឆ្នាំ២០១៥ តទៅ កាលពីថ្ងៃទី២៩ តុលា ឆ្នាំ២០១៥កន្លងទៅ មានទាំងអស់ ដែលកោះសន្តិភាពគិតថា អ្នកកាសែតដែលបានជួយលើកតំកើងលោកប៉ុណ្ណា ក៏អាចទាញលោកឱ្យអុកវិញប៉ុណ្ណឹងឬលើសថែមដែរ ឱ្យវាស្មើគ្នា ៕
ចែករំលែកព័តមាននេះ