យោងតាម YONHAP ថា សមយុទ្ធយោធារួមដោយទ្រង់ទ្រាយធំរវាងកងទ័ពកូរ៉េខាងត្បូង និងសហរដ្ឋអាមេរិកនឹងចាប់ផ្តើមនាថ្ងៃទី៧ មីនា ជាមួយការប្រមូលផ្តុំបណ្តាមធ្យោបាយយុទ្ធសាស្ត្រសំខាន់ៗ ពិសេសយន្តហោះទម្លាក់គ្រាប់បែក
យោងតាម YONHAP ថា សមយុទ្ធយោធារួមដោយទ្រង់ទ្រាយធំរវាងកងទ័ពកូរ៉េខាងត្បូង និងសហរដ្ឋអាមេរិកនឹងចាប់ផ្តើមនាថ្ងៃទី៧ មីនា ជាមួយការប្រមូលផ្តុំបណ្តាមធ្យោបាយយុទ្ធសាស្ត្រសំខាន់ៗ ពិសេសយន្តហោះទម្លាក់គ្រាប់បែកបំបាំងកាយ B-2 ប្រឈមមុខនឹងការបង្កហេតុថ្មីៗរបស់កូរ៉េខាងជើង ។
អ្នកទទួលខុសត្រូវម្នាក់នៃអាជ្ញាធរយោធាកូរ៉េខាងត្បូងអះអាងនាថ្ងៃទី៦ មីនា ថា សមយុទ្ធយោធាឈ្មោះ KEY RESOLVE និង FOAL EAGLE នឹងប្រព្រឹត្តទៅពីថ្ងៃទី៧ មីនា រហូតដល់ថ្ងៃទី៣០ មេសា ខាងមុខនេះ ។ នេះជាសមយុទ្ធដែលមានទំហំធំបំផុតបើប្រៀបធៀបទៅនឹងសមយុទ្ធលើកមុនៗ ក្នុងនោះរួមទាំងសមយុទ្ធដែលប្រព្រឹត្តទៅកាលពីឆ្នាំ២០១០ ក្រោយការបាញ់ពន្លិចនាវាចម្បាំងកូរ៉េខាងត្បូងឈ្មោះ CHEONAN ទៀតផង ។
សម្រាប់សមយុទ្ធយោធាដ៏ធំនេះ ទាហានអាមេរិកដល់ទៅ១.៥០០នាក់ ដែលដាក់ពង្រាយនៅកូរ៉េខាងត្បូង ព្រមទាំងទាហានកូរ៉េខាងត្បូងដល់ទៅ៣០០.០០០នាក់នឹងចូលរួម ។ ខាងអាមេរិក កងពលតូចប្រយុទ្ធតាមអាកាសមួយកង កងពលតូចចល័តនៃកងម៉ារីនមួយកង នាវាផ្ទុកយន្តហោះ USS JOHN STENNIS (CVN-74) នាវាមុជទឹកប្រើថាមពលនុយក្លេអ៊ែរមួយគ្រឿង ព្រមតាំងយន្តហោះផ្គត់ផ្គង់យោធាមួយគ្រឿងនឹងចូលរួមក្នុងសមយុទ្ធនេះ ។
KEY RESOLVE ជាសមយុទ្ធធ្វើត្រាប់សង្គ្រាមនៅតាមប៉ុស្តិ៍ទីបញ្ជាការ CPX នឹងធ្វើតាមរយៈកុំព្យូទ័របែបការលុកលុយមួយរបស់កូរ៉េខាងជើង ដើម្បីធ្វើសារឡើងវិញ ការដាក់ពង្រាយកងទ័ព ព្រមទាំងពីតាក់ទិកតបតយោងតាមសេណារីយ៉ូផ្សេងៗ ។
