សង្ស័យបោះចោលកន្ទុយបារីបង្កជាអគ្គីភ័យផ្អើលទាំងយប់
រាជធានីភ្នំពេញ ៖ អគ្គីភ័យបានឆាបឆេះយ៉ាងសន្ធោសន្ធៅបង្កឲ្យផ្អើលដល់សមត្ថកិច្ច និងប្រជាពលរដ្ឋជួយអន្តរាគមន៍ទាំងយប់ ។ អគ្គីភ័យនេះកើតឡើងកាលវេលាម៉ោង១១យប់…
រាជធានីភ្នំពេញ ៖ អគ្គីភ័យបានឆាបឆេះយ៉ាងសន្ធោសន្ធៅបង្កឲ្យផ្អើលដល់សមត្ថកិច្ច និងប្រជាពលរដ្ឋជួយអន្តរាគមន៍ទាំងយប់ ។ អគ្គីភ័យនេះកើតឡើងកាលវេលាម៉ោង១១យប់ថ្ងៃទី១០ ខែមីនា ឆ្នាំ២០១៦ តាមបណ្តោយផ្លូវរថភ្លើង ចំណុចដីឡូត៍មួយកន្លែងនៅជិតឃ្លាំងសាំងសូគីម៉ិច ស្ថិតនៅក្នុងភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេឃើញផ្សែងហុយបង្កជាអណ្តាតភ្លើងឆាបឆេះព្រៃនៅក្នុងដីឡូត៍ ធ្វើឲ្យផ្អើលដល់ប្រជាពលរដ្ឋ និងសមត្ថកិច្ចនាំគ្នាជួយអន្តរាគមន៍បាញ់ទឹកពន្លត់តែមិនរលត់ ទើបសមត្ថកិច្ចហៅរថយន្តពន្លត់អគ្គីភ័យរបស់ស្នងការនគរបាលរាជធានីភ្នំពេញ និងរថយន្តពន្លត់អគ្គីភ័យប្រចាំខណ្ឌឫស្សីកែវមកជួយអន្តរាគមន៍ទើបរលត់អស់ទាំងស្រុង ។
សមត្ថកិច្ចបានឲ្យដឹងថា អគ្គីភ័យខាងលើនេះប្រើប្រាស់រថយន្តពន្លត់អគ្គីភ័យអស់ចំនួន៧គ្រឿង ក្នុងនោះរថយន្តពន្លត់អគ្គីភ័យរបស់ស្នងការនគរបាលរាជធានីភ្នំពេញ២គ្រឿង រថយន្តប្រចាំនៅខណ្ឌឫស្សីកែវចំនួន៣គ្រឿង និងរថយន្តពន្លត់អគ្គីភ័យរបស់ក្រុមហ៊ុនសូគីម៉ិចចំនួន២គ្រឿងផងដែរ ។ ចំណែករថយន្តពន្លត់អគ្គីភ័យរបស់ខណ្ឌជ្រោយចង្វារមកដល់២គ្រឿងដែរតែមិនបានបាញ់ទឹកពន្លត់ទេ ។
សមត្ថកិច្ចធ្វើការសន្និដ្ឋានជាជំហានដំបូងថា មូលហេតុដែលបណ្ដាលអោយមានអគ្គីភ័យនេះសង្ស័យមានអ្នកបោះកន្ទុយបារីដែលជក់រួចចូលទៅក្នុងព្រៃឆាបឆេះបង្កជាអគ្គីភ័យតែម្តងទៅ ៕
ចែករំលែកព័តមាននេះ