រាជធានីភ្នំពេញ ៖ ឧស្សាហកម្មរថយន្តនៅក្នុងព្រះរាជាណាចក្រកម្ពុជា បានលូតលាស់យ៉ាងឆាប់រហ័ស និងរឹងមាំ ។ កាលពីឆ្នាំ២០១៣ កំណើននៃការនាំចូលយានយន្តបានកើនឡើងប្រមាណ១៥% ហើយការនាំចូលរថយន្តថ្មី
រាជធានីភ្នំពេញ ៖ ឧស្សាហកម្មរថយន្តនៅក្នុងព្រះរាជាណាចក្រកម្ពុជា បានលូតលាស់យ៉ាងឆាប់រហ័ស និងរឹងមាំ ។ កាលពីឆ្នាំ២០១៣ កំណើននៃការនាំចូលយានយន្តបានកើនឡើងប្រមាណ១៥% ហើយការនាំចូលរថយន្តថ្មី មានសរុបប្រហែលតែ៤.០០០គ្រឿងប៉ុណ្ណោះ។ នៅក្នុងឆ្នាំ២០១៤ រថយន្តគ្រប់ប្រភេទដូចជា រថយន្តតូច ភីកអាប់ និងរថយន្តដឹកជញ្ជូន ដោយ១ភាគ៣នៃរថយន្តទាំងនោះ គឺជារថយន្តទំនើប ស្របតាមការនិយម និងបែបផែនជីវិតរបស់សង្គមកម្ពុជា ។ តែទោះជាយ៉ាងណា សហព័ន្ធឧស្សាហកម្មយានយន្តកម្ពុជា បានបង្ហាញក្តីបារម្ភពីការនាំចូលរថយន្តជជុះ និងរថយន្តមានអាយុកាលច្រើន មកកាន់ទីផ្សារកម្ពុជា ។
លោក Peter Brongers ប្រធានសហព័ន្ធឧស្សាហកម្មយានយន្តកម្ពុជា ឱ្យដឹងថា ៖ « កំណើនដ៏ឆាប់រហ័សនេះ ក៏បានប្រឈមនឹងបញ្ហាថ្មីៗសម្រាប់តួអង្គសំខាន់ៗក្នុងឧស្សាហកម្មនេះ ។ អាជ្ញាធរ រដ្ឋាភិបាលក៏ត្រូវបង្កើនការការពារ និងសុវត្ថិភាពដល់អ្នកប្រើប្រាស់ផងដែរ ដោយត្រូវពិនិត្យមើលការនាំចូលយានយន្តមិនមានសុវត្ថិភាព ឬហៅថា ទីផ្សារងងឹត ជាដើម ។ សហព័ន្ធឧស្សាហកម្មយានយន្តកម្ពុជា (CAIF) មានគោលបំណងពង្រឹង និងការពារគោលដៅរបស់ឧស្សាហកម្មយានយន្ត និងជួយកែលម្អសុវត្ថិភាពផ្លូវថ្នល់ ការពារអ្នកប្រើប្រាស់ សុវត្ថិភាពយានយន្ត និងការយល់ដឹងរបស់អ្នកបើកបរ » ។
លោកបន្តថា ៖ « ប្រជាជនកម្ពុជាធ្លាប់ចាត់ទុកថា តម្លៃគឺជាកត្តាសំខាន់សម្រាប់ការសម្រេចចិត្តទិញរថយន្ត ប៉ុន្តែមើលរំលងពីគុណភាព ។ ពេលនោះ អ្នកប្រើប្រាស់ជាច្រើនមិនទាន់យល់ពីអត្ថប្រយោជន៍នៃការធានា និងមជ្ឈមណ្ឌលសេវាកម្មដែលទទួលបានសិទ្ធិផ្ដល់ដោយអ្នកចែកចាយផ្លូវការនោះទេ ។ ក្រៅពីនេះ អ្នកប្រើប្រាស់ជាច្រើនមិនដឹងថា អ្នកផលិតបានរចនានិងបង្កើតរថយន្តផ្សេងគ្នាសម្រាប់ប្រទេសផ្សេងគ្នានៅលើពិភពលោកឡើយ ។ រថយន្តដែលទទួលបានសិទ្ធិ ត្រូវបាននាំចូលដោយគិតពិចារណាទៅលើលក្ខខណ្ឌក្នុងស្រុក សម្រាប់ជាប្រយោជន៍ដល់អ្នកប្រើប្រាស់នៅកម្ពុជា ។ ឧទាហរណ៍ រថយន្តដែលទទួលបានសិទ្ធិ ត្រូវបានលៃតម្រូវសម្រាប់ស្ថានភាពប្រើប្រាស់ប្រេងនៅកម្ពុជា ។ បូម ឬម៉ូឫស្ស័រ ក៏ត្រូវបានលៃតម្រូវទៅតាមផ្លូវនៅកម្ពុជាផងដែរ ។ ក្រៅពីនេះ កុំប្រេស្ស័រម៉ាស៊ីនត្រជាក់ធំ ក៏សម្រាប់អាកាសធាតុនៅតាមតំបន់ដែរ ។ ជាមួយនឹងទីផ្សារងងឹតដែលមានទំហំធំជាងអ្នកចែកចាយផ្លូវការ១០ដង អ្នកប្រើប្រាស់ពិតជាពុំទទួលបានការពារទេ » ។
