រាជធានីភ្នំពេញ ៖ ថ្នាក់ដឹកនាំក្រសួងសុខាភិបាល បានថ្លែងនៅថ្ងៃនេះថា ការដឹកនិងការបូជាសពអ្នកដែលបានស្លាប់ដោយសារតែជំងឺកូវីដ-១៩ គឺមិនត្រូវបានគិតប្រាក់នោះទេ ក្នុងនោះផងដែរ គឺមានអនុគណៈកម្មការគ្រប់គ្របសពត្រឹមត្រូវ ។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងប្រាប់អ្នកសារព័ត៌មានតាមគ្រុបតេឡេក្រាមនៅថ្ងៃទី ៥ ខែតុលា ថាការទាមទារប្រាក់ដើម្បីដឹកសព ឬបូជាសព គឺ «មិនត្រឹមត្រូវទេណា មិនមានការយកប្រាក់នោះឡើយ ហើយការគ្រប់គ្រងសពមានអនុគណ:កម្មការមួយ និងមានក្រុមការងារ ព្រមទាំងអ្នកដឹកនាំដោយឡែក។ ប្រសិនបើមានការទាមទារប្រាក់ទើបដឹកនោះ សុំទាក់ទងទៅអនុគណកម្មការនេះតាមលេខ 012 212 170 ។ សូមអរគុណ» ។
ការបញ្ជាក់របស់លោកជំទាវ ធ្វើឡើងក្រោយពីមានសាច់ញាតិរបស់អ្នកជំងឺដែលបានទទួលមរណភាព និងត្រូវបានតេស្តលើសាកសពឃើញថាមានផ្ទុកកូវីដ-១៩ ប្រភេទថ្មី Delta ថា អ្នកមកដឹកសពបានទាមទារថ្លៃដឹកសពដល់ទៅ ១០០០ ដុល្លារ ។
សាច់ញាតិមួយរូបរបស់ក្រុមគ្រួសារសពបានរៀបរាប់ថាទៅកាន់លោកជំទាវវេជ្ជបណ្ឌិត ឱ វណ្ឌឌីនថា ទាក់ទងនិងការបូជាសព (សពស្លាប់ដោយកូវីដ១៩ ដែលតា) តើក្រសួងមានគោលការណ៍ការគិតប្រាក់ ឬយ៉ាងណា ។
រឿងរ៉ាវកើតឡើង គឺពាក់ព័ន្ធនឹងក្មេងស្រីមួយរូប អាយុ៧ឆ្នាំ ស្លាប់ដោយជំងឺកូវីដ១៩ ប្រភេទដែលតា ស្លាប់ថ្ងៃ២ ខែតុលា ២០២១ មកដល់ថ្ងៃនេះសព ត្រូវតំកល់ នៅពេទ្យរុស្សី មិនទាន់បូជាទេ ខណះម្តាយ ត្រូវជាប់ធ្វើចត្តាឡីស័ក នៅក្នុងផ្ទះ ជាមួយកូនតូចៗ២នាក់ទៀត នៅខណ្ឌឬស្សីកែវ ។ ដូច្នេះអ្វីដែលសាច់ញាតិ របស់ក្មេងចង់សួរទៅអ្នកនាំពាក្យក្រសួងសុខាភិបាលថា តើក្រសួងសុខាភិបាល មានគោលការណ៍ យកលុយថ្លៃបូជាសព ពីគ្រួសារសព (អ្នកកើតកូវីដ១៩) ដែរទេ ហើយបើយកគេគិតសេវ៉ាប៉ុន្មានដែរ ។
សាច់ញាតិសពបានបន្តថា ព្រោះករណីនេះ ម្តាយសពប្រាប់ថា ខាងអ្នកមកដឹកសព ទារថ្លៃសេវា ជាង១០០០ពាន់ដុល្លា រួមនិងថ្លៃអ្នកមកដឹកសព ៤ ទៅ៥នាក់ »។ សាច់ញាត់របស់ក្មេងខាងលើបាន បន្តថា «ខាងគ្រួសារសព ជាស្រី្តមេម៉ាយ ឪពុកឈឺនៅផ្ទះ រួមជាមួយកូនតូច២នាក់ ដែលកំពុងធ្វើចត្តាឡីសាក់…ចឹងដើម្បីបានធាតុ ឬយកសពបូជា តើគ្រួសារត្រូវបង់ថ្លៃប៉ុន្មានដែរ ព្រោះ ពេលគ្រួសារសព ទាក់ទងទៅ ខាងមន្ទីពេទ្យរុស្សី គេថាទាល់ត្រូវចំណាយលុយ ជាង១ពាន់ ទៅ២ពាន់ ហើយសំដីសំដៅ របៀបជំនិតជនរងគ្រោះតែម្តង..សូមអ្នកមីងជ្រាប ករណីនេះផង » ។
សូមបញ្ជាក់ សព កុមារី ឈ្មោះ ជិន រិតី កើតថ្ងៃ២៣ ខែ១២ ២០១១ ស្លាប់ថ្លៃ២ ខែតុលា ២០២១ ) នៅក្នុងខណ្ឌឬស្សីកែវ។ មកដល់ថ្ងៃនេះសព នៅមិនទាន់បូជាទេ ដោយខាងពេទ្យ កំពុងចរចាររឿងលុយពីគ្រួសារសព ។ សាច់ញាតិរបស់សពបានថ្លែងប្រាប់កោះសន្តិភាពលម្អិតថា គិតមកដល់ម៉ោងប្រមាណជិត ៤ រសៀលសពក្មេងស្រី នៅមិនទាន់បានបូជានៅឡើយទេ ។
លោកបានបន្តថា ដើមរឿងដំបូង គឺមានអ្នករស់នៅជាមួយម្នាក់ ត្រូវបានរកឃើញវិជ្ជមានកូវីដ -១៩ ហើយត្រូវបានយកទៅសម្រាកព្យាបាលនៅមណ្ឌលព្យាបាលកូវីដ-១៩ មួយកន្លែង។
ដូច្នេះផ្ទះទាំងមូលត្រូវបានធ្វើចត្តាឡីស័ក ក្រោយមកស្រាប់តែក្មេងស្រីមានអាការៈក្តៅខ្លួន បាន ២ ថ្ងៃក៏ស្លាប់បាត់បង់ជីវិត ហើយត្រូវបានធ្វើតេស្តសាកសព ត្រូវបានពេទ្យបញ្ជាក់ថា មានវិជ្ជមានកូវីដ-១៩ ប្រភេទបំប្លែងថ្មីដែលតា ទៀត ។ លោកបានបន្តថា «គ្នាជាគ្រួសារក្រីក្រ ហើយត្រូវធ្វើចត្តាឡីស័កទៀត មានលុយឯណាច្រើនយ៉ាងនេះ» ៕
ចែករំលែកព័តមាននេះ