ក្នុងឱកាសបុណ្យភ្ជុំបិណ្ឌនេះ ក្រសួងការងារ និងបណ្តុះបណ្តាលវិជ្ជាជីវៈបានអនុញ្ញាតឱ្យគ្រប់ស្ថាប័នទាំងអស់ ទាំងស្ថាប័នរដ្ឋ និងឯកជនឈប់សម្រាករយៈពេលបីថ្ងៃគឺនៅថ្ងៃ៥,៦,៧ តុលា ហើយក្រុមហ៊ុនខ្លះអូសបន្លាយពេលឈប់សម្រាករហូតដល់មួយសប្តាហ៍ក៏មាន ជាឱកាសមិនថា កម្មករកាត់ដេរ អ្នកមករៀនសូត្រ…
ក្នុងឱកាសបុណ្យភ្ជុំបិណ្ឌនេះ ក្រសួងការងារ និងបណ្តុះបណ្តាលវិជ្ជាជីវៈបានអនុញ្ញាតឱ្យគ្រប់ស្ថាប័នទាំងអស់ ទាំងស្ថាប័នរដ្ឋ និងឯកជនឈប់សម្រាករយៈពេលបីថ្ងៃគឺនៅថ្ងៃ៥,៦,៧ តុលា ហើយក្រុមហ៊ុនខ្លះអូសបន្លាយពេលឈប់សម្រាករហូតដល់មួយសប្តាហ៍ក៏មាន ជាឱកាសមិនថា កម្មករកាត់ដេរ អ្នកមករៀនសូត្រ អ្នកមកធ្វើការ អ្នករកស៊ី ឬអ្នករស់នៅភ្នំពេញ និងតាមបណ្តាខេត្តនោះទេ គឺភាគច្រើនបានធ្វើដំណើរទៅលេងស្រុកកំណើតដើម្បីបានជួបជុំឪពុកម្តាយ បង ប្អូន ញាតិមិត្តជិតឆ្ងាយផង និងសប្បាយក្នុងការបំពេញកុសលផលបុណ្យក្នុងរដូវកាន់បិណ្ឌ និងភ្ជុំបិណ្ឌនេះផង ។
បើទោះជាឆ្នាំនេះបុណ្យកាន់បិណ្ឌ និងភ្ជុំបិណ្ឌត្រូវបានផ្អាកក្តី តែវត្តអារាមនៅជនបទស្រុកស្រែចំការ នៅតែបើកឲ្យប្រជាពុទ្ធបរិស័ទយកចង្ហាន់ និងទេយ្យទានទៅប្រគេនព្រះសង្ឃជាធម្មតា ដូច្នេះពេលកូនចូលវត្តអារាមត្រូមានសុជីវធម៌ជានិច្ច ព្រោះការរស់នៅក្នុងសង្គម សុជីវធម៌មិនអាចខ្វះបានឡើយ ព្រោះសង្គមត្រូវការមនុស្សបែបនេះច្រើនណាស់ណាកូន ។
ជាមួយគ្នានេះចូរកូនអនុវត្តឱ្យបានខ្ជាប់ខ្ជួននូវវិធានការរបស់ក្រសួងសុខាភិបាល «៣ការពារ និង៣កុំ»ឱ្យបានដាច់ខាត ជាពិសេសត្រូវពាក់ម៉ាស លាងដៃញឹកញាប់នឹងសាប៊ូ ឬអាល់កុល ព្រមទាំងរក្សាគម្លាតសុវត្ថិភាពក្នុងពេលចូលទៅប្រគេនចង្ហាន់ព្រះសង្ឃផងព្រោះខណៈនេះមានមនុស្សច្រើននាំគ្នាទៅវត្តជាក្រុមៗដែរ កូនត្រូវយកតាមខ្លួននូវទឹកអាល់កុល ឬជែលជានិច្ចទើបមិនសូវមានហានិភ័យពីការចម្លងជំងឺកូវីដបាន ។
