រាជធានីភ្នំពេញ ៖ ដោយមានការលើកទឹកចិត្តពីរាជរដ្ឋាភិបាល និងបណ្តាអង្គការផ្សេងៗឃើញថា បច្ចុប្បន្នសហគ្រិនស្រី្តកម្ពុជាបានចូលរួមក្នុងសង្គមច្រើន និងបានពង្រីកអាជីវកម្មរបស់ខ្លួនកាន់តែធំជាងមុន ។
រាជធានីភ្នំពេញ ៖ ដោយមានការលើកទឹកចិត្តពីរាជរដ្ឋាភិបាល និងបណ្តាអង្គការផ្សេងៗឃើញថា បច្ចុប្បន្នសហគ្រិនស្រី្តកម្ពុជាបានចូលរួមក្នុងសង្គមច្រើន និងបានពង្រីកអាជីវកម្មរបស់ខ្លួនកាន់តែធំជាងមុន ។ លើសពីនេះ សហគ្រិនស្ត្រីកម្ពុជា ក៏ទទួលបាននូវពានរង្វាន់ទាំងថ្នាក់ជាតិ និងអន្តរជាតិផងដែរ តួយ៉ាងថ្មីនេះៗមានក្រុមហ៊ុនចំនួន១០ដែលដឹកនាំដោយស្ត្រីដូចជា ក្រុមហ៊ុន Lotus Silk , Sophiya Travel & Tour, M Rubber Plantation, Himawari Hotel Apartments, RTR Tour, PTM Travel & Tours, Agel Trading, CEDAC, Sky King Travel & Tour និង MOB Corparation បានទទួលពានរង្វាន់ជាសហគ្រិនស្ត្រីឆ្នើមអាស៊ាន២០១៦ នៅទីក្រុងហាណូយ ប្រទេសវៀតណាម ។
លោកស្រី កែវ មុំ ប្រធានសមាគមសហគ្រិនស្ត្រីកម្ពុជា និងជានាយិកាសហគ្រាសផលិតនំស្រួយលីលី បានមានប្រសាសន៍ថា ៖ « នៅឆ្នាំនេះ សមាជិករបស់សមាគមសហគ្រិនកម្ពុជាចំនួន១០រូបទទួលបានពានរង្វាន់ជាសហគ្រិនស្ត្រីឆ្នើមពី ASEAN WOMEN ENTERPRENEURS’ FORUM ដែលប្រារព្ធឡើងនៅទីក្រុងហាណូយ ប្រទេសវៀតណាម ដែលនេះមិនមែនជាលើកទី១ ទេ ។ កាលពីឆ្នាំ២០១៥កន្លងមក សហគ្រិនស្ត្រីកម្ពុជាចំនួន៦រូប ក្នុងនោះមាននាងខ្ញុំផងដែរ ក៏ទទួលបានពានរង្វាន់ ជាសហគ្រិនស្ត្រីឆ្នើមអាស៊ានពីកម្មវិធីនេះផងដែរ » ។
លោកស្រីបន្តថា ៖ « ASEAN WOMEN ENTERPRENEURS’ FORUM មានសហគ្រិនស្ត្រីចូលរួមទទួលពានរង្វាន់មកពី១០ប្រទេសក្នុងតំបន់អាស៊ាន ហើយដើម្បីទទួលបានជាសហគ្រិនស្ត្រីឆ្នើមនេះ គឺតម្រូវឲ្យសហគ្រិនស្ត្រីទាំង១០ប្រទេសនោះបំពេញនូវលក្ខខណ្ឌមួយចំនួនដូចជា អាជីវកម្មចាប់ផ្តើមរយៈពេល៣ឆ្នាំឡើង ហើយរាល់អាជីវកម្មរបស់ពួកគាត់ គឺបានជួយដល់ស្ត្រីនៅក្នុងសង្គម ការធ្វើអាជីវកម្មត្រូវធ្លាប់ទទួលបានពានរង្វាន់ផ្សេងៗពីថ្នាក់ជាតិ ឬអន្តរជាតិ ។ល។ នៅក្នុងសមាហរណកម្មសេដ្ឋកិច្ចអាស៊ាននេះ សម្រាប់សមាគមសហគ្រិនស្ត្រីយល់ថា វាមានគុណវិបត្តិនិងគុណសម្បត្តិ តែយើងទទួលបានគុណសម្បត្តិធំជាងគុណវិបត្តិ។ ផលិតផលខ្មែរផលិតបានពេលមុនៗ យើងលក់ជូនអ្នកប្រើប្រាស់នៅក្នុងប្រទេសកម្ពុជាបានត្រឹម ១៥លាននាក់ ប៉ុន្តែនៅពេលយើងចូលក្នុងសមាហរណកម្មអាស៊ានយើងមានអ្នកប្រើប្រាស់រហូតដល់៦៥០លាននាក់ ដែលអាចប្រើប្រាស់ផលិតផលខ្មែរ។ លើសពីនេះទៀត វាជាឱកាសសម្រាប់ម្ចាស់ក្រុមហ៊ុនអាចពង្រីកទីផ្សារផលិតផលបានល្អផងដែរ » ។
ចំណែកនាយិកាក្រុមហ៊ុន MOB Corperation លោកស្រី ជា សុផល្លា បានមានប្រសាសន៍ដែរថា ៖ « នៅក្នុងក្រុមហ៊ុន MOB សព្វថ្ងៃនេះយើងមានក្រុមហ៊ុនចំនួន៨ មានទាំងក្រុមហ៊ុនផ្តល់សេវាកម្ម និងក្រុមហ៊ុនអចលនទ្រព្យ ។ កាលពីថ្ងៃទី៥ មីនា កន្លងមកនេះ ក្រុមហ៊ុន MOB ទទួលបានពានរង្វាន់ជាសហគ្រិនស្ត្រីឆ្នើមអាស៊ានដែលនេះគឺជាលើកទី១ » ។
លោកស្រីបន្តថា ៖ « មុននឹងទទួលបានពានរង្វាន់ជាសហគ្រិនស្ត្រីឆ្នើមនេះ គឺទាមទាឲ្យសហគ្រិនស្ត្រី (ម្ចាស់ក្រុមហ៊ុន) បំពេញនូវលក្ខខណ្ឌចាំបាច់មួយចំនួនតម្រូវដោយខាងគណៈកម្មកាវាយតម្លៃ ។ នៅក្នុងលក្ខខណ្ឌទាំងនេះសម្រាប់ក្រុមហ៊ុន MOB ខ្ញុំគិតថា វាមិនមែនជាបញ្ហានោះទេ ព្រោះក្រុមហ៊ុនយើងបានចុះឈ្មោះជាមួយក្រសួងពាណិជ្ជកម្មត្រឹមត្រូវ និងបានដំណើរការអស់រយៈពេលជាច្រើនឆ្នាំមកហើយ។ សព្វថ្ងៃនេះ ក្រុមហ៊ុនបានផ្តល់ឱកាសដល់ស្ត្រីកម្ពុជា ទទួលបានការងារនៅក្រុមហ៊ុនប្រមាណជា៧៥% មានគ្រប់កម្រិត ដែលមានការបណ្តុះបណ្តាលជំនាញបន្ថែម និងលើកទឹកចិត្តផ្សេងៗ » ។
លោកស្រីបន្ថែមថា ៖ « ការទទួលបានពានរង្វាន់សហគ្រិនស្ត្រីឆ្នើមនៅប្រទេសវៀតណាមកន្លងមកនេះ គឺវាបានផ្តល់ឱកាសល្អ និងមុខមាត់មួយដល់សហគ្រិនស្ត្រីកម្ពុជា បានចូលរួមជាមួយសហគ្រិនស្ត្រីអាស៊ានផ្សេងទៀត ហើយសំខាន់បំផុតសម្រាប់ក្រុមហ៊ុនខ្ញុំផ្ទាល់ វាជាមោទនភាពមួយក្នុងចំណោមក្រុមហ៊ុនជាច្រើនផ្សេងទៀត ដែលទទួលបានពានរង្វាន់សហគ្រិនស្ត្រីឆ្នើមអាស៊ានឆ្នាំ២០១៦នេះ និងរឹតតែធ្វើឲ្យយើងមានការខិតខំប្រឹងប្រែង ធ្វើយ៉ាងម៉េចឲ្យសហគ្រិនវ័យក្មេងកម្ពុជាមានកិត្តិយសខ្ពស់ជាងនេះបន្តទៀត » ៕
ចែករំលែកព័តមាននេះ