រាជធានីភ្នំពេញ ៖ នៅរសៀលថ្ងៃសៅរ៍ទី១២ មីនា ខានស្អែកនេះ ការប្រកួតប្រដាល់អន្តរជាតិរៀងរាល់២សប្ដាហ៍ម្ដងរបស់ទូរទស្សន៍អាស៊ីអាគ្នេយ៍ នឹងចាប់ផ្ដើមទៀតហើយអមដោយការប្រកួតវិលជុំរបស់កីឡាករ៨រូបនៅលើសង្វៀន។ កីឡាករល្បីឈ្មោះ ឡុង សុវណ្ណឌឿន និង សារឿន ច័ន្ទ នឹងត្រូវគេឱ្យប៉ះប្រកួតជាមួយកីឡាករថៃនៅក្នុងព្រឹត្តិការណ៍នេះ ចាប់ពីម៉ោង២រសៀលតទៅ ។
ឡុង សុវណ្ណឌឿន ដែលក្រៅពីជាកីឡាករល្បីឈ្មោះ ក៏ជាពិធីករអត្ថាធិប្បាយក្នុងកម្មវិធីប្រកួតប្រដាល់របស់ស្ថានីយទូរទស្សន៍ CTN ផងដែរនោះ នឹងត្រូវជួបស្វាគមន៍កីឡាករថៃឈ្មោះ កាំឡៃ ភីត ក្នុងប្រភេទទម្ងន់៦៩គីឡូក្រាម ។ កីឡាករទាំងពីរនឹងឡើងប៉ះគ្នានៅក្នុងព្រឹត្តិការណ៍ប្រដាល់ K-Cement ដែលក្នុងពេលនោះ ក៏មានការប្រកួតដណ្ដើមពិន្ទុរបស់កីឡាករ៨រូប ឆ្ពោះទៅកាន់ការប្រកួតប្រជែងយកតំណែងជើងឯកនៅលើសង្វៀន ក៏ស្ថិតក្នុងសភាពស្វិតស្វាញដែរ ។ ការប្រកួតរបស់គូនេះ ត្រូវគេកត់សម្គាល់ពីស្នាដៃរួចទៅហើយ ដោយសារតែកីឡាករ ឡុង សុវណ្ណឌឿន ក៏មានប្រវត្តិមិនធម្មតា ហើយកីឡាករថៃក៏ខ្លាំងក្នុងការវាយផ្ដួលគូប្រកួត ។ ភាគីខាងកម្ពុជាគឺជាកីឡាករដែលមានឈ្មោះបោះសំឡេងនៅលើសង្វៀន ប៉ុន្តែកីឡាករ កាំឡៃ ភីត ក៏មិនណយនោះដែរ ដោយផ្អែកតាមបទពិសោធន៍ឡើងរេញរបស់គេ គឺច្រើនដង និងមានប្រវត្តិមិនធម្មតាសម្រាប់ការប្រកួតប៉ុន្មានលើកចុងក្រោយ ។
លោក ថៃ អ៊ូ អ្នកដឹកនាំកីឡាករថៃឱ្យមកប្រកួត បានបង្ហាញពីភាពជឿជាក់ក្នុងពេលដែលការអះអាងរបស់លោកត្រូវគេកត់សម្គាល់បានធ្វើឱ្យអ្នកតាមដានទុកចិត្តច្រើនលើកមកហើយ បន្ទាប់ពីសមាសភាពកីឡាករថៃជាច្រើនរូបដែលមកប្រកួតនៅលើសង្វៀនទូរទស្សន៍អាស៊ីអាគ្នេយ៍ កាន់តែពិបាកឱ្យកីឡាករកម្ពុជាតស៊ូ ជាពិសេសចំពោះកីឡាកររូបណាដែលអ្នកដឹកនាំរូបនេះ បង្ហាញទំនុកចិត្តនៅមុនពេលប្រកួត ។ កីឡាករកម្ពុជាភាគច្រើនក្នុងប៉ុន្មានខែនេះ មិនថា អ្នកស្ថិតក្នុងជួរទី១ ឬជួរទី២នោះទេ សុទ្ធតែត្រូវបានកីឡាករថៃធ្វើការព្រមាន បន្ទាប់ពីលោកថៃ អ៊ូ និងស្ថានីយទូរទស្សន៍អាស៊ីអាគ្នេយ៍បានប្រកាសនាំយកតែកីឡាករអាជីពមកពីប្រទេសថៃឱ្យមកប្រកួត ។ មានការយល់ថា កីឡាករថៃដែលមកប្រកួតនៅលើសង្វៀនទូរទស្សន៍អាស៊ីអាគ្នេយ៍ កាន់តែពិបាកឲ្យជើងខ្លាំងកម្ពុជាយកឈ្នះ ដោយសារតែកីឡាករថៃដែលបាននាំមក គឺជាកីឡាករអាជីពរបស់ថៃ និងដោយសារតែកីឡាករកម្ពុជាកាន់តែល្បីកាន់តែធ្លាក់ដៃ ដែលខុសពីកីឡាករបរទេសគឺកាន់តែមានមុខកាន់តែពិបាករកគូប្រកួតនោះ។ លោកថៃ អ៊ូ បានអះអាងថា កីឡាករ កាំឡៃ ភីត មានថ្វីដៃមុតស្រួចហើយបើទោះជាឡុង សុណ្ណឌឿន ជាជើងខ្លាំងម្នាក់ ក៏ទំនងជាមិនងាយទប់ប៉ុន្មានដែរ សម្រាប់ការប៉ះគ្នានៅរសៀលថ្ងៃខានស្អែក ។
