«Daily Mail» របស់អង់គ្លេសផ្សាយថា ប៉ូលិសឥណ្ឌាបានចូលចាប់ខ្លួនបុរស៣នាក់ ដែលឱ្យកូនស្រីស្ថិតក្នុងវ័យកុមារចំនួន៤នាក់ មានអាយុពី២ទៅ១២ឆ្នាំ រៀបការជាមួយកូនកំលោះអាយុស្រករគ្នា ។ ពិធីនោះរៀបចំឡើងនៅភូមិហ្គាជូណា ស្រុក Bhilwara រដ្ឋ Rajasthan នាភាគខាងលិចប្រទេស កាលពីថ្ងៃទី២៣ កុម្ភៈ ២០១៦ ។ ពិធីអាពាហ៍ពិពាហ៍គ្រោងរៀបចំឡើងនៅថ្ងៃទី២៥ កុម្ភៈ ប៉ុន្តែមនុស្សម្នាក់ក្នុងចំណោមឪពុករបស់កូនក្រមុំខ្លាចប៉ូលិសរារាំងក៏រៀបចំមុនកំណត់ឱ្យបានកាន់តែឆាប់ ។
អ្នកសារព័ត៌មានក្នុងស្រុកបានបន្លំខ្លួនធ្វើជាអ្នកស្រុកទៅចូលរួមក្នុងពិធីរៀបអាពាហ៍ពិពាហ៍នោះ ហើយទូរស័ព្ទប្តឹងប៉ូលិសឱ្យចាប់ខ្លួនឪពុករបស់កូនក្រមុំ ដែលមានអាយុ៣៧ឆ្នាំម្នាក់ និង៤០ឆ្នាំ២នាក់ ។ ចំណែកឪពុករបស់កូនក្រមុំម្នាក់ទៀតបានស្លាប់ទៅហើយ ។
បុរសទាំង៣នាក់នោះរងការចោទប្រកាន់ថា ល្មើសនឹងច្បាប់ព្រោះឥណ្ឌាមានច្បាប់ប្រឆាំងនឹងការរៀបការអនីតិជន ។ នៅឆ្នាំ១៩២៩ ច្បាប់កំណត់អាយុ១២ឆ្នាំឡើងអាចរៀបការបាន តែនៅឆ្នាំ១៩៧៨ ច្បាប់នេះបានធ្វើវិសោធនកម្មដោយតម្រូវឱ្យអ្នករៀបការត្រូវមានអាយុពី១៨ឆ្នាំឡើង ។
បុរសទាំង៤នាក់នោះប្រឈមនឹងការជាប់គុកយ៉ាងតិចពី៣ទៅ៤ឆ្នាំ និងពិន័យជាប្រាក់ក្នុងម្នាក់១០០.០០០រូពី (ប្រាក់ឥណ្ឌា) ឬប្រហែល១.៤០០ដុល្លារ ។
ចំពោះមូលហេតុដែលបុរសជាឪពុកទាំង៣នាក់នោះរៀបចំមង្គលការឱ្យកូនខ្លួនទាំងនៅវ័យកុមារបែបនេះ គេនៅមិនទាន់ដឹងនៅឡើយទេ ។ ពិធីមង្គលការនោះត្រូវបានចាត់ទុកជាមោឃៈ ៕
ចែករំលែកព័តមាននេះ