ខេត្តតាកែវ ៖ អាជីវករផ្សារតាកែវរាប់រយនាក់ កាលពីសប្តាហ៍កន្លងទៅនេះ បានលើកគ្នាធ្វើការតវ៉ាស្នើឲ្យអភិបាលខេត្ត ធ្វើអន្តរាគមន៍ ក្រោយពីពួកគាត់ទទួលដំណឹងមកថា ផ្សារដែលពួកគាត់ធ្លាប់លក់ដូររកប្រាក់ចិញ្ចឹមគ្រួសារ ត្រូវបានអាជ្ញាធរ ប្រគល់ឲ្យក្រុមហ៊ុនឯកជនមួយសាងសង់ឡើងវិញ ហើយក្រោយ ពីសាងសង់រួចគេនឹងដាក់លក់តូបក្នុងតម្លៃថ្មីមួយ។
ក្រុមអាជីវករទាំងនោះ បានលើកឡើងថា បច្ចុប្បន្នពួកគាត់កំពុងជួបនូវវិបត្តិធ្ងន់ធ្ងរ គឺវិបត្តិកូវីដ១៩ ដោយសារការលក់ដូរមិនសូវដាច់ មិនមានប្រាក់ចំណូលផង ហើយប្រសិនបើអាជ្ញាធរត្រូវរុះរើផ្សារ ហើយសង់ថ្មី ដោយតម្រូវឲ្យពួកគាត់ទិញម្តងទៀតនោះ តើពួកគាត់មានប្រាក់ឯណាមកទិញទៅ? ដូច្នេះមានតែពួកគាត់លើកគ្នាមកសុំអន្តរាគមន៍ឲ្យលោកអភិបាលខេត្តជួយរកដំណោះស្រាយជូនពួកគាត់ផង។
យ៉ាងណាក៏ដោយ ការលើកគ្នាតវ៉ាសុំអន្តរាគមន៍របស់ក្រុមអាជីវករផ្សារតាកែវ ដោយមានលើកជាបដាដោយសរសរថា «មិនព្រមរុះរើឲ្យធ្វើផ្សារថ្មីជាដាច់ខាត» មិនទទួលបានជោគជ័យឡើយ ដោយសារត្រូវបានកម្លាំងសមត្ថកិច្ចចុះមកធ្វើការហាមឃាត់ និងបំបែកក្រោមហេតុផលថា ការប្រមូលផ្តុំនោះ គឺខុសគោលការណ៍របស់ក្រសួងសុខាភិបាល ស្តីពីការ ទប់ស្កាត់ការរាតត្បាតជំងឺកូវីដ១៩។
តែបើតាមសេចក្តីរាយការណ៍ថា ក្រោយពីធ្វើការបំបែកការជួបជុំរួច មន្ត្រីសាលាខេត្តតាកែវ បានអនុញ្ញាតឲ្យតំណាងក្រុមអាជីវករចូលជួប ដើម្បីស្វែងរកដំណោះស្រាយ ប៉ុន្តែលទ្ធផលយ៉ាងណានោះ នៅ មិនទាន់មានប្រភពណាបញ្ជាក់នៅឡើយទេ។
បើតាមប្រភពគួរឲ្យជឿជាក់មួយ បានឲ្យដឹងថា ឈ្មួញដែលចង់ធ្វើការវិនិយោគផ្សារតាកែវឡើងវិញនេះ គឺជាឈ្មួញមានឈ្មោះ លោក ឡោ ជំនិត តែម្នាក់គត់ដែលកំពុងធ្វើការវិនិយោគផ្សារណាត់តាមវិធីសាស្ត្រធ្វើនំអត់ម្សៅ ក្រោមការជ្រោមជ្រែងរបស់អាជ្ញាធរ ពោលគឺគេរៀបជាគម្រោង ហើយគូរប្លង់ផ្សារ បន្ទាប់មកចាប់ផ្តើមលក់តូប ដោយតូបខ្លះមានតម្លៃដល់ទៅរាប់ម៉ឺនដុល្លារ ទៅតាមទីតាំង ខណៈការសាងសង់នៅមិនទាន់ចាប់ផ្តើមនៅឡើយ។
ពាក់ព័ន្ធករណីខាងលើនេះ អ្នកយកព័ត៌មានយើងនៅមិនអាចសុំការបំភ្លឺពីលោក ឡោ ជំនិត បានទេដោយសារទូរស័ព្ទចូលពុំមានអ្នកទទួល។
គួរតក់សម្គាល់ផងដែរថា នៅមួយរយៈកាលចុងក្រោយនេះ គេសង្កេតឃើញថា អាជ្ញាធរខេត្តតាកែវ ហាក់ដូចជា ធ្វើមើលមិនឃើញ បណ្តែតបណ្តោយឲ្យមានករណីមិនប្រក្រតីជាច្រើន ដូចជាករណីកាយដី និងលុបបឹងតាកែវ រហូតដល់អង្គភាពប្រឆាំងអំពើពុករលួយចុះធ្វើការស៊ើបអង្កេតថែមទៀតផង។ តែបើតាមអ្នកវិភាគនៅតាមតុកាហ្វេវិញ បាននិយាយថា នេះប្រហែលជាមេខេត្ត គាត់រៀបចំខ្លះៗ សម្រាប់ជាកេរតំណែល ក្រោយគាត់ឈប់សម្រាកហើយមើលទៅ ។
ចែករំលែកព័តមាននេះ