ការរស់នៅក្នុងសង្គម បើយើងមិនមានសុជីវធម៌ទេ មិនថាយើងរៀនដល់កម្រិតណានោះទេ វាទុកដូចជាអ្នកអត់បានរៀនអ៊ីចឹងដែរ ។ ដូចជាការនិយាយស្ដីត្រូវតែសុភាពរាបសាជានិច្ច មិនត្រូវពោលពាក្យអាក្រក់នោះឡើយ ពេលដែលកូនចូលវត្តអារាមជាកន្លែងសក្ការបូជា ជាទីគោរព កូនមិនត្រូវសម្ដែងកិរិយាមិនគប្បីសោះឡើយ អ្នកជិះកង់ ម៉ូតូ កុំលឿនពេកគប្បីបន្ថយល្បឿនខ្លះផង បើកូនអាចចុះបណ្ដើរបានរឹតតែប្រសើរ វាមិនជាយូរប៉ុន្មានទេត្រឹមតែចម្ងាយក្នុងវត្តប៉ុណ្ណឹងនោះ ។
យើងជានារីខ្មែរត្រូវចេះសង្រួមពេលចូលទៅក្នុងវត្តអារាមណាកូនម៉ែ ដូចជាការនិយាយស្ដីកូនត្រូវពិចារណាផងណា ព្រោះពេលដែលយើងនិយាយអាចនឹងប៉ះពាល់ដល់អ្នកនៅជុំវិញខ្លួនយើងដែលគេកំពុងស្ដាប់ កូននិយាយត្រូវនិយាយសំឡេងកុំឮពេកមិនល្អទេក្រែងគេនិយាយដើមណាកូន ។
មួយទៀតចូរកូនកុំធ្វើជាមនុស្សរឹងរូស តែត្រូវធ្វើជាមនុស្សរឹងប៉ឹង មិនត្រូវធ្វើជាមនុស្សទន់ជ្រាយ តែត្រូវធ្វើជាមនុស្សទន់ភ្លន់ជានិច្ច ព្រោះកូនស្រីម៉ែរឹតតែទន់ភ្លន់រឹតតែល្អណាកូន ពេលដែលប្រុសៗគេឃើញកូនភ្លាម គេរមែងមើលកូន ចាប់ចិត្តនឹងកូន ស្រឡាញ់រាប់អានកូនភ្លាម ពេលដែលគេថាស្រលាញ់នោះគេមើលយើងអស់ហើយណាកូន ដូចជាការស្លៀកពាក់ដ៏សមរម្យរបស់កូនក្នុងរដូវបុណ្យទានជាដើម ។
បើកូនធ្វើជាមនុស្សឆើតឆាយស្លៀកពាក់ខើចលើខើចក្រោម វាលមុខ វាលក្រោយ ហើយចូលទៅអង្គុយនៅចំពោះមុខព្រះសង្ឃ គេស្រឡាញ់កូនត្រឹមតែបោកប្រាស់តែប៉ុណ្ណោះណាកូនស្រីម៉ែ ត្រូវតែប្រុងប្រយ័ត្នឲ្យមែនទែនព្រោះមនុស្សប្រុសថ្វីត្បិតតែថា ស្រលាញ់កូនពិតមែន តែគេរើសណាស់ណាកូនស្រី ធម្មតាគេឃើញរូបកូនស្លៀកពាក់ឆើតឆាយចេះតែថាស្រឡាញ់ឲ្យរួចពីមាត់របស់គេទៅ មើលទៅកូនប្រហែលបានត្រឹមតែត្រូវគេបោកប្រាស់តែប៉ុណ្ណោះ ។
តែបើកូនសុភាពរាបសាស្លៀកពាក់សមរម្យ អាវប៉ាក់ សំពត់បត់វិញនោះមើលទៅល្អណាស់សមជានារីខ្មែរ ឃើញហើយគេមិនហ៊ាននិយាយមើលងាយកូនឡើយ ព្រោះពួកប្រុសៗទាំងអស់ខ្លាចស្ត្រីណាដែលមានចរិតសុភាពរាបសា ។ ពេលកូនធ្វើខ្លួនសុភាពរាបសាកុំភ័យខ្លាចអត់ប្ដីឲ្យសោះណាកូន មនុស្សល្អរមែងជួបនឹងមនុស្សល្អគ្រប់ៗជាតិ ៕
ចែករំលែកព័តមាននេះ