ជាលើកដំបូងក្នុងប្រវត្តិសាស្ត្រសមយុទ្ធ KEY RESOLVE នឹងអនុវត្តគម្រោងប្រតិបត្តិការលេខ៥០១៥ ដែលអនុញ្ញាតឱ្យវាយប្រហារបង្ការ ប្រឆាំងបណ្តាទីតាំងនុយក្លេអ៊ែរ និងមីស៊ីល ។ នេះបើតាមការពន្យល់របស់អ្នកទទួលខុសត្រូវនៃអាជ្ញាធរយោធា ។ អ្នកទទួលខុសត្រូវរូបនេះបន្តថា កាលពីឆ្នាំទៅមិញពេលធ្វើសមយុទ្ធយោធាឈ្មោះ ULCHI GUARDIAN FREEDOM ផែនការប្រតិបត្តិការលេខ៥០១៥ ត្រូវបានអនុវត្ត ក៏ប៉ុន្តែសម្រាប់សមយុទ្ធ KEY RESOLVE ផែនការនេះនឹងអនុវត្តជាលើកដំបូង ។
ម្យ៉ាងវិញទៀត សមយុទ្ធរបស់កងម៉ារីននៃប្រទេសទាំង២នឹងប្រព្រឹត្តទៅដំណាលគ្នានាថ្ងៃទី៧ មីនា រហូតដល់ថ្ងៃទី១៨ មីនា ក្រោមឈ្មោះថា SSANGYONG ជាភាសាកូរ៉េមានន័យថានាគ២ ដោយប្រមូលផ្តុំទាហានម៉ារីនកូរ៉េខាងត្បូង២.០០០នាក់ និងទាហានម៉ារីនអាមេរិក៧.០០០នាក់ ព្រមទាំងនាវាចម្បាំងមួយកងដែលមកដល់រួចហើយ ។
ក្នុងពេលធ្វើសមយុទ្ធយោធាយ៉ាងធំបំផុតនេះពុំធ្លាប់មានពីមុនមក អាជ្ញាធរយោធារបស់ប្រទេសទាំង២ បានពង្រឹងសមត្ថភាពត្រួតពិនិត្យ និងវិភាគបណ្តាព័ត៌មានស៊ើបការណ៍ជាមួយការជួយទ្រទ្រង់របស់បណ្តាផ្កាយរណបយោធា និងបណ្តាយន្តហោះស៊ើបការណ៍ ។
ប្រឈមមុខនឹងសមយុទ្ធដ៏ធំនេះនៅកូរ៉េខាងត្បូង ទីបញ្ជាការយោធាជាន់ខ្ពស់របស់កូរ៉េខាងជើងបានចេញសេចក្តីប្រកាសមួយកាលពីថ្ងៃទី២៣ កុម្ភៈ កន្លងមកនេះ ដោយចាត់ទុកវិមានខៀវ គឺវិមានប្រធានាធិបតីកូរ៉េខាងត្បូងជាគោលដៅវាយប្រហារទីមួយសម្រាប់ការវាយប្រហារបង្ការរបស់ខ្លួន ។ សេចក្តីប្រកាសនេះបន្តថា យើងនឹងចាប់ផ្តើមធ្វើប្រតិបត្តិការបង្ការដ៏យុត្តិធម៌ក្នុងករណីមានសញ្ញាយ៉ាងតូចនៃការវាយប្រហាររបស់កងកម្លាំងពិសេស និងបណ្តាឧបករណ៍ប្រតិបត្តិការរបស់សត្រូវ ។
រួចកាលពីថ្ងៃទី៣ មីនា កន្លងមកនេះ សារព័ត៌មានផ្លូវការកូរ៉េខាងជើងរាយការណ៍ថា លោកគីម ជុងអ៊ុន ក្នុងឱកាសចុះត្រួតពិនិត្យសមយុទ្ធបាញ់ប្រព័ន្ធរ៉ុក្កែតហ្វូងអះអាងថា ត្រៀមបាញ់ក្បាលគ្រាប់នុយក្លេអ៊ែរដែលអាចដាក់ពង្រាយនៅពេលណាក៏បាន ៕
ចែករំលែកព័តមាននេះ