នគរបាលចរាចរឃាត់រថយន្តដឹកដី ធ្លាក់រាយប៉ាយលើផ្លូវយកអប់រំ
ខេត្តបន្ទាយមានជ័យ ៖ រថយន្តមួយគ្រឿងដឹកដីហូរធ្លាក់នៅលើដងផ្លូវជាតិលេខ៥ កាលពីម្សិលមិញ ត្រូវបានកម្លាំងនគរបាលចរាចរជើងគោកខេត្តបន្ទាយមានជ័យ
ខេត្តបន្ទាយមានជ័យ ៖ រថយន្តមួយគ្រឿងដឹកដីហូរធ្លាក់នៅលើដងផ្លូវជាតិលេខ៥ កាលពីម្សិលមិញ ត្រូវបានកម្លាំងនគរបាលចរាចរជើងគោកខេត្តបន្ទាយមានជ័យ បានដេញតាមចាប់យកមកការិយាល័យ ដើម្បីធ្វើការអប់រំ ។ មន្ត្រីនគរបាលចរាចរខេត្តបន្ទាយមានជ័យ បានឲ្យដឹងថាអ្នកបើកបររថយន្តឈ្មោះ សុខ ថារ៉ា ភេទប្រុស អាយុ២៨ឆ្នាំ នៅភូមិប្ញស្សីក្រោក ឃុំប្ញស្សីក្រោក ស្រុកមង្គលបូរី រថយន្តម៉ាកនីសាន់កែច្នៃដឹកដី ពាក់ស្លាកលេខ កំពង់ធំ 3A-0059 ។
តាមការៀបរាប់ពីឈ្មោះសុខ ថារ៉ា គេបានដឹកដីពីចំណុចភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ឆ្ពោះទៅកាន់ ស្រុកមង្គលបូរី តែគេមិនបានដឹងពីមូលហេតុបង្កឲ្យធ្លាក់ដីនោះទេ តែនេះក៏ជាការឆ្វេសប្រហែសរបស់គេ មិនបានពិនិត្យមើលគ្រប់ជ្រុងជ្រោយ ពេលមើលឃើញតាមកញ្ចក់គេក៏បានឈប់រថយន្ត ដើម្បីយកសំណាញ់ចងរឹតទ្វាររថយន្តកុំឲ្យជ្រុះដីដែរ ។ លោកសួន នីប៉ូ នាយរងការិយាល័យ នគរបាលចរាចរជើងគោកខេត្ត បានបញ្ជាក់ថា កត្តាដែលធ្វើឲ្យធ្លាក់ជ្រុះដីពេញរាយប៉ាយនៅលើផ្លូវជាតិនេះ គឺមកពីអ្នកបើកបរខ្វះការប្រុងប្រយ័ត្ន ដោយកិបគន្លឹះទ្វារក្រោយមិនជិតទើបបង្កឲ្យជ្រុះដីដូច្នេះ ។
លោកបានបញ្ជាក់ទៀតថា ដើម្បីជាគំរូឲ្យអ្នកបើកបររថយន្តដឹកដីផ្សេងទៀតកុំយកតម្រាប់តាមនោះ សមត្ថកិច្ចបានឲ្យសាមីខ្លួនជាអ្នកបើកបរទៅកាយដីដែលជ្រុះធ្លាក់លើថ្នល់ជាតិ ត្រង់ចំណុចភូមិសែសិន សង្កាត់អូរអំបិលនោះ ឲ្យអស់ពីលើដងផ្លូវ ។ទាក់ទិននិងការចាប់រថយន្តដឹកដីបង្កឲ្យដីជ្រុះធ្លាក់នោះ ប្រជាពលរដ្ឋ មានសេចក្តីត្រេកអរ ហើយថែមទាំង និយាយរិៈគន់ថា គ្រប់រថយន្តដឹកដីច្រើតែពួកគ្មានសុវជីវធម៌ ក្នុងការបើកបរ ទោះបីជាក្នុងប្រជុំជនក៏មិនសូវបង្អង់ល្បឿនដែរ ហើយពួកគាត់បានមើលរថយន្តខ្លះ ដឹកដីហៀរពេញគ្មានទាំងគ្របសំណាញ់ អ្នកខ្លះឃើញថាបានគ្រប់សំណាញ់បានត្រឹមត្រូវ ប៉ុន្តែគាត់ក៏បានសង្កត់ធ្ងន់ដែរថា រថយន្ដដឹកដីមិនបានគ្របសំណាញ់នោះ សុទ្ធតែអ្នកមានខ្នងអាង ដូច្នេះគាត់បានសំណូមពរដល់អាជ្ញាធរ និងសមត្ថកិច្ចពាក់ព័ន្ធមេត្តាមើលផង។
កាលពីពេលថ្មីៗកន្លងទៅនេះ លោកឧត្តមសេនីយ៍ទោ អាត់ ខែម ស្នងការនគរបាលខេត្ត បន្ទាយមានជ័យ បានដាក់បទបញ្ជាដល់ការិយាល័យនគរបាលចរាចរ ចុះធ្វើការអប់រំផ្សព្វផ្សាយ ដល់អ្នកបើកបរេថយន្តដឹកដី ដល់ការដ្ឋាន ជីកកាយដីនៅភូមិពង្រ និងភូមិកងវ៉ា សង្កាត់កំពង់ស្វាយ នោះដែរពីការដឹកដីមិនឲ្យហៀរពេញដែលបង្កឲ្យជ្រុះដី ធ្លាក់លើផ្លូវ និងបើកបរត្រូវគោរពច្បាប់ចរាចរផ្លូវគោកថ្មី ។ បើតាមការត្រួតពិនិត្យប័ណ្ណបើកបរទៅលើអ្នកបើកបររថយន្តដឹកដីចំនួន៣៧រូប នៅការដ្ឋានទាំង២ខាងលើនោះ គឺរកឃើញអ្នកមានប័ណ្ណបើកបរតែ១៤រូបប៉ុណ្ណោះ ប៉ុន្តែពួកអ្នកទាំងដែលគ្មាននោះគេនិយាយថា បានទៅធ្វើប័ណ្ណបើកបរហើយតែនៅមិនទាន់បាន នេះបើតាមការឲ្យដឹងពីលោកវរសេនីយ៍ទោ គី មករា នាយរងការិយាល័យនគរបាលចរាចរដែលចុះទៅពិនិត្យផ្ទាល់៕
ចែករំលែកព័តមាននេះ