យ៉ាងណាមិញ លោកបានបង្ហាញការព្យាករថា ប្រសិនបើកីឡាករកម្ពុជាអាចបញ្ចេញថ្វីដៃដូចជាកែង និងម៉ាត់បានល្អ និងរស់រវើកជាង នោះកីឡាកររបស់លោកនឹងក្លាយជាអ្នកយ៉ាប់វិញ ។ លោកថា កីឡាករ កាំឡៃ ភីត ធ្លាប់ប្រកួតបាន១០២ដង ឈ្នះ៨២ដង ចាញ់១៨ដង និងស្មើ២ដង ដោយការប្រកួតរបស់កីឡាកររូបនេះ លោកហ៊ានអះអាងដោយជំនឿចិត្តថា ថ្វីដៃក្នុងការវាយលុករបស់គេ គឺកាន់តែល្អ ដោយសារតែមុនយកមកគេបានហ្វឹកហាត់គ្រប់គ្រាន់ ។ លោកថា ការប្រកួតប៉ុន្មានលើកចុងក្រោយរបស់កីឡាកររូបនេះ ធ្វើឱ្យអ្នកស្នេហាការប្រដាល់ទាំងនៅកម្ពុជា និងប្រទេសថៃ សុទ្ធតែទទួលស្គាល់ថ្វីដៃរបស់គេនៅលើសង្វៀន។
យ៉ាងណាក៏ដោយ ផ្ទុយពីការព្យាកររបស់លោក ក្រុមអ្នកគាំទ្រកីឡាករឡុង សុវណ្ណឌឿន ក៏បានបញ្ចេញជំនឿចិត្តបែបនេះផងដែរ ថាការយល់ឃើញរបស់លោកថៃ អ៊ូ នឹងត្រូវបំបាក់ដោយភាពខ្លាំងក្លារបស់កីឡាករកម្ពុជា ។ មនុស្សជាច្រើនមិនយល់ឃើញថា កីឡាករឡុង សុវណ្ណឌឿន ទៅមិនរួចជាមួយកីឡាករ កាំឡៃ ភីត នោះទេ ដោយសំអាងថា ថ្វីដៃរបស់កីឡាកររូបនេះ ធ្លាប់ស៊ីកីឡាករបរទេសរាប់មិនអស់ទៅហើយ បូករួមទាំងមិត្តរួមអាជីពរបស់កីឡាករថៃដែលមកប្រកួតនៅកម្ពុជាផង ។ ថ្វីដ្បិតតែប្រវត្តិប្រកួតរបស់គេតិចជាងកីឡាករថៃក៏ពិតមែន ក៏ភាពរហ័ស និងបទពិសោធន៍នៅលើសង្វៀន គឺអាចគ្រប់គ្រាន់សម្រាប់ការប្រកួតរសៀលស្អែក។ ឡុង សុវណ្ណឌឿន ឆ្លងកាត់ការប្រកួតបាន៨១លើក ឈ្នះ៦៩លើក ចាញ់៩លើក និងស្មើ៣លើក ដោយមិនទាន់រាប់បញ្ចូលនូវការប្រកួតក្រៅផ្លូវការដែលបានធ្វើឡើងនៅឡើយ ។ ដូច្នេះទាំងបទពិសោធន៍ និងភាពប៉ិនប្រសប់គេចាត់ទុកថា កីឡាកររូបនេះ ក៏ចាស់ទុំណាស់ដែរសម្រាប់អាជីពជាអ្នកប្រដាល់របស់គេ ។ ក្រុមអ្នកទុកចិត្តគ្រូបង្វឹកប្រចាំនៅក្នុងក្លិបសាលវ័ន្តកីឡា នៅតែផ្ដល់ទំនុកចិត្តមួយភាគថាកីឡាករកម្ពុជារូបនេះនឹងទទួលបានជ័យជម្នះនៅរសៀលថ្ងៃស្អែក ។
នៅលើសង្វៀននេះដែរ កីឡាករសារឿន ច័ន្ទ មកពីក្លិបតាព្រហ្មមានជ័យរបស់លោកគ្រូមាស សុខគ្រី ក៏នឹងត្រូវប៉ះប្រកួតជាមួយកីឡាករថៃឈ្មោះ យ៉ត ស៊ីង នោះដែរក្នុងនាមជាគូអន្តរជាតិបើកឆាក ។ កីឡាករថៃរូបនេះ កាលពីមុនគេកត់សម្គាល់ថាខ្លាំងនៅលើសង្វៀនក្នុងការមកប្រកួតនៅក្នុងប្រទេសកម្ពុជា ។ ប៉ុន្តែប៉ុន្មានប្រកួតចុងក្រោយរបស់គេ ហាក់មិនសូវល្អឡើយ ដោយសូម្បីតែការប្រកួតជម្រើសជើងឯកនៅប៉ុស្ដិ៍លេខ៥ក៏ត្រូវហាលអាវនៅវគ្គមុនឆ្លងពូលនោះដែរ។ យ៉ាងណាក៏ដោយ គេមិនអាចមើលស្រាលចំពោះកីឡាករ យ៉ត ស៊ីង បានទេ ក្នុងពេលដែលកីឡាករសារឿន ច័ន្ទខ្លួនឯង ក៏មានចំណុចធ្លាក់ដៃផងដែរ ។ កីឡាករថៃគូនេះ ធ្លាប់ប្រកួតបាន៧១លើក ឈ្នះ៦១លើក ចាញ់៨លើក និងស្មើ២លើក ខណៈដែលសារឿន ច័ន្ទ ឯណោះវិញ ធ្លាប់ប្រកួត៧៥លើក ឈ្នះ៦៤លើក ចាញ់១០លើក និងស្មើ១លើកនៅលើសង្វៀន ៕
ចែករំលែកព័តមាននេះ