ផ្សារដំដែក ក្នុងស្រុកសូទ្រនិគម ជាទីតាំងឆ្លងកូវីដ បន្តបិទ ១៤ថ្ងៃទៀត រហូតដល់ថ្ងៃទី១៧តុលា
- សៀមរាប
ខេត្តសៀមរាប៖ អភិបាលខេត្តសៀមរាប លោក ទៀ សីហា នៅថ្ងៃទី៤ ខែតុលានេះ បានចេញលិខិត សម្រេចបន្តបិទផ្សារដំដែក ស្ថិតក្នុងភូមិដំដែកផ្សារ ឃុំដំដែក ស្រុកសូទ្រនិគម ដែលជាទីតាំងមានការឆ្លងរាលដាលជំងឺកូវីដ១៩ ជាបណ្តោះអាសន្ន សម្រាប់រយៈពេល ២សប្តាហ៍ រហូតដល់ថ្ងៃទី១៧ ខែតុលា ឆ្នាំ២០២១។ ការបន្តបិទផ្សារដំដែក នៅខេត្តសៀមរាបនេះ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ១៩ នៅក្នុងភូមិសាស្ត្រទីតាំង ដែលត្រូវបិទ និងទប់ស្កាត់ជំងឺនេះ មិនឲ្យឆ្លងរាលដាលទៅតំបន់ផ្សេងទៀត។
ដោយសារតែមានអាជីវករនៅផ្សារដំដែក ឆ្លងកូវីដ ទើបរដ្ឋបាលខេត្តសៀមរាប សម្រេចបិទផ្សារដំដែក ស្ថិតនៅភូមិដំដែកផ្សារ ឃុំដំដែក ស្រុកសូទ្រនិគម រយៈពេល ១៤ថ្ងៃ គិតចាប់ពីថ្ងៃទី២ ខែកក្កដា ឆ្នាំ២០២១ ដែលជាទីតាំងមានការឆ្លងរាលដាលជំងឺកូវីដ-១៩។
ក្រោយមក នៅថ្ងៃទី២១ ខែកញ្ញា ឆ្នាំ២០២១ លោក ទៀ សីហា ក៏បានសម្រេចបន្តបិទផ្សារដំដែក ស្ថិតនៅភូមិដំដែកផ្សារ ឃុំដំដែក ស្រុកសូទ្រនិគម ខេត្តសៀមរាប ដែលជាទីតាំងមានការឆ្លងរាលដាលនជំងឺកូវីដ១៩ ខេត្តសៀមរាប ជាបណ្ដោះអាសន្ន សម្រាប់រយៈពេល ២ (ពីរ)សប្តាហ៍ ចាប់ពីថ្ងៃទី២១ ខែកញ្ញា ដល់ថ្ងៃទី០៤ ខែតុលា ឆ្នាំ២០២១ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ-១៩។
នៅសៀមរាប ផ្ទុះឆ្លងកូវីដ១៩ ច្រើនកន្លែង ហើយក៏មានផ្សារជាច្រើន នៅបន្តបិទជាបណ្តោះអាសន្ន ដើម្បីទប់ស្កាត់ការឆ្លងរាលដាលជំងឺកូវីដ១៩៕
ចែករំលែកព័តមាននេះ