រាជធានីភ្នំពេញ ៖ ការប្រកួតប្រដាល់ជើងឯកគោជល់វគ្គ៤នៅលើសង្វៀន ទូរទស្សន៍CNCថ្ងៃសៅរ៍ទី១២ មីនា សប្ដាហ៍នេះ ឈានចូលដល់សប្ដាហ៍ទី២ហើយ ។ កីឡាករ សរ រាជសីហ៍ មកពីក្លិបមោងឬស្សីមរតកគុនខ្មែរ ជួបប្រកួតជាមួយកីឡាករថៃឈ្មោះផ្លាំងនុម លូកម៉ាខាមរ៉ាន និងកីឡាករ ពេជ្រ សីហា មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃដូចគ្នាឈ្មោះហ្វានិមិត្ត វិរិយៈហ្វាម ។
កាលវគ្គសន្សំពិន្ទុសប្ដាហ៍ទី១ គេនៅចាំបានថា ក្នុងចំណោមកីឡាករកម្ពុជា២រូបដែលជួបប្រកួតជាមួយកីឡាករឡាវមានតែកីឡាករ ឡុង សុភី មកពីក្លិបសាលវ័ន្តកីឡាប៉ុណ្ណោះ ជាអ្នករកបាន៣ពិន្ទុមុនគេ រីឯកីឡាករ រឿង សោភ័ណ្ឌ មកពីក្លិបមកុដរាជសីហ៍ ចាញ់ពិន្ទុកីឡាករឡាវ។ ចំណែកការប្រកួតលើកនេះ ទាំងកីឡាករសរ រាជសីហ៍ ទាំងកីឡាករ ពេជ្រ សីហា នៅមិនទាន់ដឹងថា អ្នកណាមានសំណាងរកបាន៣ពិន្ទុមុនគេនោះទេ ។
រវាងពេជ្រ សីហា និងហ្វានិមិត្ត វិរិរៈហ្វាម មានប្រវត្តិប្រកួតខុសគ្នាឆ្ងាយបន្តិចហើយ ។ ពេជ្រ សីហា ធ្លាប់ប្រកួតបាន១០៩ដង ឈ្នះ៨៦ដង ចាញ់១៦ដង ស្មើ៧ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន២៩ដង ។ រីឯកីឡាករថៃធ្លាប់ប្រកួតបាន១៨០ដង ឈ្នះ១២៩ដង ចាញ់៤៩ដង ស្មើ២ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន៤០ដង ។ អ្នកប្រដាល់ថៃរូបនេះ ថ្វីដ្បិតតែមិនធ្លាប់មកប្រកួតនៅស្រុកខ្មែរធ្វើឱ្យគេមិនដឹងពីថ្វីដៃប្រកួតនៅលើសង្វៀនថា ខ្លាំងប៉ុនណា ប៉ុន្តែបើពិនិត្យទៅលើប្រវត្តិប្រកួតវិញនោះ ពេជ្រ សីហា ប្រហែលជាយ៉ាប់បន្តិចហើយ ។ ពេជ្រ សីហាគឺជាអ្នកប្រដាល់ជើងខ្លាំងម្នាក់ដែរ ប៉ុន្តែមួយរយៈមកនេះរាងធ្លាក់កូដបន្តិច និងយូរៗម្ដង ទើបឃើញគេលេចមុខនៅលើសង្វៀន ។ ទោះជាយ៉ាងណា រវាងគូនេះគេមិនទាន់ដឹងថាយ៉ាងណាទេ មានតែរង់ចាំមើលការប្រកួតជាក់ស្ដែងប៉ុណ្ណោះ។
ចំណែក សរ រាជសី ដែលត្រូវជួបប្រកួតជាមួយផ្លាំងនុម លូកម៉ាខាមរ៉ាន ក៏មិនទាន់ដឹងថា យ៉ាងណានោះដែរ ។ សរ រាជសីហ៍ ធ្លាប់ប្រកួតបាន៤០ដង ឈ្នះ៣២ដង ចាញ់៧ដង ស្មើ១ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបានចំនួន៨ដង ។ រីឯកីឡាករថៃធ្លាប់ប្រកួតបាន៩១ដង ឈ្នះ៦៥ដង ចាញ់២១ដង ស្មើ៦ដង ។ អ្នកប្រដាល់ថៃរូបនេះក៏មិនធ្លាប់មកប្រកួតនៅស្រុកខ្មែរដែរ តែបើពិនិត្យទៅលើប្រវត្តិប្រកួតរវាងពួកគេទាំង២គេហ៊ានវាយតម្លៃថា សមត្ថភាពត្រឹមសរ រាជសីហ៍ ប្រហែលជាពិបាកបន្តិចហើយ ។
ដោយឡែកគូប្រកួតមិត្តភាពវិញមានកីឡាករសុខ ទូ មកពីក្លិបឃ្លាំងមឿងកីឡាខេត្តពោធិ៍សាត់ ប្រកួតជាមួយកីឡាករ ថាន រ៉ាឌី មកពីក្លិបតាព្រហ្មមានជ័យ និងកីឡាករ អាំង សំអាត មកពីក្លិបតាព្រហ្មមានជ័យ ប្រកួតជាមួយកីឡាករ កំពែង ខ្មៅ មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