លោកបន្ថែមថា ៖ « សហព័ន្ធបានត្រៀមខ្លួនក្នុងការផ្ដល់ប្រឹក្សាដល់រាជរដ្ឋាភិបាលអំពីវិធានការពាក់ព័ន្ធ ដើម្បីហាមឃាត់រថយន្តនាំចូលថ្មីដោយអ្នកចែកចាយដែលគ្មានសិទ្ធិ និងបង្កើនពន្ធ១៥០% សម្រាប់រាល់ទីផ្សារងងឹត។ ក្នុងនាមជាតួអង្គមានការទទួលខុសត្រូវ សហព័ន្ធនឹងធ្វើយុទ្ធនាការលើកកម្ពស់ការយល់ដឹងនៅក្នុងឆ្នាំនេះ ដើម្បីអប់រំអ្នកប្រើប្រាស់ជាបណ្ដើរៗអំពីហានិភ័យនៃការទិញរថយន្តពីអ្នកចែកចាយដែលគ្មានសិទ្ធិ ។ សមាហរណកម្មអាស៊ានកំពុងតែនាំកម្ពុជាទៅមុខ ហើយកម្ពុជាកំពុងធ្វើសមាហរណកម្មចូល ។ ដូច្នេះដើម្បីឱ្យសមាហរណកម្មរលូន កម្ពុជាគួរប្រុងប្រយ័ត្នក្នុងការបង្កើតប្រព័ន្ធមួយឱ្យមានលក្ខណៈស្របគ្នា » ។
ក្នុងចំណោមប្រទេសអាស៊ានទាំង១០ មានប្រទេស៧ បានហាមឃាត់ការនាំចូលរថយន្តជជុះ ។ បច្ចុប្បន្ននេះ មីយ៉ាន់ម៉ា និងកម្ពុជា មិនបានកំណត់ការនាំចូលនេះទេ ដែលមានទិដ្ឋភាពជា «កន្លែងសម្រាប់ចោលរបស់ចាស់ » ក្នុងចំណោមប្រទេសអាស៊ាន ។
កាលពីឆ្នាំ២០១៣ ឡាវបានស្ដាប់តាមនិន្នាការរបស់បណ្តាប្រទេសអាស៊ាន ដោយហាមឃាត់ការនាំចូលរថយន្តជជុះចូលប្រទេសឡាវ។ ចំណែកប្រទេសវៀតណាមវិញ អនុញ្ញាតឱ្យនាំរថយន្តចូលប្រទេសរបស់ខ្លួន អាយុត្រឹមតែ៥ឆ្នាំប៉ុណ្ណោះ ។ រថយន្តទាំងនោះត្រូវឆ្លងកាត់ការពិនិត្យសុវត្ថិភាពមុនពេលចូលក្នុងប្រទេស ហើយត្រូវពិនិត្យជាប្រចាំរៀងរាល់៦ខែម្ដង ។
ប្រធាន CAIF បញ្ជាក់ថា ៖ « យើងត្រៀមខ្លួនសម្រាប់ការអនុវត្តឆាប់រហ័សនៃវិធានការពាក់ព័ន្ធ ។ ហើយគួរបិទទាំងស្រុងការនាំចូលរថយន្តជជុះ ឬបិទការនាំចូលរថយន្តដែលមានអាយុលើសពី១០ឆ្នាំ ដើម្បីការពារអ្នកប្រើប្រាស់ និងបរិស្ថាន ព្រមទាំងបង្កើនចំណូលពន្ធដារសម្រាប់អាជ្ញាធរពាក់ព័ន្ធ » ។
គួរបញ្ជាក់ថា សហព័ន្ធឧស្សាហកម្មយានយន្តកម្ពុជា តំណាងឱ្យអ្នកចែកចាយដែលមានសិទ្ធិ រួមមាន Audi, BMW, Chevrolet, Ford, Fuso, Great Wall, Honda, Isuzu, Jaguar, Kia, Land Rover, Mazda, Mercedes Benz, Mitsubishi, Nissan, Porsche, Subaru, Suzuki, Toyota និង Volkswagen ។
គោលបំណងហាមឃាត់ការនាំចូលរថយន្តជជុះនេះ គឺដើម្បីលើកកម្ពស់ឧស្សាហកម្មយានយន្ត បញ្ចេញសំឡេងតែមួយ និងរួមគ្នាជាមួយវិស័យឯកជនអំពីបញ្ហានេះជាមួយរាជរដ្ឋាភិបាល ចូលរួមធ្វើជាតំណាងឱ្យវិស័យឯកជននៅក្នុងក្រុមការងារអាស៊ាន បង្កើនការងារផ្ដល់ការបណ្ដុះបណ្ដាល បង្កើនសុវត្ថិភាពផ្លូវថ្នល់ លើកកម្ពស់ការយល់ដឹង និងការការពារដល់អ្នកប្រើប្រាស់ ។
យោងតាមតួលេខដែលចេញដោយក្រសួងសាធារណការ និងដឹកជញ្ជូន ឲ្យដឹងថា នៅក្នុងឆ្នាំ២០១៥ ចំនួនយានជំនិះដែលបានចុះឈ្មោះនៅក្នុងប្រទេសកម្ពុជាបានកើនឡើងចំនួន១៤% ជាមួយនឹងយានយន្ដជាង៣,២លានគ្រឿង ត្រូវបានចុះឈ្មោះ និងរាប់បញ្ចូលទាំងម៉ូតូចំនួន២,៧លានគ្រឿង ត្រូវបានចុះឈ្មោះផងដែរ ៕
ចែករំលែកព័តមាននេះ